Mai le AM Faalevaiaso
3 Fesili Sa Ia te A’u e Uiga i le Ekalesia o se Tagata Liliu Mai (ma le Auala na Fesoasoani ai Lo’u Faasinomaga Paia e Tali Ai)
E alala le tusitala i Toronto, Ontario, Kanata.
O le i ai o ni fesili e le na o se mea lea e aafia ai tagata fou liliu mai—o se vaega o le fausiaina o la’u molimau i lo’u olaga atoa.
O le mauaina o la’u molimau sa pei lava o le tuufaatasia o se paso.
Ina ua ou matauina mo le taimi muamua se uo i le aoga maualuga e le inu ava malosi pe ulaula ma sa ou aoao ai e uiga i le Upu o le Poto, sa ou maua ai se fasi paso se tasi. Ina ua ou faitau i le Tusi a Mamona, aoao e uiga Iosefa Samita, ma taliaina sa ou manaomia se Faaola, sa ou aoina mai nisi fasi vaega se tele.
Ae i le taimi lava foi lea, o le tele o vaega na ou mauaina, o le tele foi lena o lo’u iloaina o le tele o vaega na ou misia. Ou te maua tali i a’u fesili, ae o na tali e masani ona aumaia ai nisi fesili. O nisi o nei fesili sa faigofie ma e mafai ona taliina e faifeautalai, ae o isi sa manaomia ai se taimi tele ma suesuega.
O loo i ai pea a’u fesili—ou te manatu o le a i ai lava pea. Ae ua ou mauaina se faavae ou te mauaa ai a o ou faamalosia la’u molimau ma faaauau pea ona aoao mai se nofoaga o le faatuatua:
O lo’u faasinomaga paia.
O fesili nei e tolu sa ia te au e uiga i le talalelei na fesoasoani lo’u faasinomaga paia e taliina:
1. E Mafai Faapefea Ona Ou Lafoa’i ia Agasala ua Tuanai?
Ina ua ou aoao e uiga i Le Ekalesia a Iesu Keriso o le Au Paia o Aso e Gata Ai, sa ou mafaufau pe faapefea ona ou lafoai’a mea mai lo’u tuanai. A o ou aoao atili e uiga i tulaga faatonuina o le talalelei, sa amata ona ou malamalama o le ala sa ou ola ai muamua sa le’i ogatusa ma aoaoga a Iesu Keriso.
Ae a o ou aoao e uiga i le alofa o le Atua mo au, o Lona atalii/afafine, sa ou lagona e mafai ona ou le toe popole i agasala ua tuanai. Ua tatou aoao i le Isaia 1:18 e faapea "e ui lava ina pei o ofu mumu a outou agasala, e sisina ia e pei o le kiona."
Sa ou fiafia i le aoaoina ona o lo’u Faaola, sa le manaomia ai ona ou toe taofiofi i a’u agasala. E mafai ona ou salamo, liliu atu ia te Ia, ma tuu i lalo lena avega. Ma o le upumoni aupito sili lena ona faamalolo ma ofoofogia ua ou faalogo i ai.
2. O Le A La’u Matafaioi i le Faapotopotoina o Isaraelu?
Ae latou te lei siitia atu i Kanata, o lo’u aiga sa omai mai Maketonia. Sa ou toe foi atu i Maketonia e nonofo ma lo’u tama mo se tausaga ma le afa ina ua uma ona ou papatiso. Ae ou te lei siitia atu, ou te lei malamalama atoatoa po o le a le faapotopotoina o Isaraelu po o le a foi lona uiga ina ua faamalamalama mai e lo’u faamanuiaga faapeteriaka lo’u gafa i le aiga o Isaraelu.
Ae a o amata ona ou auai i le lotu i Maketonia ma ou iloa ai tagata iina, sa ou mauaina faafia le uunaiga e silafia ma alofa le Atua i na tagata. O lenei atunuu laitiiti, lea sa toalaiti ma mamao ai tagata o le Ekalesia, sa matuai taua lava ia te Ia.
Sa amata ona ou maua se molimau i upu a Peresitene Russell M. Nelson (1924–2025): "O le upega o le talalelei e faapotopoto ai Isaraelu ua faataapeapeina e lautele. O loo i ai se avanoa mo tagata taitoatasi o le a taliaina atoatoa le talalelei a Iesu Keriso."
Ma ina ua uma ona papatisoina sa’u uo i Maketonia, sa ou malamalama i le olioli ofoofogia lea e sau mai le faasoaina atu o le talalelei ma le faapotopotoina o Isaraelu. Sa pei ua o mai faatasi mea uma a o amata ona ou vaai i lo’u gafa i le aiga o Isaraelu o se faasinomaga manaia ma matagofie o le a fesoasoani ia te au e faaauau ai pea ona faasoa atu le talalelei.
3. Ae Faapefea Pe Afai e Faaauau Pea Ona I Ai Ni A’u Fesili?
Ua ou maua tali i le tele o a’u fesili—ae le o fesili uma.
Talu ai nei, a o ou i ai i le malumalu ma mafaufau e uiga i lo’u olaga, sa le mafai ona ou taofia le manatu tiga na oso ae’ i lo’u mafaufau: "Maimau pe ana mafai ona i ai lo’u tina iinei ma a’u."
E tele a’u fesili e uiga i le avea ma tagata e toatasi o le Ekalesia i lo’u aiga. O le faamauina i lo’u aiga o se tasi lea o faananauga loloto o lo’u loto, ma ou te le iloa pe o le a tupu i lenei olaga—pe o le a ou maua tali uma i a’u fesili.
Ae ou te iloa o au o se afafine o le Tama Faalelagi o le e i ai se sootaga paia ia te Ia. Ua aoao mai Peresitene Nelson e faapea "o i latou uma o e ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa."
A o faaauau pea ona ou maua ni fasi paso fou o la’u molimau, ua faamafanafanaina a’u i le malamalama e faapea, o le avea ai ma se atalii/afafine o le Atua ma le i ai o ni fesili e le mafai ona tutupu faatasi. O fesili e manaomia mo lo’u tuputupu ae o se soo o Keriso. Ma ou te iloa o le i ai o ni fesili e le na o se mea lea e aafia ai tagata fou liliu mai—o se vaega o le atinaega o la’u molimau i lo’u olaga atoa.
A o tatou galulue i a tatou fesili faigata, e mafai ona tatou faalagolago i se Faaola e silafia fesili maaleale o o tatou loto. Ona o la tatou tupuaga paia, ua tatou maua ai le avanoa ia te Ia ma le Tama Faalelagi ma lo La’ua malosi.