Gikan sa YA Matag Semana
Karong Pasko sa Pagkabanhaw, Hunong ug Hunahunaa ang mga Liryo
Kon magtinguha kita ni Kristo, atong maamgohan nga ang Iyang kalinaw maatoa sa kanunay.
Litrato gikan sa Adobe Stock
Sa Iyang kataposang mga adlaw sa mortalidad, si Jesukristo misulti sa Iyang mga disipulo, “Ang kalinaw ibilin ko kaninyo. Ang akong kalinaw nga dili sama sa ikahatag sa kalibotan ihatag ko kaninyo.
Atol sa panahon sa Pasko sa Pagkabanhaw, kon magsaulog kita sa Iyang kataposan nga kadaogan batok sa sala ug kamatayon—ang Iyang Pagkabanhaw—kini nga saad labihan ka gamhanan. Apan bisan og ang kalinaw sa Manluluwas kanunay nga maanaa kanato, tingali dunay mga panahon nga kita maglisod sa pagbati niini.
Busa unsaon nato nga mabatonan kanunay ang Iyang kalinaw, paglaom, ug kalipay uban kanato?
Nakita ko kini pinaagi sa aktibong pagpangita Kaniya.
Magtinguha og Kalinaw Pinaagi ni Jesukristo
Usa ka paagi nga ako makatinguha og kalinaw pinaagi ni Kristto mao ang pagsulat og balak. Ako adunay kadasig sa balak, mao nga sa milabayng duha ka tuig, akong nasunod ang mga gibuhat sa Manluluwas pinaagi sa pagsulat og usa ka balak matag adlaw sa Semana Santa.
Sa unang tuig, mibati ko og kadasig nga mosulat og mga balak aron ipakita ang akong gugma ug pasalamat sa Manluluwas ug pagkat-on og daghan pa mahitugnod sa Iyang mga buhat. Dako kini og epekto, apan dili ingon niini ka personal. Nagsulat ko kadaghanan sama og naghulagway ko sa Iyang mga buhat.
Pagkasunod tuig, misulat ko og mga balak aron makakaplag og kalinaw gikan sa Manluluwas ug tungod kay gusto kong mosunod sa tambag sa Unang Kapangulohan sa paghimo sa Pasko sa Pagkabanhaw nga labing importante sa akong kinabuhi. Ang akong koneksiyon ngadto ni Kristo sa tinuod nalig-on tungod kay ako nangita Kaniya. Nagsulat ako gikan sa panglantaw niadtong kinsa nakasaksi sa Iyang mga buhat ug mga pagtulun-on. Makatandog gayod kaayo kini ug labihan ka personal.
Nagpasabot kini sa pagbutang sa mga pulong kon unsa ang kinabuhi alang sa usa nga wala gayoy ikahatag apan mihatag sa ilang kaugalingon. O sa tawo nga wala mag-antos og grabing pisikal nga sakit o pagkaulipon apan nasamaran sa espirituwal nga paagi ug ginapos. O sa tawo nga wala gayod mahatagi og gugma ug natandog sa pamahayag ni Jesus bahin sa labing talagsaon nga matang sa gugma.
Ang pagpamalandong sa tanan niini ug daghan pa nagtabang nako nga mas magmapasalamaton ug sa mapaubsanong paagi sa kahingangha sa talagsaon ug hingpit nga kinabuhi sa Manluluwas.
Magpakabuhi subay sa mga Detalye
Samtang akong gikonsidera ang mga detalye sa mga buhat sa Manluluwas, akong nakita nga Siya duol kaayo kanako. Nasayod ko nga wala ko didto sa pagpaminaw sa mga pulong nga “Lazaro, gula ngari” (Juan 11:43), wala usab ko makakita Niya nga mibakho, apan dihang namalandong ko ug misulat, mibati ko ingon og naa ko sa lubnganan sa gawas sa Betania.
Sa pipila ka bahin sa kalibotan, gigamit nato ang panultihon "Hunong ug simhota ang mga rosas" sa pagpahinumdom sa mga tawo sa paghinayhinay kon sila nagmalabalak-on kaayo ug naluya sa paglantaw sa positibong mga aspeto sa kinabuhi. Apan unsa kaha kon, imbis niana, mohunong kita ug "mohunahuna sa mga lirio" (Mateo 6:28), sama sa gitudlo ni Kristo? Unsa kaha kon tuyo kitang nagsiksik sa kalipay, katagbawan, ug kalinaw nga Iyang gitanyag?
Tingali ang importante mao ang paghatag sa atong kaugalingon sa panahon nga magpakabuhi diha sa mga detalye sa Iyang mahigugmaong mga buhat ug mga pulong. Hunahunaa nga naa ka sa karaang Jerusalem nga naminaw sa mga gipangtudlo ni Kristo. Sama pananglit, sulayi sa paghunahuna nga duol ka sa krus ug nakadungog sa Manluluwas nga mihangyo sa Amahan nga pasayloon kadtong naglansang Kaniya sa krus (tan-awa sa Lucas 23:34). Unsa kahay epekto niana kanimo?
O kini kaha: Ang Manluluwas bag-ong lang misaad nimo og kalinaw nga dili sama sa bisan unsa nga imong gibati (tan-awa sa Juan 14:27). Apan naghunahuna ka ang Mesiyas angay unta nga magdala og kalinaw pinaagi sa pagluwas sa mga Israelita gikan sa mga Romano, ug wala Niya kadto buhata. Busa unsa nga matang sa kalinaw ang Iyang mga gitudlo?
O kini: Imong gisunod si Kristo sulod sa mga katuigan. Apan namatay Siya. Miadto ka aron atimanon ang Iyang lawas ug lamang nakita ang walay sulod nga lubnganan. Unsay imong bation? (Tan-awa sa Juan 20:1–13.)
Busa, unsay akong gibuhat aron makakita og kalinaw diha ni Jesukristo? Sa kaugalingon nakong paagi, akong gikonsidera ang mga lirio. Migahin ko og panahon sa pagsiksik alang sa Iyang gugma diha sa mga sugilanon sa Iyang kinabuhi, ug nakit-an ko kini. Ang labing makatingala nga bahin mao nga Siya naa didto naghulat, ang Iyang mga bukton dako nga bukas.
Kon atong ikonsidera ang mga lirio, atong maamgohan nga ang kalinaw nga anaa Kaniya dili lamang para sa atoa human matapos ang pag-antos. Maatoa kini sa kanunay.
Unta adunay kalinaw kang Kristo alang nimo karong Pasko sa Pagkabanhaw, sama sa ngari kanako.