Mai le AM Faalevaiaso
Fefe e Faasoa Atu Lau Molimau? O Auala e 3 e Faafaigofie ai e le Eseta ona Molimau atu ia Keriso
O le vaitau o le Eseta ua fesoasoani ia te au e faasoa atu ai la’u molimau i isi, ma e mafai foi ona fesoasoani ia te oe.
"O oe o se Mamona, a ea? O le a lena mea?"
O le taimi muamua na fesili mai ai se tasi ia te au e uiga i le avea ma se tagata O Le Ekalesia a Iesu Keriso o le Au Paia o Aso e Gata Ai, o le taimi lea i se pati a le aoga tulagalua. Sa fai si ou matamuli i le faia o ni uo, ma o tapuaiga e mafai ona avea ma se mataupu maaleale i le mea sa ou nofo ai.
O lea sa ou panupanu teisi atu ai e uiga i perofeta ma aiga e faavavau, ma i le faaiuga o le pati, sa ou faatopetope atu i le fale i le vave e mafai ai.
Sa ou lagona le le fiafia ia te au lava—sa ou toilalo e faamatalaina atu le taua o le talalelei ia te au.
A o ou mafaufau pea e uiga i la’u molimau, sa ou iloa ai o le Toetu o Iesu Keriso o le faavae lea o mea uma ou te fiafia i ai e uiga i le talalelei. O le faasoaina atu o lena upumoni e mafai ona aveesea ai le uunaiga i le lumanai pe a ou manao e faasoa atu lo’u faatuatuaga.
Ma o lenei upumoni faavae o le uiga atoa lea o le Eseta—o Iesu Keriso, Lona Toetu, ma le uiga o Lona mana togiola mo i tatou. Mo soo se tasi na lagonaina le matamuli e uiga i le faasoaina atu o a latou molimau, e mafai e le vaitau o le Eseta ona faafaigofie le faasoaina atu o upumoni! O ni nai mea nei e mafai ona e faia:
1. Talanoa e uiga ia Keriso
E ui e le o tagata uma e faamanatuina le Eseta, ae o le toatele o tagata e malamalama i lona taua mo i latou o e talitonu ia Iesu Keriso. Ma o le auala sili e mafai ona tatou faasoa atu ai lo tatou faatuatua ia te Ia e na o le talanoa lava e uiga ia te Ia. "Ua matou tautalatala e uiga ia Keriso, ua matou olioli ia Keriso, ua matou talai atu Keriso, [ma] ua matou vavalo atu foi ia Keriso" (2 Nifae 25:26).
O le talanoa e uiga ia Keriso e le faapea e tatau ona faigata. Mo se faataitaiga, afai e fesili atu se uo pe faapefea ona e faaaluina lau Eseta, o le avanoa sili lea mo oe e faasoa atu ai e uiga i le tele o le uiga o le aso malolo ia te oe. Tau lava o le fai atu o se mea e pei o le "O le Eseta e aumaia ai ia te au i taimi uma le faamoemoe o le a mafai ona ou toe vaai i e pele ia te au" e mafai ona faaosofia ai se talanoaga faalenatura e uiga i le ata o le faaolataga po o aiga e faavavau.
Afai e ta’ua e se tasi ni faafitauli o loo tutupu i le lalolagi, o se tali faigofie e pei o le "O le mafuaaga lena ou te fiafia ai i le Eseta— e aumaia ai ia te au le filemu tele i le iloaina o le a toe afio mai Iesu Keriso" e mafai ona tatala ai le faitotoa i se talanoaga e uiga i lou faatuatua.
Afai e asiasi atu se tasi i lou fale ma matau soo se teuga o le Eseta o i ai i lou fale e faasino atu i le Faaola, ta’u atu ia i latou e uiga ia te Ia. Ma aua le manatu faatauvaa i le mana o le faasoa atu o lou faatuatua ia Keriso i luga o ala o faasalalauga faaagafesootai. (O faitotoa a le Ekalesia e i ai anotusi ofoofogia e toetuu i luga ma faasoa atu!)
2. Fesootai e Ala i Tu ma Aga Masani
O ni aganuu eseese e fiafia i le Eseta, o se taimi sili lea e fesootai ai ma isi e ala i se alofa fefaasoaai o le Faaola. Na uunaia talu ai nei i tatou e le Au Peresitene Sili e faia lenei mea e ala i le "[faatuina] o tu ma aga masani o le Eseta i lo tatou lalolagi atoa."
E mafai ona e faia lenei mea e ala i le fesili atu i isi pe faapefea ona latou manatua Keriso i le taimi o le Eseta po o le a le uiga o lenei taimi o le tausaga ia i latou. Ona mafaufau lea po o a tu masani ua uma ona e faaaogaina e faatotonugalemu ai o Ia i taimi o au lava faafiafiaga ma pe mafai faapefea ona e faasoa atu i isi soo o Keriso.
Mo se faataitaiga, i lo’u aiga, matou te auai i taimi uma i le aufaipese a le uarota i le taimi o le Eseta e faatino viiga e uiga i le Toetu o Keriso. O se tasi lenei o tu masani e sili ona ou fiafia i ai, ma o se mea faigofie e talanoa e uiga i ai i isi tagata.
3. Faasino Atu i Ana Molimau Soifua
O loo molimau mai perofeta ma aposetolo o i ai nei e uiga ia Keriso. O le faasoaina atu o a latou aoaoga faigofie ma loloto e uiga i le Eseta e mafai ona fesoasoani ia i tatou e faamalamalama atu ai lo tatou faatuatua ia i latou e le tele ni mea latou te iloa e uiga i ai.
Na molimau Peresitene Dallin H. Oaks: "E mafai ona tatou faamanatuina le moni o le Toetu i lenei vaitau o le Eseta. O lenei mea tatou te maua ai le vaaiga ma le malosi e onosaia ai luitau faaletino o loo feagai ma i tatou taitoatasi ma i latou tatou te alolofa i ai."
O le faasino atu o isi i o tatou perofeta soifua ma a latou aoaoga e mafai ona fesoasoani ia i latou e malamalama ai i lo tatou talitonuga i faaaliga i ona po nei lea e sau mai se Togiola toetu soifua. O le Eseta o le taimi sili lea e faasoa atu ai e uiga i perofeta soifua ma le Keriso soifua.
A o ou vaavaai mo nei ituaiga o avanoa i le Eseta, ua mafai ona tele atu a’u talanoaga e uiga i le talalelei ma fiafia i ai. Ua fesoasoani lenei mea ia te au e faatoilalo ai le tele o le matamuli sa ou oo i ai a o ou laitiiti, ma sa mafai ona ou fesootai ma tagata i se tulaga loloto atu a o matou aoao mai le tasi ma le isi.
O lenei Eseta, pe o e pese faatasi ma se aufaipese, faasoa atu se mau, pe na o le taliina o se fesili a se uo, manatua—o loo e molimau atu i le upumoni aupito taua o loo i ai: o loo soifua Iesu Keriso.