O Fale e Lima o Iosefa ma Ema Samita i Ohaio

O le aso muamua lava sa taunuu ai Iosefa ma Ema Samita i Katelani, sa maua ai e Iosefa se faaaliga lea sa faatonu ai e le Alii le Ekalesia e saunia se fale mo ia ma lona aiga ina ia mafai ona nonofo ma faaauau ai ona galue i le faaliliuga musuia o le Tusi Paia (tagai Mataupu Faavae ma Feagaiga 41:7).

E ui i lea, sa faaaluina e Iosefa ma Ema Samita ni tausaga se tele e faalagolago ai i le agaalofa ma le agalelei o tagata o le Ekalesia e saunia ai se nofoaga mo i la’ua e nonofo ai.

O nofoaga nei e lima sa nonofo ai Iosefa ma Ema Samita i le fitu tausaga sa avea ai matuisasa’e o Ohaio ma laumua o le Ekalesia.

Ina ua taunuu Iosefa ma Ema Samita i le Faleoloa o Newel K. Whitney i Katelani i le aso 4 o Fepuari, 1831, sa vave lava ona valaaulia i la’ua e Newell ma lona faletua o Elisapeta Ann e nonofo i lo la fale se ia maua se fetuunaiga mautu. “Sa ma’ua fiafia e faafeiloai i la’ua ma faasoa atu ia i la’ua ia faamanuiaga uma ma le mafanafana sa ma aeae ai,” sa saunoa ai Elisapeta Ann¹

Talu mai Oketopa i le tausaga ua mavae, ina ua taunuu uluai faifeautalai i Ohaio, sa faatautaia ai e le au Whitney le tele o fonotaga i se potu o lo la fale. I le aluga o le fa vaiaso lea sa nonofo ai Iosefa ma Ema i le Fale o Whitney, sa faaauau ai ona avea lea fale ma taulaiga o gaoioiga mo le Ekalesia.

E toatele le Au Paia sa omai i le fale o Whitney e auai i fonotaga ma feiloai ma le Perofeta. A o nofo ai iina na maua ai e Iosefa ni nai faaaliga lea ua tusifaamaumauina nei i le Mataupu Faavae ma Feagaiga.²

Faatasi ai ma faaaliga aupito sili ona taua o le Mataupu Faavae ma Feagaiga 41. Sa maua i le aso muamua sa nonofo ai Iosefa ma Ema i le au Whitney, lenei faaaliga sa faailoa mai ai le tofi o le epikopo ma valaau ai Eteuati Paterika e galue i le tofiga. Ina ua uma ona auina atu Paterika i Misuri e auauna ai o se epikopo iina, sa valaauina loa Newell K. Whitney e auauna atu o se epikopo i Ohaio.³

O le taimi a o nonofo Iosefa ma Ema i le Fale o Whitney sa fuafua lava e le tumau ai. O le aso na taunuu ai Iosefa ma Ema ma maua ai e Iosefa le faaaliga e tatau ona fausia se fale mo i la’ua, sa malie ai Isaako Morley, o se faifaatoaga mauoloa i le lotoifale, ia fausia se fale i lana faatoaga latalata ane.

Sa vaavaaia e Morley le fausiaina o le fale itiiti mo Iosefa ma Ema, lea sa faamae’aina i le na o le fa vaiaso. Sa siitia atu Iosefa ma Ema i lo la fale i le Faatoaga a Morley i le amataga o Mati 1831.

Sa naunau ia Isaako ma lona faletua o Lusi e fesoasoani e atinae le Ekalesia toefuataiina talu mai le la papatisoga ia Novema 1830. A o papatisoina tagata liliu mai i Ohaio ma taunuu mai le Au Paia mai Niu Ioka, sa maua e le toatele ni fale le tumau i le Faatoaga a Morley.

A o nonofo ai Iosefa ma Ema i l le faatoaga, sa faaauau e Iosefa ona faia fonotaga ma le Au Paia ma maua ni faaaliga. Ua faaalia i faamaumauga sa faamalau atu e Iosefa se aofaiga tele o faaaliga, e aofia ai le tele pe tusa e 13 ia ua aofia nei i le Mataupu Faavae ma Feagaiga.⁴

O faaaliga i lea vaitaimi sa tuuina atu ai se malamalamaaga taua o Iosefa ma le Au Paia e uiga i le matafaioi a Iesu Keriso o lo tatou fautua, auala e faatautaia ai fonotaga, auala e aoao ai e le tasi le isi i le talalelei, ma faamoemoega o meaalofa o le Agaga.

I le gasologa o fonotaga ma konafesi sa faia i le Faatoaga a Morley, sa valaauina toeaina e faataunuu ni misiona ma sa faia ni valoaga e uiga i le taunuuga o le talalelei toefuataiina i le lalolagi.

Sa o se taimi luitauina foi lea mo Iosefa ma Ema. I le aso 30 o Aperila, 1831, na fanauina ai e Ema se masaga lea sa na o ni nai itula sa feola ai. O le lona lua ma le tolu ai lea o fanau ua maliliu a Iosefa ma Ema i lalo ifo o le tolu tausaga.

O le aso lava lea, na maliu ai Iulia Murdock, o se tasi o le Au Paia o Aso e Gata Ai sa nofo ai i le Faatoaga a Morley, a o ia fanauina se masaga. O mafatiaga o Iosefa ma Ema i le maliliu ai o le la fanau masaga sa tuuitiitia ina ua talosaga atu le toalua o Iulia o Ioane, ia Iosefa ma Ema e vaetama lana masaga, o Iosefa ma Iulia.

Ina ua mavae le ono masina o nonofo ai i le Faatoaga a Morley, sa toe siitia foi Iosefa ma Ema. Ia Setema 1831, sa siitia atu ai i Hairama, Ohaio, i le fale o Ioane ma Elsa Ioanesone. I faaaliga e lua sa maua ia Aokuso ma Setema 1831, sa faatonuina ai Isaako Morley e faatau ese lana faatoaga (tagai Mataupu Faavae ma Feagaiga 63:38- 39; 64:20). Ina ua uma ona faatauina ese atu se vaega tele o le faatoaga ia Oketopa 1831, sa toe siitia atu ai e Isaako ma Lusi lo la aiga i Misuri.⁵

O le iloaina e le o toe mamao ae leai se fale mo Iosefa ma Ema, sa valaaulia ai i la’ua e Ioane Ioanesone, o se tagata liliu mai mauoa, e siitia atu i lona fale i Hairama, Ohaio, e 44 maila (71 km) i saute o Katelani. Ia Setema 1831, a o lei faatauina atu le Faatoaga a le au Morley, sa siitia atu ai Iosefa ma Ema Samita faatasi ma le la masaga e tai fa masina i le fale o Ioane ma Elsa Ioanesone.

O le au Ioanesone, lea sa siitia atu i Ohaio i le 1818, sa umia se faatoaga manuia ma se pisinisi susu ma o ni isi o tagata aupito sili ona tamaoaiga i le Itumalo o Portage. I le fale o le au Ioanesone, sa faafeiloaia ai e Iosefa se solo o tagata asiasi e le mavae, o le toatele o i latou ina ia fafagaina ma i ai se fale e nonofo ai mo le po.

E le gata ina tuuina atu e le au Ioanesone se potumoe i le foloa autu lea sa nonofo ai Iosefa, Ema, ma le la fanau, ae sa la’ua tuu atu foi ia Iosefa se potu tele i le fogafale lona lua lea sa avea ma ona ofisa. I le potu a luga lea, sa faia ai ni fonotaga a Iosefa ma tagata o le Ekalesia ma taitai, sa faaauau ona galue i le tusitusia o faaliliuga musuia o le Tusi Paia, ma tuuina atu faaaliga paia, e aofia ai le 16 lea ua maua nei i le Mataupu Faavae ma Feagaiga.⁶

I le gasologa o se konafesi a toeaiina sa faia ii i le amataga o Novema 1831, sa faia ai se faaiuga e lomia le tuufaatasiga o faaaliga a Iosefa Samita.⁷ Mulimuli ane, i le aso 16 o Fepuari, 1832, a o galulue Iosefa ma Sini Rikitone i le faaliliuga o le Feagaiga Fou, sa tatalaina se faaaliga vaaia ia i la’ua lea sa o la vaai ai i a Iesu Keriso ma sa aoaoina atili ai e uiga i le toetutu o e ua oti.

E lei leva ona mae’a lea faaaliga vaaia, ae osofaia e fili o le Ekalesia le fale o le au Ioanesone, toso ese mai Iosefa mai lona moega, ma toso atu o ia i se fanua taalaelae lata ane. Sa sasae eseina ona ofu mai lona tino, ma sa valitaina o ia ma faafulumoa. I le mavae o se po umi o tau aveese ma le tiga le ta mai lona tino, sa lauga atu Iosefa i se lauga o le Aso Sa i se aofia na potopoto o le Au Paia, lea sa auai ai ma tagata faatupu faalavelave.

O le mea e faanoanoa ai, o le atalii pepe o le au Samita, o Iosefa—se tasi o le masaga na vaetamaina—na maliu mulimuli ane ona o le taia i le malulu. Mo masina e tele na sosoo ai, na faaauau ai faamata’uga ma gaoioiga a tagata faatupu faalavelave e taamilo solo ia Iosefa Samita i Hairama ma nuu lata ane.

A o faatupula’ia finauga i Hairama, sa toe faafouina ai e Newell K. Whitney ni nai potu i totonu o lona faleoloa i Katelani e saunia ai se nofoaga fou e nonofo ai Iosefa ma Ema. Ia Setema 1832, na siitia atu ai Iosefa, Ema, ma le la afafine o Iulia, i potu i le fogafale i luga a’e o le faleoloa.

Mo le toeitiiti lua tausaga, sa nonofo ai Iosefa ma Ema i le Faleoloa o Whitney, lea sa le gata ina avea o se fale mo le la aiga talavou ma tuputupua’e ae na avea foi ma taulaiga o gaoioiga a le Ekalesia. A o nonofo ai iina, sa faaauau pea ona maua e Iosefa Samita faaaliga, e aofia ai le 16 lea ua aofia i le Mataupu Faavae ma Feagaiga.⁸ I le aso 6 o Novema, 1832, sa fanau ai Iosefa Samita III i le faleoloa o N. K. Whitney & Co. Faleoloa.

Sa fausia e Iosefa Samita se ofisa i le fale, lea sa ia faaauau ai ona galue i le faaliliuga musuia o le Tusi Paia ma feiloai atu i taitai o le Ekalesia. Mo le 18 masina lea sa nonofo ai Iosefa ma Ema i le Faleoloa o Whitney, sa avea ai ma laumua o le Ekalesia ma le faatulagaina o le tele o mea taua na tutupu i Katelani.

Faatasi ai ma le tele o isi mea, o faaaliga na maua iinei sa tuuina mai ai ni malamalamaaga fou i le perisitua, poloaiina le Au Paia e fausia le maota o le Alii, ma aoao ai i tatou i le ala e avea atili ai e pei o Keriso.

I le aso 8 o Mati, 1833, i le mavae ai o le tele o masina o feutagaina ma faaaliga, sa faatulagaina atoatoa ai le Au Peresitene Sili o le Ekalesia i le Faleoloa o Whitney, ma vaetofia ai fesoasoani o Iosefa Samita o Sini Rikitone, ma Feterika G. Viliamu.⁹

I se potu i le pito i tua o le faleoloa, sa amata ai ona faia e Iosefa Samita ni vasega mo le Aoga a Perofeta, o se polokalama faaleaoaoga mo taitai o le Ekalesia ma faifeautalai e saunia ai i latou mo le auaunaga. O le faatulagaga lenei sa uluai faaalia mai ai le Upu o le Poto, le tulafono a le Alii mo le soifua maloloina.

I le taufaaiuiuga o le 1833, na faamae’aina ai le fale mo Iosefa ma Ema ma le la fanau. Sa tu lenei tamai fale i le itu i saute o le faleoloa o Whitney, i luga o le mapuepue i autafa ane o le mea sa fausia ai le maota o le Alii.¹⁰ O le fale muamua lea ua umia e Iosefa ma Ema talu ona malaga ese mai le la fale i Haramoni, Penisilevania. Mai lona umukuka fou, sa mafai ai e Ema Samita ona matamata atu ao alu a’e le malumalu folafolaina i luga a’e o le laufanua.

I le fale lenei, sa faatautaia ai e Ema se pisinisi susu, faafaigaluega ni tamaitai faigaluega, ma amata ona faagaoioia se aiga. O i foi, faatasi ai ma le fesoasoani a Viliamu W. Phelps, sa tuufaatasia ai e Ema le uluai tusipese a le Ekalesia. Sa fanau le isi tamaitiiti, o Feterika Granger Viliamu Samita, ia Iuni 1846, ma i le silia ma le tolu tausaga sa mafai ai ona faamautu le au Samita i lea fale. A o nofo ai iinei, sa maua ai e Iosefa Samita se vaega po o faaaliga uma e 5.¹¹

I le taimi na nonofo ai Iosefa ma Ema i lo la fale, sa faaauau foi ona tuputupua’e le Ekalesia. I le tali atu ai i le manaoga tau le taitaiga, sa faaali mai ai e le Alii tofi fou o le perisitua, suiga i le faatulagaga tau pulega, ma isi upumoni e faavavau i tagata o le Ekalesia. I le aso 17 o Fepuari, 1834, sa faatulagaina ai le uluai siteki o le Ekalesia faatasi ma le valaauina o le aufono maualuga e Iosefa Samita.

I isi fonotaga sa faia i lea taimi—ma atonu i le fale—o faaaliga a Iosefa Samita na faalautele ai le malamalamaaga e uiga i le perisitua, faatulagaina le Tolauapiga a Siona, faatulaga aloaia le Korama a Aposetolo e Toasefululua, ma saunia ai le Au Paia mo le faaeega o le mana sa folafolaina i le malumalu. Mai lona tulaga i autafa ane o le nofoaga o le malumalu, sa mafai ai e Iosefa ona vaavaaia le fausia o fale faaopoopo o le Ekalesia, e aofia ai se fale lomitusi, o se faleaoga, ma le Sosaiete o le Saogalemu o Katelani.

Sa nonofo ai lava le au Samita i le fale lenei seia oo i le amataga o le 1838, lea na uunaia ai i latou e o ese ona o fevaevaea’iga i le Ekalesia ma le faateteleina o gaoioiga faatupu faalavelave. I le aso 12 o Ianuari, 1838, na tuua ai e Iosefa Samita ma Sini Rikitone ia Katelani e ui atu i nuu na nofoia e le Au Paia o Aso e Gata Ai i Matusisifo o Misuri. Sa lei leva ae mulimuli atu Ema, lea sa maitaga i le isi tamaitiiti.¹²