Nofoaga o le Toefuataiga o le Perisitua

O le Nofoaga o le Toefuataiga o le Perisitua i Oakland Township, Penisilevania, o loo i ai talafaasolopito o laufanua, faatagata, fale e lua ua toe fausia, ma se Nofoaga Autu mo Tagata Asiasi e faamanatu ai mea na tutupu e siomia ai le faaliliuga o le Tusi a Mamona ma le toefuataiga o le Perisitua Arona. E aoao tagata asiasi e uiga i nei mea na tutupu e ala i le matamata i se ata ma fiafia i faaaliga fesootai. O maimoaga taamilo i le Fale o Isaako ma Elisapeta Hale ma le Maota o Iosefa ma Ema Samita e amata i le nofoaga autu mo tagata asiasi. E valaaulia foi tagata asiasi e suesue i auala eseese i nofoaga ia o le a aveina atu ai i latou i le toga suka lata ane lea atonu na toefuatai mai ai le perisitua Arona pe asiasi ai i auvai o le Vaitafe o Susquehanna lea sa papatiso ai Iosefa Samita ma Oliva Kaotui. O le Fanuatanu i McKune, lea na lagomau ai e Iosefa ma Ema Samita le la tama muamua ma le mea o loo lagomau ai matua o Ema, e faafesagai ma le maafaamanatu o le Toefuataiga o le Perisitua Arona.

Sa faaliliuina e Iosefa Samita le tele o le Tusi a Mamona iinei i le fale sa la nonofo faatasi ai ma lona faletua o Ema. Sa avea o ia ma isi o ni tusiupu a Iosefa mo se taimi, a o lei avea Oliva Kaotui ma tusiupu autu. I le Nofoaga o le Toefuataiga o le Perisitua, o le a e maua ai le avanoa e maimoa taamilo ai i ni fale se lua, o le Fale o Isaako ma Elisapeta Hale, ma le Maota o Iosefa ma Ema Samita ma aoao atili ai e uiga i le taimi na nofo ai le Perofeta i Haramoni.

I le aso 15 o Me, 1829, i le tali mai i le tatalo a Iosefa ma Oliva e uiga i le papatisoga, na auina mai ai e le Atua ia Ioane le Papatiso, o lē na faaee atu ia Iosefa ma Oliva lePerisitua Arona. Ona papatisoina lea e Iosefa ma Oliva le tasi ma le isi i le Vaitafe o Susquehanna. I le 1960 na tuu ai e le Ekalesia se maafaamanatu i le nofoaga e faamanatu ai le toefuataiga o le Perisitua Arona. O le laufanua lauiloa ma auala savali e fesoasoani i tagata asiasi ia maua ai se lagona o le nofoaga na tutupu ai nei mea faavavega.