Fale o Isaako ma Elisapeta Hale

O le fale o Isaako ma Elisapeta Hale o le fale lea o matua o Ema Hale Samita. Pe tusa o le 1810, ina ua tusa ma le ono tausaga o Ema, na siitia ese ai le aiga o Hale mai le fale ogalaau lea na fanau ai o ia i lenei fale puipui lelei. O iina sa nofo ai o ia i le taimi muamua na ia feiloai ai ia Iosefa Samita le Itiiti.

I le 1790, na nonofo ai Isaako ma Elisapeta Hale i Haramoni, Penisilevania, lea na faatau mai ai e Isaako se faatoaga e 100-eka. Mo le isi 20 tausaga, sa galulue ai le aiga o Hale e atinae la latou faatoaga (lea na faatupulaia i le 150 eka), fausia se tamai fale ogalaau, ma vaneina se mea e ola ai i le vaomatua o Penisilevania. Sa fausia foi e Isaako se pisinisi e maua ai tupe mama o se tagata tulimanu, e faatau atu ai taaloga vao ma oloa pa’umanu i le vaitafe. Sa ia tipiina foi laau, fafaga lafumamoe, ma tata laau sua [meipo] mo le sua o le meipo ma le suka. Na fanauina e Elisapeta ni atalii se toalima ma ni afafine se toafa i na tausaga popofou. Pe tusa o le 1810, na siitia atu ai le aiga o Hale i se fale e lua fogafale na faamaeaina talu ai nei e latalata i lo latou fale ogalaau. O le fale o loo i ai nei o se toe fauga o le uluai fale o le Aiga o Hale i le nofoaga sa i ai muamua le fale.

Na muamua feiloai Iosefa Samita le Itiiti ma le aiga o Hale ia Oketopa 1825 ina ua faafaigaluegaina o i laua ma lona tamā e Iosia Stowell e fesoasoani e eli mo le ario i le eria. Sa faataga e Isaako Hale le aufaigaluega a Iosia Stowell e nonofo mautotogi i le fale ogalaau tuai i lona fanua mo le tusa ma le tolu vaiaso. I le taimi lea, na muai feiloai ai Iosefa ma amata ona faauo i le afafine o Isaako Hale o Ema. I le vaitau na sosoo ai, na ofoina atu ai e Iosia Stowell ia Iosefa Samita le Itiiti se isi galuega i lana faatoaga i Colesville, Niu Ioka e lata ane, e faataga ai Iosefa ma Ema e faaauau le la faauoga. Na faaipoipo le toalua lea ia Ianuari 1827.

Ina ua mavae le la faaipoipoga, sa la nonofo muamua ma le aiga o Iosefa i Manaseta, Niu Ioka. E lei leva ona maua e Iosefa papatusi auro, ae siitia atu i laua ma Ema i Haramoni lea na iu ai ina la faatauina mai se fale mai le aiga o Ema.

Faitau atili e uiga i le taimi o Iosefa i le Fale o Hale i le Au Paia Voluma 1, Mataupu 4.

O Mea e Faamoemoe i Ai

O le Fale o Isaako ma Elisapeta Hale o se vaega o le maimoaga taamilo o loo maua i le Nofoaga o le Toefuataiga o le Perisitua. E amata maimoaga i le Nofoaga Autu mo Tagata Asiasi. I le taimi o le maimoaga taamilo o le a e vaai ai i le umukuka, potu, ma potumoe.

360° Faasologa