Ou te Talitonu
Sa Toso Ese A’u e le Maasiasi. Na Toe Aumaia A’u e le Alofa o le Atua
O le maasiasi i au filifiliga le lelei na amata lemu ona faalavelave i lo’u gafatia ona lagonaina le alofa o le Atua. Ae peitai, sa laveaiina a’u e Lona alofa.
Sefeina o Le Mea Na Leiloa, saunia e Michael Malm
Sa 14 ou tausaga i le taimi na tetea ai o’u matua, ma o le vaai atu i le vavaeina o lo’u aiga o se mea e tiga ai le loto. Sa ou nofo ma lo’u tama, ma e ui ina sa ia faia le mea sili na te mafaia e tausi ai a’u, ae sa ou tauivi lava e fetuunai. Sa ou atiaeina le faanoanoa loloto ma le popole ma lagonaina ma le faamaoni le tuuatoatasi.
I se tasi aso sa ou mafaufau ai pe o le a lelei atu le lalolagi e aunoa ma au. Ona ou faalogoina lea o se leo i lo’u ulu o faapea mai, "E taua oe ia te au. Ou te alofa ia te oe."
Ua ou iloa nei ua faasoa mai e le Agaga lena savali ia te au mai le Tama Faalelagi. O lona alofa e le i’u na tosoina ai a’u mai lo’u taimi aupito maualalo, ma tuuina mai ai ia te a’u le faamoemoe.
I se masina mulimuli ane, na tuitui mai ai faifeautalai i lo ma faitotoa. A o la aoaoina a’u ma lo’u tama, sa iu ina ou malamalama o loo i ai so’u faamoemoega iinei.
Sa ou aoaoina o meaalofa matagofie i lo’u olaga e pogai mai le alofa o le Atua mo au, ma sa ou manao e faaali atu ou te alofa foi ia te Ia. O lea na ma papatiso ai ma lo’u tama.
Ou te lei manatu e i ai se mea e mafai ona faalavelave i lo’u tomai e lagona ai le alofa o le Atua, ae sa ou sese.
Laa Ese Mai le Ala
I le aluga o taimi, ina ua faigata le olaga, sa ou faia ni filifiliga leaga. Ou te lei mulimuli i le Upu o le Poto, ma sa ou siomia au lava i ni faatosinaga le lelei. Sa amata ona lofituina lo’u maasiasi i lo’u gafatia e lagona le alofa o le Atua mo a’u, o lea sa ou taumamao ai mai le Ekalesia. Sa le toe ola foi lo’u tama i le talalelei.
Ou te mafaufau i le faatuatua i nisi taimi, ae sa ou matuai fefe lava i mea o le a mafaufau i ai tagata—ma le Atua—pe afai ou te toe foi i le lotu. O lea sa ou faaauau ai i le ala sa ou i ai.
Mulimuli ane, sa ma siitia atu ma lo’u tama i se isi atunuu. Sa leai ni o matou aiga po o ni uo, leai se galuega, leai se tupe, ma leai se taavale. Ae o le mea e laki ai, sa matou feiloai i tagata o le Ekalesia i le lotoifale, ma sa latou tausia i ma’ua. Sa latou alolofa ia i ma’ua e pei ona alofa mai Iesu Keriso ia i tatou. Sa ou iloaina e ala atu ia i latou e alofa pea le Tama Faalelagi ia te au ma e finagalo o Ia ou te toe foi mai.
Ina ua valaaulia i ma’ua e nei uo e toe foi mai i le lotu, sa ma taliaina.
Ua Toe Foi Mai se Atalii Faamaumau Oa
Sa ou fefe nei faamasinoina a’u e isi mo a’u filifiliga. Ae ina ua ou toe foi i le lotu mo le taimi muamua, sa agalelei tagata uma.
Sa ou lagona le pei o le atalii faamaumau oa, ua toe foi atu i lona tama ma ta’uta’u atu ana agasala (tagai Luka 15:18–21). Ma e pei lava o le atalii faamaumau oa, sa ou lagonaina le alofa o lo’u Tama, o le na faafeiloaia a’u ma toe faamanatuina lo’u toe foi mai (tagai Luka 15:20–24). Sa ou toe foi mai ona ou te alofa ia te Ia, ma sa Ia toe faafeiloaia au aua e alofa o Ia ia te au.
Sa ou saunia e faia ni suiga i le ala na ou ola ai i lo’u olaga.
Ina ua uma ona ou salamo ma toe maua lo’u faavae i le talalelei, sa ou saunia e auauna atu i se misiona. Sa i ai ni a’u uo sa le mautonu i a’u filifiliga, ae sa ou naunau e tumau i se ala fou.
A o ou i ai i le nofoaga autu mo le aoaoina o faifeautalai, sa ou iloa ai o na uo e toalua sa o faatasi i se pati ma na maliu faafuasei i se faalavelave tau taavale. Sa nutimomoia lo’u loto ma na faafuasei lava ona ou iloa semanu e muta lo’u olaga pe ana ou le suia le ala sa ou ola ai. O le manatuaina o le alofa o le Atua na toe laveaiina ai au.
Taliaina o le Alofa o le Atua
Ua tele mea ua ou oo i ai i lo’u olaga atoa, ae o le lesona aupito sili ona taua ua ou aoaoina e faapea, o taimi uma lava e liliu mai ai ki i lo’u olaga, o le faailoaina o le alofa atoatoa o le Atua mo a’u ua faasaoina ai a’u mai le tele o puapuaga.
O nisi taimi, pe a e tilotilo i le faaata, e faigofie ona e tilotilo ifo ia te oe lava ma fai atu e le lava lou lelei—e leai se isi mea e sili atu nai lo au mea sese e sili ona leaga. Ae e le o le ala lena e silafia ai oe e le Atua.
Ua faamanatu mai e Peresitene D. Todd Christofferson, Fesoasoani Lua i le Au Peresitene Sili: "Ona e alolofa [le Tama Faalelagi ma Iesu Keriso] ia te oe, La te le mananao e tuua oe ’e pei lava ona e i ai.’ Ona La te alolofa ia te oe, La te finagalo ia e maua le olioli ma le manuia. Ona La te alolofa ia te oe, La te finagalo ia e salamo aua o le ala lena i le fiafia. Ae o lau lava filifiliga—Latou te faamamaluina lou faitalia. E tatau ona e filifili e alofa ia i La’ua, e auauna atu ia i La’ua, e tausi a La’ua poloaiga. Ona mafai lea ona latou faamanuiaina atili oe faapea foi ma le alofa ia te oe ."
Ia malamalama e alofa tele le Tama Faalelagi ia te oe lea na Ia auina mai ai Lona Alo, o Iesu Keriso, e togiola mo au agasala, ma mafai ai ona e toe foi atu ia te Ia. E le finagalo o Ia e te lafi mai ia te Ia; E finagalo o Ia ia e toe foi atu ia te Ia.
Afai ua e se ese, e le o tuai tele le taliaina o le alofa o loo ia te Ia mo oe. E le o tuai tele ona toe foi mai, ma a e faia, o le a Latou faamanatuina e pei lava o le leoleo mamoe alofa, ma alaga atu, "Ia tatou olioli faatasi; aua ua ou maua la’u mamoe na leiloa" (Luka 15:6).