Kon ang mga Pakigsaad Mahimo nga Inyong Kompas

Pagka-2020, si Johnny ug ako parehong gitawag og misyon nga moserbisyo sa Mexico Villahermosa Mission. Dayon miigo ang COVID-19. Ang Unang Kapangulohan mihatag sa mga misyonaryo og opsiyon nga magpadayon sa ilang orihinal nga timeline ug posible nga i-assign og lahi—o ilangan ang ilang misyon nga may purohan nga makaserbisyo sa ilang orihinal nga mga assignment.

Human sa daghang mga pag-ampo, akong gipili nga dili lang una ko magmisyon ug mopadayon sa pag-eskwela sa Brigham Young University–Hawaii mentras tanto.

Ang maong paghulat nagdala og mga panalangin nga wala nako dahoma. Dihang nahuman gyod nako kini didto sa Mexico paglabay sa 18 ka bulan, si Johnny bag-o lang mibalhin didto gikan sa Las Vegas West Mission. Parehas mi nga didto sa usa ka district sulod sa sobra sa upat ka bulan ug didto nahimong maayong mga higala.

Human nakapauli si Johnny, padayon ang among kontak ug magsinulatay kami matag semana. Usa ka Lunes, gipangutana nako siya, “unsay pipila sa imong mga tumong ug mga pangandoy sa imong kinabuhi?”

Mibalos siya sa pagsulat, “Usa sa akong mga tumong mao ang maselyo sa templo ug makabaton og pamilya nga magtubo sa ebanghelyo.”

Sa pagkabasa niana, miabot kanako ang katin-awan—gusto ko nga maminyo kaniya! Klaro ang iyang mga prayoridad. Sa tinuod lang, kon dunay tawo nga mangutana kanako sa sama nga pangutana, tingali moingon ko og sama sa “mobiyahe sa tibuok kalibotan” o “moapil og ultramarathon.” Samtang bililhon kadto nga mga tumong, gitabangan ako ni Johnny nga makita ang unsay labing mahinungdanon.

Bisan sa kasamok tungod sa pandemya, pagkabalhin og misyon, ug pagkawala sa usa ka minahal, padayon gihapon si Johnny. Ang iyang mga pakigsaad dili lamang mga kahon nga tsekanan—mga koneksiyon kini nga nagbugkos ngadto sa gahom sa Manluluwas, kalinaw, ug kalig-on.

Atol sa pandemya, si Presidente Russell M. Nelson nangutana: “Andam ba kamo nga ipatigbabaw ang Dios labaw sa tanan sa inyong kinabuhi? Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa unsay inyong gibuhat sa matag adlaw?”

Si Johnny sa tinuoray mitugot sa mga pakigsaad sa Langitnong Amahan nga moimpluwensiya sa iyang mga desisyon. Mag-ampo siya alang sa kahupayan kon mag-inusara siya. Moambit siya sa sakramento uban sa katuyoan, mogamit niini isip usa ka gutlo sa pagbag-o. Nagtuon siya sa mga kasulatan ug miserbisyo sa uban tungod kay mao kadto ang mga paagi sa iyang pagtuman sa iyang mga pakigsaad ug mobati nga duol sa Manluluwas. Miadto sa templo kanunay kutob sa iyang mahimo.

Dihang ang usa sa iyang igsoon namatay atol sa iyang misyon, si Johnny mihupot sa iyang mga pakigsaad sa templo pinaagi sa pagsalig sa mga saad sa Dios. Kadto nga mga saad nagpahinumdom kaniya nga ang mga pamilya mahangtoron ug nga kini nga kinabuhi dili maoy kataposan.

Human sa akong misyon, si Johnny ug ako nagsugod sa pag-date. Sa kataposan, naselyo kami sa Mesa Arizona Temple.

Nagluhod nga nag-atubang sa altar gikan kaniya, dili ko makapugong apan sa paghunahuna mahitungod kon sa unsang paagi ang among mga pagpili—ilabi na ang pagtuman sa among mga pakigsaad—nagdala kanamo dinhi.

Si Johnny pwede ra gyod nga mobiya sa ebanghelyo. Ang iyang kaagi naghatag kaniya og daghan kaayong mga rason. Apan wala niya buhata. Ug karon, tungod niana, ang among pamilya natukod sa usa ka pundasyon sa pagtuo kang Jesukristo, usa ka pundasyon nga dugay nang gipahimutang daan ni Johnny sa wala pa kami magkita.

Kaniadto pa kong naghunahuna nga ang mga pakigsaad mga saad lamang nga atong gihimo ngadto sa Dios. Apan pinaagi sa ehemplo ni Johnny, akong nakita nga mao kini ang paagi nga padayon kaming konektado sa Dios ug maka-akses sa Iyang mahangtoron nga gahom.

Si Elder Dale G. Renlund sa Korum sa Napulog Duha ka Apostoles mitudlo: “Pinaagi sa paghimo ug pagtuman sa mga pakigsaad sa templo, makakat-on kita og dugang mahitungod sa mga katuyoan sa Ginoo ug makadawat og kahingpitan sa Espiritu Santo. Makadawat kita og direksyon sa atong mga kinabuhi. Mohingkod kita sa atong pagkadisipulo. … Sa kataposan, ang atong mga destinasyon mausab tungod sa dalan sa pakigsaad nga mogiya ngadto sa kahimayaan ug mahangtorong kinabuhi.”

Ang sugilanon ni Johnny nagmatuod nga wala kinahanglana nga maggikan ikaw sa usa ka “hingpit” nga pamilya o kaagi aron magsubay sa dalan sa pakigsaad.

Sama sa gipakigbahin ni Larry R. Laycock sa usa ka artikulo sa YA Matag Semana: “Ang pipila kanato gikan sa mga kaagi [background] ug mga kasinatian sa kinabuhi nga dili kaayo maayo, apan ang atong mga kahimtang sa kinabuhi wala maghulagway kanato o maghukom sa atong mga kapalaran. Ang atong makagagahom nga Amahan sa Langit mao ang makahimo ug makapabayaw kanato ngadto sa Iyang langitnong mga korte sa kahitas-an kon kita moduol lamang ngadto sa Iyang Anak, si Jesukristo, pinaagi sa pagkamasulundon ug pagsunod sa atong mga pakigsaad.”

Wala kinahanglana nga imong ilarawan kining tanan. Apan kinahanglan nga ikaw balik-balik nga mopili ni Jesukristo. Usa ka adlaw sa matag higayon.

Kon karon lisod ang mga butang, pangutan-a ang imong kaugalingon: “Unsa kaha ang mahitabo kon akong tugotan ang akong mga pakigsaad nga mogiya sa akong kinabuhi?”

Ang pagtugot nga ang mga pakigsaad mogiya sa imong kinabuhi wala magpasabot nga ikaw kinahanglan nga hingpit—nagpasabot lamang kini nga ikaw kinahanglang mopadayon sa pagpaningkamot. Makita kini sama sa pagpili nga mag-ampo kon ikaw mobati nga nabug-atan, sa pagsimba kon mobati nga mas sayon ang magpuyo ra sa balay, o magbasa sa imong mga kasulatan, bisan og pipila lamang ka bersikulo sa usa ka adlaw. Pagpasaylo kini ngadto sa usa ka tawo bisan og lisod, pagbisita sa usa ka higala, o pagbalibad sa butang nga wala mahiuyon sa imong mga mithi. Kining ginagmay, padayon nga mga pagpili mao ang paagi unsaon nato sa pagpakabuhi subay sa atong mga pakigsaad sa matag adlaw ug sa unsang paagi kita magpabiling suod ni Jesukristo.

Kon tugotan nimo nga ang imong mga pakigsaad nga mogiya sa imong kinabuhi, ang Ginoo nagsaad kanimo og kalig-on, kalinaw, ug direksiyon. Ang kinabuhi dili mahimong hingpit, apan ang imong relasyon sa pakigsaad ngadto sa Langitnong Amahan padayon nga mogiya kanimo padulong sa butang nga mas maayo.