Faatoaga a Isaako ma Lusi Morley

O Isaako Morley o se tasi o uluai tagata na nofoia Katelani, Ohaio. O ia ma lona toalua o Lusi, sa faagaioia se faatoaga tele e 80 eka, lea sa o la’ua tatalaina i tagata o le nuu sa sailia le Ekalesia a Keriso e pei ona otooto mai i le Feagaiga Fou.

Sa auai Isaako ma lona aiga i le Ekalesia ina ua pasia e faifeautalai lo latou eria, ma e toatele isi tagata o lo latou alalafaga sa auai foi. O le faatoaga tele a leau Morley e le gata sa avea ma nofoaga e faapotopoto ai ae sa avea foi ma nofoaga o faaaliga ma sulufaiga mo Iosefa Samita.

Ina ua uma ona auai i le Ekalesia, sa ofoina atu e le au Morley e faanonofo nisi tagata o le Au Paia sa siitia atu i lea eria, a o faapea foi ona fausia se fale mo Iosefa ma Ema Samita. E ui lava na o ni nai masina sa nonofo ai Iosefa ma Ema Samita i lenei fale—mai ia Mati ia Setema 1831—ae o se nofoaga lenei o faaaliga.

A o nofo ai iinei, na maua ai e Iosefa ni faaaliga se 13 lea ua tusifaamaumauina nei i le Mataupu Faavae ma Feagaiga. I se faleaoga laitiiti i luga o le fanua, sa vavalo atu ai Iosefa Samita i se vaega o alii e uiga i le tuputupua’e o le Ekalesia a Iesu Keriso o le Au Paia o Aso e Gata ai. I lena lava potopotoga, e 23 alii, e aofia ai Iosefa Samita lava ia, sa faauuina o ni faitaulaga sili.

O loo i ai i le taimi nei se vaega itiiti o le fanua o loo tatala i tagata lautele. O le fale o loo tu nei i le fanua e le o tatalaina i tagata lautele, ma e le o le fale lea sa nonofo ai le au Morley po o le au Samita. Peitai, e mafai ona savavali tagata asiasi i se auala puupuu agai luga e agai i le mea sa iai le faleaoga.

Faitau atili e uiga i le Faatoaga a le au Morley i le Au Paia, vol. 1, mataupu 10 ma le 11.

O Mea e Faamoemoe i ai

O le Faatoaga a Morley o se aafiaga e taiala e le tagata lava ia lea e mafai ona e iloa ai le laufanua faataamilo o le fanua.