Ilabi na alang sa mga Bag-ong Minyo
3 Ka Paagi nga ang Pagtambong sa Institute kauban sa Imong Kapikas Makapalig-on sa Inyong Kaminyoon
Ang pag-eskwela og institute kauban sa akong bana nakatabang sa pagpalambo sa among espiritwal nga koneksiyon, komunikasyon, ug pasalig sa usag usa.
“Nganong motambong man ko og institute kon ako minyo na?”
Balido kana nga pangutana. Sa dihang young single adult pa ko sa kolehiyo, ang institute nakatabang nako nga malig-on ang akong pagpamatuod, nakahimo og mga higala, nakakita og mga tawo nga ika-date, ug nagtagamtam og libre nga pagkaon! Sa ting-init dihang ang akong bana, si Johnny, ug ako nagsugod sa pag-date, kaming duha nagdungan sa pagtambong og mga klase sa institute.
Apan wala namo mamatikdi kaniadto nga kadtong nga klase makatabang diay sa pagpahimutang og usa ka pundasyon alang sa kaminyoon.
Karon nga minyo na mi, ang among mga rason sa pagtambong og institute nausab, apan bililhon sa gihapon. Sama sa gipahinumdom kanato sa asawa ni President Russell M. Nelson, si Sister Wendy Nelson, “Ang pagmugna og lig-on, malipayong kaminyoon dili sayon! … Apan kini modala gayod kaninyo og kalipay!”
Ang pagbaton og nakasentro kang Kristo nga kaminyoon nagkinahanglan og buhat, apan ang kalipay nga moabot gikan sa pagkat-on ug dungan nga pagtubo diha sa ebanghleyo dili masukod.
Ang among dungan nga pagtambong og institute nahimo nga yawe sa pagtabang nga molambo ang among kaminyoon. Ania ang tulo ka paagi nga kini makalig-on sa inyong kaminyoon:
1. Pagpalambo sa Inyong Komunikasyon
Ang komunikasyon mahinungdanon sa kaminyoon, ug ang institute nakatabang kanamo nga mahimong mas maayo sa pagpakigsulti. Magbinahinay kami og mga pagtulon-an, magpangutan-anay, ug maghisgot og mga leksiyon. Mag-abli kini sa mga pultahan sa makahuloganong pag-istoryahanay mahitungod sa among mga pagpamatuod, mga tumong, ug sa umaabot—magpalawom sa among emosyonal nga koneksiyon sa samang higayon. Ang usa ka mas lig-ong nga koneksiyon makatabang usab sa ubang bahin sa kaminyoon, sama sa pagdumala sa kasungian, pagkahimong mas masinabtanon, ug pagpalambo sa kinatibuk-ang panag-uban.
Sama sa gipasabot ni Elder Marvin J. Ashton (1915–1994) sakop sa Korum sa Napulog Duha ka Apostoles, “Kon makahibalo kita unsay tinuod nga gugma ug pagsinabtanay sa usag usa, kinahanglan nga atong masayran nga ang komunikasyon mas labaw kaysa pagbinahinay og mga pulong. Mao kini ang maalamon nga pagbinahinay sa mga emosyon, mga pagbati, ug mga kabalaka.”
2. Pag-alima sa Inyong Espirituwal nga Kasuod
Ang espirituwal nga kasuod moabot kon buhaton nato ang mga butang sama sa pag-ampo, pagtuon sa mga kasulatan, pag-ambit sa sakramento, o pagtambong sa templo kauban sa kapikas—labaw pa sa matag panahon nga magbuhat kita og butang nga magdapit sa Espiritu sa atong kinabuhi. Ang institute mao ang laing dapit nga kana atong mahimo!
Ang dungan nga pagtuon sa ebanghelyo mogiya kanato sa pagpamalandong sa atong mga kasinatian ug kon unsaon sa paggamit ang mga baroganan nga atong nakat-onan. Makatabang kini kanato sa pagtakda og espiritwal nga mga tumong nga tambayayongan sa paghimo, sama sa pagpalambo sa atong mga calling ug pagtambong sa templo nga mas kanunay.
Mosiah 18:21 nagtudlo kanato nga himoon ang atong “mga kasingkasing nga nabugkos diha sa pagkahiusa ug diha sa gugma .” Ang institute makatabang nato nga mahiusa ang atong mga kasingkasing ug hunahuna kang Kristo.
Gamita unsay inyong nakat-onan sa institute sa paghisgot sa espirituwal nga mga butang sa mas dayag nga paagi, mangita og paagi nga maduol sa Dios, ug dapiton ang Espiritu Santo diha sa inyong kaminyoon.
3. Pagpalig-on sa Inyong Pasalig sa Pagtuman sa mga Pakigsaad
Ang institute nakatabang ni Johnny ug kanako sa paghinumdom sa among mga pakigsaad sa templo. Ang mga leksiyon nagtutok sa mahangturon nga mga baroganan ug nagpahinumdom kanamo sa mga pasalig nga among gihimo sa usag usa ngadto sa Dios. Ang pagpamalandong sa among mga pakigsaad nakatabang namo sa paghimo og mga pagpili nga nagtahod niadto nga mga saad. Sigon sa gitudlo ni Presidente Nelson (1924–2025), “Ang labing luwas nga dapit sa pagkaespirituwal mao ang pagtuman sa inyong pagka-espirituwal mao ang pagpuyo diha sa inyong mga pakigsaad sa templo!”
Dali ra ang mabalda sa inadlaw nga pagpakabuhi, apan ang institute makatabang kanato nga makatutok kang Jesukristo ug sa atong mga pakigsaad sa templo.
Hunahunaa sa unsang paagi ang pagtambong sa institute tingali makatabang ninyo sa pagtahod sa inyong mga pakigsaad. Tingali mogahin og panahon nga maghisgot bahin sa unsang paagi ang mga leksiyon magamit sa inyong kaminyoon ug sa mga pasalig nga inyong gihimo sa usag usa ug ngadto sa Dios. Pamalandongi kon unsaon sa pagtuman kadto nga mga pakigsaad sa inadlaw nga kinabuhi, ug gamita ang institute sa subli nga pagpasalig niadto nga mga saad.
Usa ka Gamahanan Kaayo nga Himan alang sa Inyong Kaminyoon
Ang institute makatabang ninyo sa pagtubo sa espirituwal nga paagi, sa emosyonal, ug sa inyong pasalig sa usag usa. Si Presidente Nelson miingon: “Ang pagtambong sa institute motabang kaninyo nga mas mobati sa dakong gugma sa Langitnong Amahan alang kaninyo. … Ang pagtambong sa institute motabang kaninyo sa pagsunod sa ebanghelyo ug mobati og mas dakong kamaya—karon dayon.”
Ang paggahin og panahon alang sa institute mipalig-on sa among kaminyoon. Nasayod ko nga makahimo kini sa samang butang diha ninyo. Bag-o man kamo nga naminyo o mga tuig na, mahimo kining puno sa gahom nga himan sa pagtukod og usa ka nakasentro kang Kristo nga relasyon.