Sa Unsang Paagi ang Daang Tugon Nakatabang Kanako nga Makasabot sa Pagtuga sa Templo?

Gipakita ni Adan ang balaod sa pagkamasulundon sa dihang gipangutana siya sa anghel nganong siya ug si Eva naghimo og mga sakripisyo: “Wala ako masayod, gawas nga ang Ginoo misugo kanako” (Moises 5:6).

Ang kamasulundon mahinungdanon sa tibuok plano sa kaluwasan. Samtang gisunod nato ang mga instruksiyon ug mosalig sa Manluluwas, kita mamahimo nga sama Kanila.

Ang Kinatibuk-ang Tamdanan nga Basahon mipasabot niini nga balaod nga “magsakripisyo sa pagsuporta sa buhat sa Ginoo ug paghinulsol uban sa masulub-ong kasingkasing ug mahinulsulon nga espiritu."

Dili lisod ang pagpangita og mga sakripsiyo diha sa Daang Tugon, sa literal man ug paghulagway. Unsa usahay ang dili nato makita mao nga ang masulub-ong kasingkasing ug mahinulsulon nga espiritu gikinahanglan usab kaniadto.

Sa usa sa iyang mga Salmo, si David misulat nga “ang halad ko sa Dios, mao ang espiritu nga mapaubsanon ug mahinulsolon” (Salmo 51:17).

“Ang mga pulong ni David nagpakita nga bisan sa kapanahonan sa Daang Tugon, ang katawhan sa Ginoo nakasabot nga ang ilang mga kasingkasing kinahanglan nga ihatag ngadto sa Dios, nga ang mga halad nga sinunog lang dili pa igo,” mitudlo si Elder Bruce D. Porter dihang sakop siya sa Seventy.

Ang mando nga maghalad og mga sakripisyo nga hayop og mga abot natapos na diha sa pagkamatay ni Jesukristo. Karon, maghinulsol kita matag adlaw ug mokaon sa sakramento sa pagpahinumdom kanato sa Iyang maulaon nga sakripisyo. Apan ang personal nga kamapaubsanon ug paghinulsol sa gihapon usa ka bahin niini.

Nagpasabot kini sa paggamit og pagtuo diha ni Jesukristo; paghimo ug pagtuman sa mga pakigsaad uban sa Dios pinaagi sa mga ordinansa, paghinulsol ug paglahutay hangtod sa kataposan; ug paningkamot nga mohigugma sa Dios ug sa inyong silingan.

Usahay ang mga tawo maghunahuna nga ang direksiyon sa Manluluwas diha sa Bag-ong Tugon nga "higugmaa ang imong isigkatawo sama sa imong kaugalingon” (Mateo 22:39) isip usa ka pagbalhin gikan sa Daang Tugon nga panghunahuna. Apan ang Manluluwas nagakutlo sa Iyang Kaugalingon! Mga 15 ka siglo kaniadto, giingnan Niya si Moses: “Ayaw panimalos ug ayaw usab pagdumot sa inyong kadugo. Higugmaa ang inyong isigkatawo sama sa inyong paghigugma sa inyong kaugalingon” (Levitico 19:18).

Sa pagkatinuod, samtang kon “makabuta siya, butaan usab siya, makahingo og ngipon hingoan usab siya" (Levitico 24:20) usa ka bahin sa legal nga sistema sa mga Israelita’ ang balod ni Moises usab dunay daghang mga lagda bahin sa pagtratar sa mga silingan, mga bisita, mga estranghero, mga langyaw uban sa gugma ug kalooy (tan-awa sa Exodo 23:9; Levitico 19:33–34; Deuteronomio 10:19).

Ang mga Santos sa Ulahing mga Adlaw nakasabot nga ang “mata sa mata, ngipon sa ngipon” nga balaod natuman. Diin maglibog tingali kita bahin sa pagtuo nga ang “paghigugma sa silingan” usa ka bag-o nga ideya. Usa kini ka mahangtorong sugo.

Mahangtoron usab ang unang bahin niini nga balaod: sa paghigugma sa Dios labaw sa tanan. Si Presidente Dallin H. Oaks mitudlo: “Ang atong kadasig sa pagsunod [sa] ikaduhang sugo kinahanglan gayod nga dili makapalimot sa una, ang paghigugma sa Dios sa tibuok natong kasingkasing, kalag, ug salabutan. … Kita nagpakita niana nga gugma pinaagi sa ‘pagsunod sa [Iyang] mga sugo’ [Juan 14:15]. Gikinahanglan sa Dios kanato ang pagtuman sa Iyang mga sugo tungod kay pinaagi lamang nianang pagkamasulundon, lakip sa paghinulsol, kita makabalik sa pagpuyo diha sa Iyang presensiya ug mahimong hingpit sama Kaniya.

Human sa balaod sa pagkamasulundon, ang balaod sa kaputli tingali ang labing sayon nga sabton: Walay sekswal nga relasyon sa gawas sa legal nga kaminyoon tali sa usa ka lalaki ug usa ka babaye

“Thou shalt not commit adultery” (Exodus 20:14) usa ka nailhan kaayo nga sugo sa Daang Tugon, ug ang ubang matang sa sekswal nga imoralidad gidili usab sa balaod ni Moises (tan-awa sa Levitico 18). Apan bisan sa wala pa ang panahon ni Moises, si Jose sa Ehipto nakahibalo nga mobatok sa mga pagtintal sa asawa ni Potipar Genesis 39:7–12).

Sa panglantaw sa katilingban bahin sa sekso nga nagkamatugtanon, ug uban sa pornograpiya ug sa ubang makapadani nga sekswal nga mga materyal nga anaa ra, tingali adunay mas daghang tentasyon—ug oportunidad—sa paglapas sa balaod sa kaputli karon kaysa masukad. Apan ang kaputli nagpabilin nga sumbanan sa Ginoo, ug pinaagi sa pagtuman niini nga pakigsaad, mapanalanginan kita uban sa mas dakong mga abilidad sa paghigugma sa uban sama sa Iyang gihimo nga “makapugong sa tanan [natong] mainit nga mga pagbati” (Alma 38:12).

Gipahinungod nato ang atong tanang panahon ug mga talento sa pagtukod sa gingharian sa Dios. Ang pagpahinungod naglakip usab sa paghalad sa atong tibuok kalag ngadto sa Dios aron Siya makahimo nato nga balaan.

Miingon si Moises, “Niining adlawa gihalad ninyo ang inyong kaugalingon ingon nga mga pari sa pag-alagad sa Ginoo pinaagi sa pagpatay sa inyong mga anak nga lalaki ug mga igsoong lalaki busa gipanalanginan kamo sa Ginoo karong adlawa” (Exodo 32:29). Ang istorya sa mga anak ni Israel nakakita nga ang pipila ka indibidwal nagpahinungod sa ilang mga kaugalingon ngadto sa Ginoo—sama sa biyuda nga mipakaon ni Elijah (tan-awa sa1 Mga Hari 17:7–16)

Sa sayo pa sa kasaysayan, ang katawhan ni Enoch naningkamot sa pagsunod sa kintatibuk-an sa balaod sa pagpahinungod. Sila “ usa sa kasingkasing ug usa sa hunahuna, ug nagpuyo diha sa pagkamatarong; ug walay kabos taliwala kanila”(Moises 7:18) “Walay kabos taliwala kanila” usa ka kahimtang nga pipila lang sa mga katilingban ang nakakab-ot (Ang kaliwatan ni Lehi nakahimo niini sa makadiyot, tan-awa sa 4 Nephi 1:3), apan karon makapaningkamot kita sa pagsunod niini nga pakigsaad pinaagi sa pagbaton og andam nga kasingkasing, pagserbisyo bisan asa kita gikinahanglan, paginulsol kada adlaw, ug paghalad sa atong tibuok mga kalag ngadto sa Dios.

Ang Ginoo nagdapit nato sa paghimo sa tanang lima niini nga mga pakigsaad sa usa ka seremonya sa templo. Apan kita dili angay nga mahasol sa gidak-on sa pasalig. Si Elder Dale G. Renlund sa Korum sa Napulog Duha ka Apostoles mitudlo: “Ang Dios naghimo og daghang pakigsaad aron kita panalanginan, dili aron kita silotan. Ang pagtutok og maayo sa mga pakigsaad nga atong gihimo ug ang pag-andam alang sa mosunod mao ang labing maayo nga paagi aron maandam sa pagdawat sa tanang anaa sa Langitnong Amahan.

Ang pag-aghat sa Iyang mga anak nga mas mopaduol ngadto Kaniya pinaagi sa mga pakigsaad butang nga nahimo sa Dios sa matag dispensasyon. Napanalanginan kita nga nagpuyo sa panahon nga kini nga mga pakigsaad anaa andam alang nato diha sa balay sa Ginoo. Sa sunod nga higayon nga kamo moadto, hunahunaa kon sa unsa nga paagi nga ang mga katigulangan sa Daang Tugon mihimo sa sama nga mga pakigsaad