Mo Tama o Fanau Laiti
Mea e 5 e Tatau Ona Iloa e Tama Fou Uma
E le faigofie le avea ma se tama. Ae ua tuuina mai e le Tama Faalelagi ia i tatou le tele o meafaigaluega e fesoasoani ai i le suiga.
Sa ou lagonaina le tele o lagona ao ou sauniuni e avea ma se tamā.
Sa ou le mautonu, fefe, ma sili atu nai lo sina fiailoa teisi e uiga i le tulaga o le a iu ai mea uma. Ina ua iu ina fanau mai lo ma atalii, sa ou te’i ma maofa i le tele o lo’u alofa na lagonaina mo lenei tamaitiiti fou.
O le avea ma se tamā sa lei faigofie. O le tulaga faamatua e faigata. Ae ua tatou iloa e ala ia Iesu Keriso, e mafai ai ona faamamaina a tatou avega uma. Faatasi ai ma lena mea i le mafaufau, pe o oe o se tama fou po o se tama faavaitaimi, o mataupu faavae nei e lima o le talalelei e fesoasoani ia te oe i le ala o le tulaga faatama.
1. O le Atua o lou Tama Faalelagi, ma o Ia foi o le Tama o lou atalii/afafine.
Atonu o le a e manao e fai mea uma e te mafaia e puipuia ma alofa ai i lau tamaitiiti. O se lagona matagofie (ma e fai sina atuatuvale)! Ae e mafai ona e mautinoa e finagalo foi le Tama Faalelagi i le mea sili mo lau tamaitiiti ma o le a fesoasoani ia te oe a o e liliu atu ia te Ia.
O se lagona ina a matagofie le ogatusa ma lo tatou Tama Faalelagi!
2. A o e ositaulaga, o le a e maua le olioli.
O le tulaga faatama o le ala lea i nisi o olioli silisili o le a tatou oo i ai i lenei olaga. E manaomia ai foi le ositaulaga.
"Mo alii, o le tulaga faatama e faailoa atu ai i tatou i o tatou lava vaivaiga ma lo tatou manaomia ona alualu i luma," na aoao mai ai Peresitene D. Todd Christofferson, Fesoasoani Lua i le Au Peresitene Sili. "O le tulaga faatama e manaomia ai le ositaulaga, ae o se punavai o le faamalieina e le mafaatusalia, e oo lava i le olioli. … Na fetalai Iesu, ’E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo’ [Ioane15:13]. E faaalia e tama lena alofa a o latou tuuina atu o latou ola i lea aso ma lea aso, ma galulue i le galuega ma lagolago o latou aiga."
3. E galulue faatasi tamā ma a latou ava.
Na aoao mai Elder Ulisses Soares o le Korama a Aposetolo e Toasefululua: "O le faafaileleina ma le pulefaamalumalu e fesootai ma fesiliai ai tiutetauave, o lona uiga o tina ma tama ’e ao ona fesoasoani le tasi i le isi o se paaga tutusa’ ma faasoa atu se taitaiga paleni i lo latou aiga."
E manaomia ona tatou lotogatasi ma a tatou ava i mea uma tatou te faia, aemaise lava i le tausiga ma le faafaileleina o o tatou aiga. E leai se tasi o le paaga e itiiti ifo pe sili atu nai lo le isi; e tatau ona tatou tutusa. I se isi faaupuga, e le o tuua na o oe!
4. O le perisitua e mafai ona faamanuia ai lou aiga.
Na aoao mai Peresitene Harold B. Lee (1899–1973): "E leai se taimi o le a sili ai ona matagofie le mana o le perisitua, lea o loo e umia, nai lo se taimi e i ai se faafitauli i lou aiga, se ma’i tuga, po o se faaiuga maoae e tatau ona faia. … Ua i ai i le mana o le perisitua, o le mana lea o le Atua Silisili Ese, o le mana lea e faatino ai vavega pe afai e finagalo ai le Alii, ae ina ia mafai ona tatou faaaoga lena perisitua, e tatau ona tatou agavaa e faaaoga. O se le malamalama i lenei mataupu faavae o se le maua lea o faamanuiaga o le umia o lena perisitua maoae."
Ua tuuina mai ia i tatou le perisitua a le Atua ina ia manuia ai i latou o siomia i tatou, aemaise lava o o tatou lava aiga. Fai le mea sili e te mafaia ina ia agavaa ai mo lena pule o le perisitua. Faaaoga e faamanuia ai olaga o lou toalua ma lau fanau.
5. O le a faalautele e le Tama Faalelagi au taumafaiga.
E mafai ona faigofie ona lagona e faapea, e le o lava mea o loo e faia mo lou aiga. Sa saunoa atu Peresitene Christofferson i tama, ma faapea atu: "Ou te iloa e te moomoo maimau pe ana o oe o se tama e sili atu ona atoatoa. Ou te iloa maimau pe ana faapea ou te faapena. E ui lava i o tatou tapulaa, ia tatou fetaomi atu i luma. Ia tatou faataatia ese manatu faateleina o le tagata lava ia ma le saolotoga i aganuu o aso nei ma mafaufau muamua i le fiafia ma le soifua manuia o isi. E mautinoa lava, e ui lava i o tatou le atoatoa, o le a faalautele i tatou e lo tatou Tama Faalelagi ma faia a tatou taumafaiga faatauvaa ia fua mai."
Ia talitonu o le a faia e le Atua ni mea e sili atu mai ia te oe nai lo le mea e mafai ona e faia mo oe lava ia.
Uso a tama, e alofa le Atua ia te outou. E alofa o Ia i lou aiga. O le a Ia tausia oe a o e sailia Lana fesoasoani, avea Iesu Keriso ma faavae o lou aiga, ma faia le mea sili e taitai ai lou aiga i le alofa ma le amiotonu.