Mai le AM Faalevaiaso
5 Manatu Faigofie mo le Saunia Faaleagaga mo le Konafesi Aoao
Atiina ae se siosiomaga e mafai ona afio ai le Agaga, ma vaavaai i le ala na te suia ai lou aafiaga o le konafesi!
Ou te matuai fiafia lava i taimi uma e toe oo mai ai le konafesi aoao. Ou te fiafia i le auala e fesoasoani ai savali na faasoa mai i le taimi o le konafesi ou te aoao atili ai e uiga i le Faaola—aemaise lava pe a ogatusa ma le Eseta. Ae e foliga mai e oso mai lava ia te a’u i taimi uma.
E le aunoa ona valaaulia i tatou e perofeta ma aposetolo e saunia faaleagaga mo le konafesi aoao. Na fesili Elder Dieter F. Uchtdorf o le Korama a Aposetolo e Toasefululua: "O le a se mea e ono tupu pe afai o i tatou o tagata faalogologo e faatutusa a tatou sauniuniga ma sauniuniga a failauga? Mata e faapefea ona ese la tatou faiga o le konafesi aoao pe afai tatou te vaai i le konafesi o se avanoa e maua ai savali mai le Alii Lava Ia?"
Ou te taumafai lava i taimi uma e saunia faaleagaga e faalogologo atu i perofeta soifua, ae toetoe lava a aunoa ma le toilalo, o taimi uma lava ou te oo ai i le faaiuga o le vaiaso o le konafesi, ou te mafaufau ai ia te au lava ia, "Oka, sa tatau ona ou faia nisi mea se tele e saunia ai a’u lava mo le tafe mai o upu faagaeetia lea o le a taia ai a’u."
O lo’u faafitauli o le, ou te faafaigataina sauniuniga mo le konafesi lea ou te lagona ai le lofituina, le maua ai le uunaiga, ma tolopo ai seia ai oo i le sekone mulimuli. Ae ua ou iloaina o sauniuniga e le faapea e tatau ona soona faia—e na o sina faamoemoega e manaomia ai.
O Le Galuega Faaleagaga e Faalogo ai i le Agaga
E fesoasoani ai ou te manatua e finagalo le Tama Faalelagi ma Iesu Keriso e talanoa mai ia te au, ae afai ou te le o ogatusa ma le Agaga, o le a faigata atu ona logona i La’ua. O lea la, o le valaaulia o le Agaga Paia i lo’u olaga o se tasi lea o auala sili ona lelei e saunia ai e maua le malamalama, atamai, ma le poto atili mai le lagi.
Na valaaulia i tatou e Peresitene Russell M. Nelson (1924–2025) e "filifili e fai le galuega faaleagaga e manaomia e olioli ai i le meaalofa o le Agaga Paia ma logona soo ai ma le manino atili le leo o le Agaga."
O lenei galuega faaleagaga e amata i le fatuina o se siosiomaga e mafai ona afio ai le Agaga. Ma e le faapea e tatau ona faigata!
O ni manatu faigofie nei se lima e saunia ai lou loto ma le mafaufau mo le faaiuga o le vaiaso o le konafesi aoao:
1. Toeiloilo Konafesi Talu ai
Talanoaina lauga o le konafesi ua tuanai ma uo ma aiga pe toe iloilo au lava tusigamanatu. Mafaufau i musumusuga na e mauaina muamua ma pe na faapefea e le faatinoina o lena mea ona faamanuiaina ai lou olaga.
O le toe tepa i tua i o tatou aafiaga ua tuanai ma le Agaga Paia, tatou te masani atili ai i le ala e saunoa mai ai o Ia ia i tatou, ma e mafai ona tatou saunia e faalogo ia te Ia pe a toe saunoa mai o Ia ia i tatou.
2. Faalogologo i Musika Faagaeetia
Faalogologo i musika faagaeetia i vaiaso e tau atu i le konafesi. E mafai ona avea o se musika mai le tusipese, o le Aufaipese a le Tapeneko i le Lotoa o le Malumalu, Strive to Be (o le alaleo aloaia faamusika mo soo talavou o Keriso), po o soo se mea e fesoasoani e te lagona ai le latalata atili atu i le Atua.
3. Ia e Iloa Atu Au Fesili
Tusi i lalo au fesili ma tuu i se mea e te iloa atu ai mo aso po o vaiaso e tau atu i le konafesi. E mafai ona e tuuina i luga o le faaata o le faletaele, le pusaisa, papatua o lau telefoni, i soo se mea o le a e vaai soo i ai.
O lenei mea e mafai ona taitai atu ai i le faateleina o le mafaufau loloto ma e mafai ona fesoasoani ia te oe e talia atili ai savali o le a faasoa mai i le taimi o le konafesi.
4. Tatalo ia Iloa Po o A Fesili e Fai Atu
Afai e te le lagonaina e i ai ni au fesili, tatalo ma ole atu i le Atua e fesoasoani ia te oe ia iloa po o a fesili e fai atu. E mafai ona faatatau i soo se mea mai le mafaufau i suiga tetele o le olaga i le faia o suiga laiti i au mausa i aso uma. E mafai ona Ia taiala oe e fai atu ni fesili patino pe tuu atu ia te oe le manao e aoao atili e uiga i se autu o le talalelei a o lei oo mai le konafesi.
E naunau le Tama Faalelagi e taiala i tatou i luma i luga o le ala o feagaiga. O le tatalo mo fesili e fai atu o se tasi lea o auala e mafai ai ona Ia fesoasoani ia i tatou e agai i luma ma faalogo i mea e finagalo o Ia e ta’u mai ia i tatou e ala mai i Ana perofeta ma aposetolo.
5. Vaai i Faataitaiga a Isi
Suesue pe na faapefea ona sailia ma maua e perofeta (ma isi) tali e ala i le Agaga Paia. E mafai ona e suesue i tala faatusi paia, lauga o konafesi, po o faigalotu. Ia gauai atu i tala na maua ai e nei tagata ia tali ma vaai pe na faapefea ona latou saunia i latou lava e maua na tali. Taumafai e faaaoga nisi o a latou metotia i au lava sauniuniga.
Mo se faataitaiga:
-
A o ia fauina le vaa e tusa ai ma faatonuga a le Alii, sa alu atu Nifae i le mauga ma tatalo soo (tagai 1 Nifae 18:3).
-
Na mafaufau loloto Iosefa Samita po o le fea ekalesia e auai ma suesue i tusitusiga paia, e taitai atu ai i le Uluai Faaaliga (tagai i le Iosefa Samita—Talafaasolopito 1:10–11).
-
Sa manao Peresitene Nelson e aoao atili e uiga i le faapotopotoina o Isaraelu, o lea sa ia "suesue ai i le faapotopotoina, tatalo e uiga i ai, taumafa fiafia i mau uma e fesootai i ai, ma ole atu i le Alii ia faateleina [lona] malamalama."
O le faia o lenei mea e mafai ona fesoasoani ia i tatou e maua ai le mafaufau sa’o e maua ai mea ua saunia e le Atua mo i tatou.
E ala i le vaneina ma le sauniaina o se avanoa mo le Agaga Paia, tatou te tatala atu ai i tatou lava e faalogo ma le manino atili i le siufofoga o le Atua. Na folafola mai Elder Dale G. Renlund o le Korama a Aposetolo e Toasefululua, "E mafai ma o le a faaali mai e le Agaga Paia mea uma tatou te manaomia e felelei ai ma faatumauina le saoasaoa i luga o le ala o feagaiga."
I se isi itu, ua sili atu lo’u fiafia mo le konafesi i le taimi nei, ma e le faapea ona ua oo i le taimi o le Eseta. E le mafai ona ou faatali e faataitai nisi o nei manatu ma vaai pe faapefea ona suia e a’u sauniuniga lo’u aafiaga. Vaai pe mafai faapefea ona suia ai foi oe!