Faasinomaga Paia: O Le Upumoni o le Talalelei Na Suia Ai Lo’u Olaga

O se upumoni e suia ai le olaga o le talalelei a Iesu Keriso o le, o i tatou o fanau a ni matua faalelagi.

Na aoao mai Elder Patrick Kearon o le Korama a Aposetolo e Toasefululua e uiga i le “i se meaalofa e tasi e aofia ai mea uma o upumoni e faavavau lea e lagolago ai lo tatou tomai e mauaina ai isi mea uma e finagalo lo tatou Tama e faaeeina mai ia i tatou—o se meaalofa taua o le malamalama lea, a taliaina ma le atoatoa ma a mauaina i le ta’ele o le agaga e mafaufau ai i le matalalaga o le olioli ma faigata o le olaga, ma a tatou fesili e le’i taliina: O i tatou moni o fanau a le Atua.”

Talu mai lena aafiaga i lo’u valaauga o le misiona, ua ou lagonaina ai le moni o na upu. E lei galo lava ia te a’u le faamautinoaga ma le faamalosiauina o o’u lagona ina ua ou iloaina e silafia a’u e le Atua ma e alofa ia te a’u.

E ui lava i lenei upumoni, e itiiti lava se mea e faamanatu mai e le lalolagi o siomia ai au e uiga i o’u aa paia. Ua ou iloaina e tatau ona ou faamoemoe e manatua lo’u faasinomaga paia ma le mana e oo mai ai.

Mo au, o lenei mea e aofia ai mea e pei o le mafaufau loloto i le vavega o lo’u tino ma le mea e mafai ai ona ou faia ma oo i ai i aso uma.

Ou te lagona foi le fesootai atu i lo’u Foafoa pe a ou i ai i le to’a filemu o le siosiomaga. O le vaaia o le matagofie o mauga po o le goto o le la e faamanatu mai ai ia te au e le i tatau i le Atua ona faamatagofieina le lalolagi. Ae sa Ia faia ma Iesu Keriso lena mea mo i tatou aua La te finagalo ia tatou olioli i mea ofoofogia o lenei lalolagi ma ia faamanatu ai lo La’ua alofa (tagai i le Mose 6:63).

Ma o le tatalo i le Tama Faalelagi i aso taitasi—faailoa atu ia te Ia ou lagona ma le iloaina e finagalo o Ia e faalogo ma talanoa mai ia te au—e fesoasoani i le faalolotoina o lo’u sootaga paia ma Ia. O le tatalo e faamanatu mai ai ia te au e le o tuua na o au ma o loo Ia taialaina au, e tusa lava pe le o tupu le mea ou te manao ai i le taimi nei. Ou te talitonu o Ia, o se Tama alofa, e silafia le taimi sa’o mo faamanuiaga patino e oo mai i lo’u olaga.

O la’u misiona e le o le mea lea sa ou faamoemoe o le a i ai, ae sa ou maua ni aafiaga na fesoasoani ia te au e iloa ai le mafuaaga na finagalo ai le Tama Faalelagi ia ou i ai i lo’u eria. O le faasoaina atu o le moni o le faasinomaga paia ia i latou o e e lei iloaina muamua lava na lei faatumulia au i le fiafia.

E le mafai ona ou vaai faalemafaufau i le olaga e aunoa ma le iloaina po o ai moni lava au—o le a ou lagonaina le gaogao ma le leiloa.

Pe a ou mafaufau i le faamoemoega o lo’u olaga, ou te maua ai le faamoemoe tele e iloa ai o le olaga faaletino ua na o se vaega itiiti o le fuafuaga a le Tama Faalelagi mo au. Ou te faia, aoao, ma avea ma tagata sili atu nai lo le mea ua ou i ai nei ona o le meaalofa paia o le olaga ua Ia tuuina mai ia te au e avea ma Ona alo. Ou te matua faafetai lava ona sa Ia ofoina mai Lona Alo pele o lo’u Faaola ma sa Ia faatagaina a’u e filifili e ulu atu i le olaga faitino ia avea e faapei o Ia ma toe foi atu i le aiga.

Po o le a lava le mea e tauai mai e le lalolagi ia te oe, ou te faamoemoe tou te manatua pea po o ai moni oe. O lena upumoni o le a tuuina atu ia te oe le mana e fetaiai ai ma soo se mea e oo mai i lou ala.

E pei lava ona faafofoga mai le Atua ia te a’u i lo’u taimi o le atuatuvale, ou te iloa e faafofoga ma alofa foi o Ia ia te oe.