Maota o Iosefa ma Ema Samita

O le Maota o Iosefa ma Ema Samita i Haramoni, Penisilevania, sa o se nofoaga o faaaliga. O iinei na faaauau ai ona faaliliu e Iosefa le Tusi a Mamona e ala i le mana o le Atua, na fesoasoani i ai tusiupu e pei o Ema, lona uso o Reupena, Matini Harisi, ma Oliva Kaotui.

Ina ua siitia atu i lenei fale ia Tesema 1827, i le na o le lua masina talu ona maua papatusi auro, sa nonofo puupuu Iosefa ma Ema ma matua o Ema a o lei siitia atu i lenei faatoaga e 13.5 eka ia Ianuari po o le amataga o Fepuari o le 1828. Na faatau mulimuli ane e Iosefa ma Ema le fale mai le tamā ma le tuagane o Ema. O le fanua vaapiapi na sau mai le Vaitafe o Susquehanna e oo atu i auvaemauga o le Mauga o Oquago. Sa aofia ai se fale manu ma se fale na fauina e Iese le tuagane o Ema. O le Maota o Iosefa ma Ema Samita o se fale na toe fauina na fausia i le uluai nofoaga.

Ina ua taunuu i Haramoni, sa agaigai i luma Iosefa i le faaliliuina o papatusi auro mo le tusa ma le fa masina. Sa avea Ema ma ana tusiupu muamua a o lei mauaina le fesoasoani mai lona tuagane o Reupena Hale ma mulimuli ane, mai ia Matini Harisi.

I le amataga o Iuni 1828, sa aioi atu ai Matini Harisi ia Iosefa Samita e ave le tusitusiga i Palamaira e faasoa atu i lona toalua o Lusi Harisi, ma isi tagata o le aiga o e sa le fiafia i le lagolago e Matini o Iosefa. Ina ua mavae taumafaiga e tolu e maua le faatagaga a le Alii e ave ai le tusitusiga, na iu lava ina toe faatagaina e le Alii ma tuua ai e Matini ia Haramoni ma le tusitusiga i le aso 14 o Iuni, 1828. O le aso na sosoo ai, na fanauina ai e Ema lana tama muamua, o se atalii sa na o ni nai itula na ola ai. Ina ua uma ona tanumia le tamaitiiti i le Fanuatanu o McKune, na lata ane, sa tausia e Iosefa lona toalua o lē sa ma’i mai se fanauga faigata ma le faavauvau loloto i le maliu o lana tama. Ina ua toeitiiti atoa le lua vaiaso, a o amata ona toe maua lona malosi, sa matauina e Ema le popole o Iosefa i le tusitusiga. Latou te lei toe feiloai ma Matini, ma sa mafai ona ia iloa ua amata ona mamafa le popole i lana tane.

“Ua matuai o’u le mautonu lava,” sa ia fai atu ai ia Iosefa i se tasi aso, “ma o le a le mafai ona ou malolo lelei seia oo ina ou iloa se mea ua faia e le Susuga a. Harisi.” Ina ua mavae sina faamalosiauga faaopoopo, sa ave e Iosefa le taavale solofanua mai Haramoni i Manaseta, lea na ia iloa ai ua leiloa le tusitusiga ia Matini. “Ua leiloloa mea uma,” sa faanoanoa ai Iosefa. “Ua leiloa lo’u agaga.” Na alu Iosefa i le aso lava lena e toe foi atu i Haramoni e faasoa atu le tala faavauvau ia Ema. E lei leva ona toe taunuu atu o ia i Haramoni, ae toe faaali mai Moronae ma ave papatusi ma faamatalaupu e ta’u atu ia Iosefa afai e “lava lona lotomaualalo” o le a toe faafoi mai ia Setema. Ina ua mavae se vaitaimi o le salamo, sa maua e Iosefa Samita se faaaliga—lea ua avea nei ma Mataupu Faavae ma Feagaiga 3—lea na folafola mai ai e le Alii e faapea, o Ona faamoemoega “e le mafai ona taofia” ma ta’u atu ia Iosefa e le tatau ona “sili atu lou fefe i tagata nai lo i le Atua” (Mataupu Faavae ma Feagaiga 3:1, 7). Na folafola mai foi e le Alii na “toe valaaulia [Iosefa] i le galuega.” Na toe faafoi mai papatusi, ma, faatasi ai ma Ema na toe auauna atu o lana tusiupu, na amata ai ona faia e Iosefa ni taumafaiga e fai ma malolo e faaliliu.

I le aso 5 o Aperila, 1829, na taunuu ai i Haramoni ia Oliva Kaotui, o se faiaoga sa nofo mautotogi ia Iosefa le Matua ma Lusi Samita i Manaseta. Ina ua ia iloa e uiga i faaaliga a Iosefa le Itiiti, sa suesue ma tatalo Oliva ia iloa pe na mai le Atua. Ina ua faatalitonuina o [faaaliga] sa mai le Atua, sa talitonu foi o ia e i ai se matafaioi mo ia e faia i le fesoasoani ai ia Iosefa. E lua aso talu ona mavae le uluai feiloaiga ma Iosefa Samita, na amata ai ona galue Oliva o lana tusiupu. Sa faaliliuina faatasi e Iosefa ma Oliva le Tusi a Mamona i le na o le tolu masina, i le taimi lea na la mauaina ai foi le Perisitua Arona ma le Mekisateko, faatulaga mo le lolomiina o le Tusi a Mamona, ma saunia e faatulaga le Ekalesia a Iesu Keriso.

Faitau atili e uiga i mea na tutupu i le Maota o Iosefa ma Ema Samita i le Au Paia Voluma 1, Mataupu 5.

O Mea e Faamoemoe i Ai

O le Maota o Iosefa ma Ema Samita o se vaega o le maimoaga taamilo o loo maua i le Nofoaga o le Toefuataiga o le Perisitua. E tatau ona tusa ma le 30 minute le umi o le maimoaga ma o le a e ui atu ai i potu autu e lua i le fale. E amata maimoaga i le Nofoaga Autu mo Tagata Asiasi.

Ata 360°