Mai le AM Faalevaiaso
Pe o Lagona le Le Masani i le Aualofa? O Loo I Ai se Nofoa mo Oe Iina
O le sui atu i le Aualofa e mafai ona foliga taufaafefe, ae o le auai faatasi ma se usoga a tamaitai tausi feagaiga e mafai ai e le Faaola ona galue e ala atu ia te oe ma aumai ia te oe le toomaga.
O le taimi muamua lava na ou savali atu ai i totonu o la’u Aualofa fou, sa ou manao e toe liliu ma tamoe! Ou te lei iloaina se tasi. Ou te lei vaai i se tasi o la’u tupulaga. Ma e mautinoa lava ou te lei lagonaina ou te auai ai.
I ni nai masina na muamua atu, sa ou i ai i se uarota a tamaiti aoga ua faaipoipo i Hawaii, ISA, faatasi ai ma lo’u toalua, o Johnny, lea o le toatele o i matou sa faatoa faaipoipo, o loo aooga, ma mafaufau e uiga i le amataina o aiga. A o lei oo i lena mea, sa ou i ai i se uarota a tamaiti aoga o le YSA lea sa pei o se faalautelega o Tamaitai Talavou. O i matou uma o ni tamaiti aoga e lei faaipoipo, leai ni fanau, o lea sa faigofie ai ona fesootai, faauo, ma auauna atu.
Ae o lena vaitau o le lagolelei ma le tutusa sa lei tumau e faavavau.
O Le Mea e Tatau ona I Ai le Aualofa
Ina ua uma ona faauu, sa ma toe siitia atu ma Johnny i le nuu tele [o Amerika] ma amata ona auai i se uarota o aiga. Ma oka—na pei le Aualofa o se aganuu faateia! Na faafuasei lava ona siomia au e tamaitai o le vaitausaga 18 i le 98: nofofua, faaipoipo, tatala faaipoipoga, ua oti a latou tane; o nisi e i ai fanau, o nisi e leai; o nisi o loo galulue, aooga, tausia tamaiti, pe litaea, ma mea uma i le va.
Sa ou le mautinoa po o fea ou te ofi ai.
I ni nai vaiaso na sosoo ai, sa ou maua ai se tofiga faaleauaunaga, ma ou te lei lagonaina le tele o mea ou te tutusa ai ma uso sa talosagaina au e auauna atu i ai pe auauna atu faatasi.
Ae, sa ou taumafai lava ia auai. I le taimi muamua ou te auina atu ia i latou ni feau tusitusia vave pe fai ni talanoaga pe a tuua le lotu, o le tele lava ina ia mafai ona ou faapea atu sa ou faafesootaia i latou. Ae o la’u soa o auaunaga sa faamoemoeina ma agalelei. I se tasi aso, sa ia fautua mai ai ma te aveina uma o ma uso mo se aisa kulimi. Sa ou musua. Ou te popole ma e matele lava ina ou filemu i tagata ou te le iloa lelei. Ae ou te fiafia i le aisa kulimi, o lea sa ou ioe ai.
I le faaiuga o lena vaiaso, na leaga ai la’u veni. E taugata atu le lipeaina nai lo le tau o le veni. Ua oo i le taimi e faatau ai se taavale fou. Sa sefe se ma tupe ma Johnny ma sa saunia, ae sa pei lava o se mea tele. O lea la, ina ua mavae se aso faigaluega e 10 itula ma se afiafi faigata o le faataitaia o taavale, ou te lei lagona moni lava le fia feiloai i se tasi, e oo lava mo se aisa kulimi.
Ae sa ou alu atu pea, na tuai ma vaivai.
I lo’u te’i, sa fiafia tamaitai i le vaai mai ia te a’u. Sa iu ina matou talanoa mo le tele o itula. Sa le mafai ona ou fesootai atu i a latou tala o aoaoga faamasani mo tamaiti i faleleta’ua, ae sa ou iloaina e tele atu mea matou te tutusa ai nai lo le mea sa ou mafaufau i ai. Sa feagai foi se tasi o uso ma faafitauli tau taavale, ma sa ma tau fai tutusa i le le fiafia.
O lena po sa le na ona faatatau i le auauna atu. Sa faaali mai ai ia te a’u le uiga o le Aualofa: o se nuu faaleagaga lea e siitia ai, faamalosia, ma fealofani ai tamaitai o le feagaiga o ni soo o Keriso.
Sa faamatalaina e le Peresitene Aoao o le Aualofa talu ai o Julie B. Beck e faapea, sa silafia e le Alii le sili atu nai lo na o se sauniga i le Aso Sa: "Sa ia faamoemoe i le Aualofa e fesoasoani e fausia Lona nuu … [ma] faaogatusa Ona afafine ma Lana galuega."
O Se Usoga a Tamaitai mo Vaitau Uma
E le o faauigaina le Aualofa i tulaga faalefaaipoipoga, tausaga, po o le tulaga faatina. O se faalapotopotoga paia mo tamaitai matutua uma: tamaiti aoga, tina, uso nofofua, faifeautalai ua maea misiona, saunia galuega, ua tuufaatasia uma e a tatou feagaiga ma le avea ma soo.
O lena lotogatasi ma le usoga a tamaitai e matuai manaomia lava. Na aoao mai Sister J. Annette Dennis, Fesoasoani Muamua i le Au Peresitene Aoao o le Aualofa: "A o tatou o atu ma faaloaloa moni atu o tatou lima i isi ma tuu atu ia latou lagonaina lo tatou alofa, ona masani lea ona amata ona latou lagonaina foi le alofa o le Faaola."
O le mea lena ua ofoina mai e le Aualofa: o se nuu o tamaitai tausi feagaiga o loo taumafai e vaai ma auauna atu le tasi i le isi i le ala o le a faia ai e le Faaola.
I le avea ai ma se talavou matua, pe faatoa e foi mai mai se misiona, faatoa faaipoipo, fuafuaina le tulaga faatagata matutua, po o le saili pea mo lou nofoaga, o le Aualofa e mo oe. O loo i ai se nofoa mo oe iina. Ma o nisi taimi, pau lava le mea e manaomia o le auai atu—lelava, le mautinoa, po o sina musu laitiiti—ia matala ai le faitotoa mo le Faaola e galue ai e ala atu ia te oe ma fausia ni fesootaiga matagofie ma ou uso.
Afai e te lei faia, aapa atu i se tasi o ou uso o le Aualofa i lenei vaiaso. O au faatinoga laiti o le faatuatua atonu o le mea tonu lava lea e aumaia ai se isi tagata, ma oe lava, e latalata teisi atu ai i le toomaga o le Faaola.