Pule ma le Mana o le Perisitua

O le vave o le tuputupua’e o le Ekalesia i le vaitau o le 1830 na aumai ai ma ni luitau tetele tau pulega. A o auai mai se aofaiga toatele o tagata fou liliu mai i le Ekalesia i totonu ma faataamilo i Katelani, na amata ai foi ona faapotopoto mai tagata o le ekalesia mai Niu Ioka i Ohaio. O lenei feoaiga ma le faalauteleina na fatuina ai se manaoga mo le Ekalesia e saunia le faateleina o fale ma avanoa tau galuega.

A o tulai mai lenei feoaiga ma le tuputupua’e, sa auina atu faifeautalai e talai le talalelei. O nei faifeautalai ma aiga na o latou tuua i le fale na manaomia le lagolagosua a o latou o atu i le lalolagi e talai atu.

Faatasi ai ma nei taumafaiga faafaifeautalai na oo mai ai le manaomia ona amata lomia anomea a le Ekalesia e pei o le Tusi a Mamona ma faaaliga a Iosefa Samita mo faifeautalai ma tagata lotu ia maua. O nei suiga uma na fatuina ai se manaoga tele mo nisi faatulagaga tau le taitaiga.

O le tele o vaega aupito masani ai o le Ekalesia i aso nei e iai o latou a’a i faaaliga ma suiga faafaalapotopotoga ia na tutupu a o iai le laumua o le Ekalesia i Ohaio. E aofia ai au epikopo, le Au Peresitene Sili, faatulagaga o siteki, au peresitene o korama a le perisitua, ma Pulega Aoao mo le Ekalesia.

O nei suiga i le faatulagaga o le perisitua e o faatasi ma le alualu i luma faaleaoaoga faavae ia sa maua ma fesoasoani e saunia ai le Au Paia e maua le faaeega o le mana na folafolaina mai pe a faamaeaina le fausiaina o le maota o le Alii.

O le taimi lava ina ua mavae le taunuu o Iosefa Samita i Ohaio, na faaali mai ai e le Alii le uluai tofi o le tele o tofi fou ma na fuafuaina e korama o le perisitua e faafetaia’ia luitau na feagai ma le Ekalesia.

I le faaaliga na maua i le aso na taunuu ai Iosefa, na faatonuina ai e le Alii ina ia faauuina Eteuati Paterika, o se faipisinisi manuia mai le nuu lata ane o Painesville o lē na faatoa uma ona papatisoina, e “faauu o se epikopo mo le ekalesia” ma valaaulia Paterika e “tuu ana oloa ma faaaoga lona taimi atoa i galuega a le ekalesia” (Doctrine and Covenants 41:9).

Na maua isi faaaliga faaopoopo i le aluga o masina na sosoo ai e faamanino ma faalautele ai le tofi o le epikopo i le faaopoopoina o fesoasoani ma otooto tiutetauave patino o le tofiga.¹

A o faaauau ona tuputupua’e le Ekalesia, na manaomia ai ona faaaauau se vaavaaiga faaopoopo. Ia Iuni 1831, e toatele alii sa faauuina i le “perisitua maualuga,” o se tofi fou na faaalia mai i le Perisitua Mekisateko lea ua masani ona tatou faasino iai o le “faitaulaga sili.”³

Ia Novema 1831, na faatonuina ai Iosefa Samita i se faaaliga e faavae le “peresitene o le perisitua maualuga,” o lē o le a avea ma “tagatavaai, o se talifaaaliga, … ma o se perofeta, ua iai meaalofa uma a le Atua e faaee mai e ia i luga o ulu o e ekalesia” (Mataupu Faavae ma Feagaiga 107:65-67, 92).

I le aso 25 o Ianuari, 1832, sa tofia ai Iosefa Samita o se peresitene o le perisitua maualuga ma taliaina i le palota autasi a i latou na auai i se konafesi i Amherst, Ohaio.⁴ O le ono vaiaso mulimuli ane, i le aso 8 o Mati, na valaauina ai e Iosefa Samita ia sini Rikitone ma Iese Gause o ni fesoasoani e fesoasoani ia te ia i le Au Peresitene Sili fou sa fatuina o le Ekalesia.

I le aso 26 o Aperila, 1832, na maua ai se faaaliga sa faapaiaina ai Katelani o se “siteki o Siona.” Ia Fepuari 1834, na faatuina ai le au peresitene o le siteki o Katelani, faatasi ai ma se aufono maualuga. Mulimuli ane i lena lava tausaga, sa faatulaga ai se siteki i Misuri, ma o siteki uma e lua na taitaia e se au peresitene, se epikopo, ma se aufono maualuga.⁴

Sa faatulagaina foi korama a faitaulaga sili ma toeaina i siteki taitasi. E amata ia Ianuari 1836, ina ua valaauina Don Carlos Samita o se peresitene o le korama a faitaulaga sili ma Alvah Beman o se peresitene o le korama a toeaina, na amata ai ona fono e le aunoa nei korama.

I le faaaliga na maua ia Iuni 1829, na valaauina ai e le Faaola ia Oliva Kaotui ma Tavita Uitimera e saili “le Toasefululua” o e o le a avea ma “o’u soo” ma “filifili e tauaveina i o latou luga Lona suafa ma le faamoemoega atoa o le loto” (Mataupu Faavae ma Feagaiga 18:27). O le uluai faailo lea o le korama faapitoa o soo e 12, e faapei o Aposetolo anamua a Keriso, o le a avea ma vaega o le Ekalesia toefuataiina. O le sailia o nei tamalii e 12 na alu ai toetoe o le ono tausaga.

O le tausaga talu ona faatulagaina le aufono maualuga a Katelani, i le aso 14 o Fepuari, 1835, na faatulaga aloaia ai loa le Koarama o Aposetolo e Toasefululua ma faauuina ai ona sui auai. I se fonotaga i totonu o le maota o le Alii na toeitiiti lava mae’a, na valaauina ai Molimau e Toatolu o le Tusi a Mamona—o Oliva Kaotui, Tavita Uitimera, ma Matini Harisi—e tatalo taitoatasi, ona faagasolo ai lea e filifili alii e toasefululua mai le ekalesia o ni Aposetolo e o atu i nuu uma, ituaiga, gagana, ma tagata.”⁵

Ina ua maea ona tatalo ma faamanuiaina e le Au Peresitene Sili, na filifilia ai e tamalii ia Lyman Ioanesone, Polika Iaga, Heber C. Kimball, Orson Hyde, Tavita W. Patten, Luka Ioanesone, Viliamu E. McLellin, Ioane F. Boynton, Orson Pratt, Viliamu Samita, Thomas B. Marsh, ma Parley P. Pratt e auauna atu i le uluai Korama a Aposetolo e Toasefululua.

I le faagasologa o nai vaiaso na sosoo ai, na faauuina ai uso taitasi uma o le Toasefululua i o latou valaauga. I le gasologa o masina e tele, sa feiloai soo ai Iosefa Samita ma le Toasefululua e aoaoina i latou i o latou tiute o se “aufono maualuga femalagaa’i” o le Ekalesia, faatasi ai ma le pule e “tatala ai le faitotoa o le malo o le lagi i atunuu uma.”⁶

E lei leva talu ona valaauina le Toasefululua, ae faalauiloa mai le Au Fitugafulu, o se tofi faaopoopo o le Perisitua Mekisateko, ma sa faatulagaina korama faatasi ai ma le tiutetauave patino e fesoasoani i le Toasefululua e ala i le “teuteuina o le togavine mo le taimi mulimuli”⁷ ma auauna atu o ni “molimau faapitoa i Nuuese ma i le lalolagi atoa” (Mataupu Faavae ma Feagaiga 107:25).