Mai le Misiona
Auala e 4 e Fetuunai ai i Taitai Fou o Misiona
Afai e te faatagaina i latou, e mafai ona avea ou taitai misiona ma ou faufautua alofa ma faatuatuaina i le olaga atoa.
A o ou i ai i le nofoaga autu mo le aoaoina o faifeautalai, sa ou iloa ai o le a vave ona faamaloloina o’u taitai misiona i le lua vaiaso talu ona ou taunuu i la’u misiona. E lei leva ona ou taunuu, ae ou iloaina le faamemelo ma le faaaloalogia o i laua e a latou faifeautalai uma, e aofia ai ma au!
Ina ua taunuu mai o matou taitai misiona fou, sa tele ni lagona fefiloi. Sa taliaina i la’ua e nisi o faifeautalai, a o isi sa le fiafia i le suiga.
I ni nai masina mulimuli ane, sa tofia au i se soa sa i ai se uiga le lelei i o matou taitai misiona ma la laua taitaiga. O le fou ai i le galuega, sa ou faalogo ai i ana faitioga ma lagonaina ua tauamiotonuina i latou. Sa matua tosinaina au i ona uiga faaalia ma amata ona ou taulai atu i mea le lelei, ma sa amata ona ou faitio i faatinoga ma faaiuga a o matou taitai fou.
Ina ua ou siitia ese, sa ou iloa ai sa ou taofia ma le le iloa a’u lava mai le mauaina o le fesoasoani ma le tuputupu ae sa ou manaomia mai nei taitai. Mo le vaega na totoe o la’u misiona, sa ou faatagaina i laua e avea ma faufautua alolofa ma faatuatuaina i lo’u liua faaleagaga. Sa ou maua ni molimau mamana e uiga i le talalelei e ala i a la aoaoga ma fautuaga. Pe a ou fetaiai ma faigata faaleagaga i le asō, ou te pipiimau pea i mea sa la aoaoina ai au.
Pe a suia taitai o le misiona, e mafai ona avea o se luitau, ae o le auala e te tali atu ai e mafai ona aafia ai le vaega o totoe o lau misiona—ma lou olaga. O ni nai mea nei sa ou aoaoina e uiga i le fetuunai i taitai fou o le misiona:
1. Faamoemoe ma Talia Suiga
Na faamalamalama mai e Peresitene Russell M. Nelson (1924–2025) le ala na faaleleia atili ai sauniga o le malumalu i le aluga o taimi a o maua e perofeta faaaliga mai le Atua. E faaauau pea ona faia suiga i o tatou aso. Sa ia faamamafa mai, "Ua suia le faiga, ae o feagaiga e tumau pea."
E faapena foi, e mafai e lou peresitene fou o le misiona ona maua faaaliga mo lau misiona lea o le a manaomia ai se suiga i faiga faavae. Manatua—e ui e ono suia ia faiga, ae o lou faamoemoega o se faifeautalai ma le talalelei a Iesu Keriso o loo e aoao atu e tumau pea. Na maua uma e au peresitene o misiona o i ai nei ma peresitene o misiona ua mavae le taitaiga mai le Tama Faalelagi. E ui lava atonu e ese le taitaiga, ae e le faapea ai o se tasi e sese. O le galuega faafaifeautalai o se vaega faifaipea o le Toefuataiga, ma "o le Toefuataiga faifai pea e manaomia ai faaaliga faifai pea."
2. Faaaloalo i o Latou Valaauga mai le Alii
Manatua "o lou peresitene o le misiona ma lona faletua, o e auauna faatasi o ni ou taitai misiona, ua valaauina e le Atua ma vaetofia e taitaia le misiona." O le valaauga e auauna atu o ni taitai misiona e sau mai le Tama Faalelagi e ala i faaaliga i Ana perofeta ma aposetolo. Faatuatuaina ma faaaloalogia Lona finagalo ma le taimi ma iloa o loo ia te Ia se faamoemoega faapitoa mo ou taitai fou.
O le a Ia taialaina i latou, e pei lava ona Ia taiala ma musuia oe i lau galuega faafaifeautalai.
3. Tatalo mo se Molimau i a Latou Fautuaga ma Taitaiga
I le avea ai ma se faifeautalai, e te faasoaina atu e le aunoa le tala i le Uluai Faaaliga a Iosefa Samita. O lona aafiaga na amataina i le mau "A e afai ua leai se poto i so outou, ina ole atu ia i le Atua" (Iakopo 1:5). A o e valaaulia isi e ole atu i le Tama Faalelagi e uiga i le moni o le talalelei, ia manatua e fai atu foi ia te Ia au fesili. Afai o loo e lagonaina le atuatuvale e ala i suiga, e mafai ona e maua le faamautinoaga e ala i faaaliga faaletagata lava ia.
Na folafola mai Peresitene Nelson, "A o faaauau pea ona e usiusitai, faailoa atu le lotofaafetai mo faamanuiaga uma e tuuina mai e le Alii ia te oe, ma a o e faamamaluina ma le onosai le taimi a le Alii, o le a tuuina atu ia te oe le poto ma le malamalama o loo e sailia."
4. Tuu Atu ia i Latou e Fautuaina Patino Oe
Ina ua ou masalosalo i la’u galuega o se faifeautalai, sa mafai e lo’u peresitene o le misiona ona iloatino o’u lagona e ala i le Agaga ma fesoasoani ia ou malamalama sa avea a’u ma se faifeautalai faamanuiaina.
A o saunoa atu i taitai misiona fou faatoa valaauina, na saunoa ai Peresitene Jeffrey R. Holland, Peresitene o le Korama a Aposetolo e Toasefululua faapea:
"Faatasi ai ma tagata faapelepele uma e liliu mai o le a outou maua i le isi tolu tausaga e sosoo ai, o faifeautalai lava ia. …
"Ma mo au ma le faitau miliona e pei o au, o le a matou toe aapa atu i aoaoga ma molimau a o matou taitai misiona mo mea e manatua o o matou uluai faatuatua ma le talitonuga moni. O le anoanoai na faasaoina mulimuli ane i le olaga i le malosi o le talalelei na aoaoina a o saofafai faifeautalai talavou i vae o se peresitene o le misiona ma lona faletua."
Po o ai lava ou taitai misiona, ia manatua latou te auauna atu ia Iesu Keriso, o lea, o le a latou mananao ai i mea e sili ona lelei mo oe ma lou tuputupu ae. A o outou auai uma i le galuega silisili i le lalolagi, o a latou molimau ma aoaoga e uiga i le Faaola e mafai ona suia ai lou olaga—pe afai e te faatagaina i latou.