Faaaogaina o le Feagaiga Tuai i Lou Olaga
O Tala e 2 mai le Esoto o loo Faaalia ai le Auala e Mafai Ai e le Atua ona Fesoasoani ia te Oe e Faatoilalo Mea Faigata
Aua lava nei galo—o loo e i ai i aao o se Atua o vavega.
O le taimi muamua na uunaia ai au e auauna atu i se misiona, sa ou le talitonu e mafai ona ou faia. Sa ou matamuli lava i taimi uma, ma sa ou lei iloa pe mafai faapefea ona ou faaaluina le 18 masina e amata ai ni talanoaga ma ni tagata ese.
Na faateteleina lena popolevale ina ua valaauina au e auauna atu i se isi gagana.
Ae sa ou auauna atu, ma o le toe tepa i tua, ua ou iloa ai sa lei tuua lava na o au. Sa valaauina au e le Tama Faalelagi, ma sa faatasi o Ia ma a’u i laasaga uma o le ala.
Na faafia ona aoao mai Peresitene Thomas S. Monson (1927–2018): "Pe a tatou i ai i le galuega a le Alii, ua ia i tatou le aia tatau mo le fesoasoani a le Alii. Ia manatua o le ua valaauina e le Alii, e faaagavaa le Alii." Ua faafia ona faamaonia e le Atua le moni o lena mataupu faavae.
A o e feagai ma luitau ma e oo lava i avanoa lelei ae taufaafefe, e mafai foi ona Ia faaagavaaina foi oe—ae afai e te masalosalo pea ia te oe lava po o ou tomai (e pei ona tatou faia uma i nisi taimi), e lua tala mai le tusi o Esoto o loo faaalia ai le auala e mafai ai ona Ia fesoasoani ia te oe e faatoilalo ai mea faigata.
E Tausia e le Atua Ona Tagata
I le Esoto 1 tatou te faitau ai e uiga i ni faatosaga Eperu se toalua, o Sepela ma Pu’a, o e na oo i se tulaga matautia. O lo la tiute o le tausia lea o tamaitai Eperu ma a latou pepe ia saogalemu ma maloloina. O le faatonuga a Farao e fasioti pepe tama Eperu uma na feteenai tonu lava ma o la’ua tulaga faatauaina ma le faatuatuaga, ae o le le usitaia o le faatonuga e mafai ona aveesea ai o la ola.
Ae ui i lea, sa sili atu le "matatau [o Sepela ma Pu’a] i le Atua" (Esoto 1:17) nai lo Farao ma filifili ai e le usitaia le faatonuga. Ma tou te iloa? "Ua agalelei le Atua i e na faatosaga" (Esoto 1:20) ma faasaoina i la’ua uma ma o la’ua auaiga (tagai foi i le fuaiupu e 21).
Ua na o se tasi lenei o faataitaiga o le faataunuuina e le Atua o le folafolaga ua Ia faia i le Isaia: "Aua e te fefe; aua ou te ia te oe: aua le fetepatepai; aua o A’u o lou Atua: Ou te faamalosia oe; e moni, Ou te fesoasoani ia te oe; e moni, ou te taofia oe i lo’u lima taumatau e i ai le amiotonu" (Isaia 41:10).
Pe a e filifili e fai le mea sa’o, ua folafola mai le Atua e faamanuia oe, ma Na te le solia lava se folafolaga. Atonu e le oo mai na faamanuiaga i le taimi tonu tatou te mananao ai, ae o le a oo mai lava.
O Le Atua o se Atua o Vavega
Ina ua valaauina Mose e faasaoloto Isaraelu mai le nofopologa i Aikupito, sa matuai taotaomia o ia i mea faigata. O le mea moni lava, o Aikupito o se tasi o malo sili ona malosi i le lalolagi i lena taimi, ma o le taimi mulimuli na i ai Mose iina, sa solaese o ia mo lona ola o se tagata lafilafi solo!
"O ai ea a’u nei," na ia fesili ai, "ou te alu atu ai ia Farao ma au aumaia le fanauga a Isaraelu mai Aikupito?" (Esoto 3:11).
Ma ana faapea e na o Mose lava o loo faia lenei misiona, ona ioe lea, atonu o le a le toilalo o ia. Ae sa lei tuua na o ia. O lona valaauga na sau mai "se Atua o vavega" (Mamona 9:11) ma le mana e liliu ai se tootoo i se gata, liua vaitafe i le toto, ma vaeluaina ai le Sami Ulaula.
O le tala ia Mose ua na o se tasi lea o faataitaiga o le ala "e le tuuina mai ai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou" (1 Nifae 3:7).
Ua Uma Ona Maua Le Manumalo
Afai e te lagona e pei o loo e feagai ma ou lava tulaga le lelei ma mafaufau pe mafai ona e faatoilaloina, ua saunoa atu Elder Patrick Kearon o le Korama a Aposetolo e Toasefululua ia te oe: "O le tali o le ioe. E mafai ona e sao mai ai. O le mea moni ua uma ona laveaiina oe; ua uma ona faasaoina oe—e le Toatasi na puapuagatia i le mafatiaga tonu lava o loo e puapuagatia ai ma onosaia tiga tonu lava o loo e onosaia. Ua manumalo Iesu i sauaga a lenei lalolagi e tuuina atu ia te oe le mana e le gata ia sao ai ae e i ai se aso, e ala mai ia te Ia, e faatoilalo ma manumalo ai."."
Ona o Iesu Keriso, ua uma ona faatoilaloina ao e le lelei le leaga. E leai se mea e mafai ona suia le mea moni e faapea, na puapuagatia o Ia ma maliu mo oe, ma e leai se mea e mafai ona e oo i ai o le a Ia le malamalama ma iloa le ala e faamalolo ai (tagai i le Alema 7:11–13).
O le toe tepa i tua i taimi na fesoasoani ai le Tama Faalelagi i Ana fanau—e aofia ai ma a’u lava ia—e faamalosia ai lo’u faatuatua o le a Ia toe fesoasoani mai ia te a’u. E le faapea la o le a o ese uma ai luitau, ae o le iloaina o loo ou i ai i aao o se Atua o vavega ua aumaia ai ia te au le talitonuga mautinoa e tatau ona ou mulimuli pea ia te Ia.
E mafai ona e faatoilaloina. E mafai ona e manuia. E mafai ona e ausia mea e finagalo ai le Tama Faalelagi ia te oe. Ona o le filifili e mulimuli ia te Ia, ua ia te oe Lona mana—ma le alofa—i lou itu.