O Le Toefuataiga o le Perisitua

I le aso 5 o Aperila, 1829, na faamae’aina ai e Oliva Kaotui se malaga e 150 maila e sopoia ai le setete o Niu Ioka. Ao goto ifo le la, sa taunuu atu o ia i lona taunuuga i Harmony Township, Penisilivania, ma feiloai ai ma Iosefa Samita mo le taimi muamua.

Sa savavali Oliva ma le uso o Iosefa o Samuelu mo le tele o aso i timuga o le tautotogo ma le palapala ina ia taunuu ai i si tamai fale i tafatafa o le vaitafe lea na nonofo ai Iosefa ma lona faletua o Ema. Sa fuafua Samuelu e fesoasoani i le faatoaga. Sa faalogo Oliva i tala e uiga i se agelu ma se faamaumauga anamua sa tusia i papatusi auro ma lagona ai le uunaiga a le Agaga o le Atua e alu atu ma fesoasoani ia Iosefa e aumai i le malamalama le savali a le tusi.

Sa faafetai Iosefa i le i ai o Oliva iina. Talu ona maua e Iosefa ia papatusi ia Setema 1827, sa faasalaveia ai lana galuega o le faaliliuga e le manaomia ona galue e tausi o ia lava ma lana avā talavou, o le siitia atu mai Palemaira i Haramoni, ma le leiloloa ai o uluai tusitusiga.

I le na o le lua aso talu ona taunuu Oliva i Pennsylvania, sa amata ai e Iosefa ma Oliva ona faaliliu ma tusitusi ia papatusi auro i le Tusi a Mamona. I le aso 15 o Me, 1829, i le sili atu i le na’o le tasi le masina talu ona la amata galulue faatasi i le faaliliuga, na tau ai Iosefa ma Oliva i le tala e uiga i le asiasiga a Keriso i sa Nifae i le 3 Nifae.

O le faitau ai i lenei tala, na faateia ai i laua i le taulaiga o le manaomia ona papatisoina e auauna faatagaina a le Atua. Sa tusia e Oliva mulimuli ane e faapea, “I le manatunatu atili i ai sa faapea foi ona faigofie ona vaaia, … sa leai se tasi na i ai le pule mai le Atua e fai ai sauniga o le Talalelei.”¹ O le iloa ai sa manaomia ona papatisoina i laua, ma o le sauniga na manaomia ai le pule mai le Atua, sa maua ai e Iosefa ma Oliva se nofoaga tuufua i le togavao lata ane e tatalo ai mo se taitaiga mai le lagi.

A o tatalo Iosefa ma Oliva, sa laua faalogoina le siufofoga o Iesu Keriso o fetalai mai le filemu ia i laua a o faaifo ane se agelu mai le lagi i se malamalama “susulu” e “sili atu le susulu nai lo o le la ia Me.” Sa faailoa mai e le agelu o ia lava o Ioane le Papatiso ma tuu ona aao i luga taitoatasi o o laua ulu ma faapea mai:

“I luga o oulua oʼu uso a auauna e, i le suafa o le Mesia, ou te faaee atu i ai le Perisitua o Arona, ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Mataupu Faavae ma Feagaiga 13).

Sa faamatala mai e Ioane le Papatiso e faapea, o le Perisitua Arona na tuu mai ai ia Iosefa ma Oliva le mana e galulue ai i le suafa o le Atua e papatiso ai e le tasi le isi. Sa ia faamatala ane foi, sa i ai ni mana faaopoopo o le Perisitua o le a faaeeina mulimuli ane e tuu atu ai le meaalofa o le Agaga Paia ma faatino ai sauniga faaopoopo. Ona faatonuina lea e Ioane ia Iosefa ma Oliva e o atu i le Vaitafe o Susquehanna e latalata ane ma papatiso e le tasi le isi.

Ina ua tuumuli Ioane le Papatiso, sa mulimuli loa Iosefa ma Oliva i ana faatonuga ma savavali atu i le Vaitafe o Susquehanna lea sa auauai papatisoina ai e le tali le isi. Sa papatisoina Oliva ona sosoo ai lea ma Iosefa, ma ina ua la o a’e mai le vai, sa faatumulia i laua i le agaga o le Atua ma amata ona vavalo atu e uiga i le ekalesia ma mea o le a oo mai. Ina ua uma ona papatisoina i laua, sa laua o ese ma le vaitafe ma o atu i le togavao lea sa faauuina ai e le tasi le isi i le Perisitua Arona.

Mulimuli ane, na faaali ane ai aposetolo a Keriso i le Feagaiga Fou o Peteru, Iakopo, ma Ioane ia Iosefa ma Oliva ma faaee atu ia i laua le Perisitua Mekisateko ma faauu i laua o ni aposetolo. O lenei perisitua maualuga atu lea na faatoa faaeeina atu, na tuuina atu ai ia Iosefa ma Oliva le gafatia e faaee atu ai le meaalofa o le Agaga Paia i luga o isi pe a uma ona papatisoina, e pei lava ona sa folafola mai e Ioane le Papatiso.