O Se Taiala o le Feagaiga Tuai i le Taliaina o le Faasinomaga Paia

Sa i le Amataga le Upu, saunia e Eva Timothy, e mafai ona kopiina mo na o le faaaogaina e le Ekalesia

O le a ou pepelo pe afai ou te fai atu ia te oe ou te lei fesiligia lava la’u matafaioi i le fuafuaga a le Atua.

E mafai faapefea ona ou—lē atoatoa e pei o a’u—e ono ofi i Lana fuafuaga atoatoa? E mafai faapefea ona ou agavaa mo avanoa lona lua e tuuina mai e le Tama Faalelagi ia te au i lea taimi ma lea taimi? E mafai faapefea ona faatuatuaina au e faasoa atu Lona alofa i isi pe a ou tauivi i nisi taimi ia lagonaina e a’u lava ia?

Afai e foliga mai e masani lenei sai o le malaia, e le o tuua na o oe.

O se tasi o togafiti silisili a le fili o le osofaia lea o lo tatou malamalama i le faasinomaga paia. Na aoao mai Elder Brian K. Taylor e faapea, “O lenei taua tele i le faasinomaga paia o loo mumu malosi pea, a o faateteleina pea aupega taufaasese a Satani ua faamoemoe e faaumatia ai lo tatou talitonuga ma le malamalama e uiga i lo tatou sootaga ma le Atua.”

O le mea e laki ai, ua aoao mai le Tama Faalelagi—ma faaauau pea ona aoao atu—Ana fanau e uiga i lo latou taua. Mai lava i le amataga, atonu na taulimaina e tagata i tusitusiga paia nisi o fesili lava e tasi atonu o ia te oe ma a’u i le asō.

A o e suesue i le Feagaiga Tuai i lenei tausaga, e mafai ona e aoao e uiga i lou lava faasinomaga paia e ala i le faaaogaina o aafiaga o tagata i tusitusiga paia i lou lava olaga. Ma atonu o le a e maua tali i se fesili taua tele i le ala:

O ai a’u?

Ua faailoga e Atamu ma Eva le amataga lava o le manaomia e tagata ona malamalama i le faasinomaga paia. Na foafoaina i la’ua e le Tama Faalelagi i Lona lava faatusa, tuu atu ia i la’ua e tausimea i le lalolagi ma meaola uma i ona luga, ma poloaiina i la’ua ia fanafanau ma uluuluola ma faatumuina le lalolagi (tagai i le Mose 2:26–28).

I le avea ai ma se e tupuga mai ia Atamu ma Eva, e mafai ona e faaaogaina nei lava mataupu faavae o le faasinomaga ia te oe lava. O oe o se atalii/afafine agaga moni o le Atua faatasi ai ma le tiutetauave paia e galue o se tausimea atamai ma fausia se aiga e faavavau.

Ina ua ai e Atamu ma Eva le fua o le laau e iloa ai le lelei ma le leaga, sa oo ina auina ese atu i laua e le Alii mai le Faatoaga o Etena i le lalolagi. E ui ina sa vavaeeseina i la’ua mai le afioaga o le Tama Faalelagi, i le faaletino ma le faaleagaga, ae sa Ia saunia se Faaola e fesoasoani ia i la’ua e faatoilalo le oti faaletino ma le faaleagaga e ala i le Togiola a Iesu Keriso.

E pei o Atamu ma Eva, o lou taua e maoa’e i le silafaga a le Atua (tagai i le MF&F 18:10).

O le tala a Aperaamo e fesootai tonu lava i le faasinomaga paia. Na faia e le Alii se folafolaga o le taunuuga e faavavau ia Aperaamo:

“Ou te faia oe ma nuu tele, Ou te faamanuia foi oe, ou te matua faamamaluina lou igoa, e manuia foi oe:

“Ou te faamanuia atu ia te i latou o e faamanuia ia te oe, ou te faamalaia atu foi ia te i latou o e fetuu ia te oe: e manuia foi ia te oe o aiga uma o le lalolagi” (Kenese 12:2–3).

Ina ua mavae le tele o tausaga o faatalitali i le faatuatua, sa faamanuiaina Aperaamo ma Sara i le fanau mai o le la atalii, o Isaako. Ona poloaiina lea e le Atua ia Aperaamo e ositaulaga Isaako o “o se faatusa o le Atua ma lona Atalii Pele e Toatasi” (Iakopo 4:5). Ina ua faaali atu e Aperaamo sa naunau o ia e faia se osigataulaga faapena, sa taofia o ia e se agelu a le Alii.

Tatou te faitauina:

“O loo faapea a Ieova, ua ou tauto a’u i a te a’u, ua e faia lava lenei mea, ua e le taofia lou atalii, o lou atalii e toatasi:

“O le mea lea Ou te matua faamanuia ai ia te oe, ma ou matua faatoateleina lava lau fanau e pei o fetu o le lagi, e pei o le oneone foi i le matafaga; e maua foi e lau fanau faitotoa o e ita ia i latou;

“O lau fanau e manuia ai atunuu uma lava o le lalolagi; aua ua e usiusitai i la’u upu” (Kenese 22:16–18).

O lenei tala mamana ua aoao mai ai o i latou uma o e osia ma tausia feagaiga ma le Tama Faalelagi e mafai ona maua faamanuiaga folafolaina i fanau a Aperaamo. I le avea ai ma se tamaitiiti o le feagaiga, e mafai ona e maua faamanuiaga folafolaina o le feagaiga faaAperaamo e ala i le pipiimau i folafolaga e te osia ma le Alii e ala i feagaiga o le papatisoga po o le malumalu.

O Akara—auauna a Sara ma le tina o Isamaeli—ua aoaoina lo tatou gafatia maoae mo le maufetuunai. Ina ua mavae le fanau mai o Isaako, o le atalii o Aperaamo ma Sara, sa faateaeseina ai Akara ma Isamaeli i le toafa (tagai i le Kenese 21:9–14).

O le vaaia o lona faanoanoa ma aioiga faatauanau mo le soifuaga o Isamaeli, na auina mai ai e le Alii se agelu e faamafanafana ia te ia: “Aua e te fefe; aua ua faafofogaina e le Atua le leo o le tama i le mea o i ai o ia. Ina tulai ia, ina tago i le tama, ma talitali a’e ia te ia i ou lima; aua ou te fai o ia ma tupuga o le nuu tele” (Kenese 21:17–18).

E tusa lava pe na lagona e Akara le tuuatoatasi atoa i le toafa, e lei tuulafoaiina lava o ia e le Tama Faalelagi. Sa puipuia o ia ma tauia mo lona faatuatua ma le filiga.

E pei o Akara, atonu e te lagona e pei o loo e se ese na o oe lava i se mea tuufua. Ae e taua tele oe i lou Tama Faalelagi. Atonu e te se ese mai le mea tuufua mo se vaitau, ae Na te lei faagaloina oe. O loo Ia saunia oe e faia mea tetele mo le fausiaina o Lona malo.

Sa valaauina Mose e le Tama Faalelagi e faasaoloto Isaraelu mai le nofopologa i Aikupito. Sa ia faatinoina se faasologa o vavega mamana na taitai atu ai i lo latou sosola ese mai ai (tagai i le Esoto 7; 14).

E ui ina faamanuiaina i lona valaauga, ae sa le o taimi uma na talitonu ai Mose i lona tomai e fai e pei ona poloaiina ai o ia e le Tama Faalelagi. Ina ua faaalia e Mose ona lagona o le le atoatoa, sa tali atu le Alii, “Ou te ia te oe lava, o lenei foi le faailoga ia te oe ua ou auina atu oe, pe a e aumai le nuu mai Aikupito, tou te auauna ai i le Atua i lenei mauga” (Esoto 3:12).

Sa opoina e Mose lona faasinomaga o se atalii o le Atua ma maua le mana o le Tama Faalelagi e faatino ai Ana vavega. E pei o Mose, e mafai ona e maua le mana e faia ai le galuega a le Atua a o e taliaina lau sootaga e faavavau ma le Tama Faalelagi.

O ai la oe?

O le taimi lenei mo oe e iloa ai le tali mo oe lava ia.

Suesue i tusitusiga paia mo tali i au fesili, ma o le a e mauaina. E finagalo le Tama Faalelagi ia e malamalama tonu po o ai oe ina ia mafai ona e alofa ia te oe lava e pei ona Ia alofa ia te oe.

O le malamalama i lou faasinomaga paia e faavavau o loo i ai tonu lava i le tulimanu—o le a la le mea o loo e faatalitali i ai?