Gikan sa YA Matag Semana
Wala ako Makahimo og mga Pakigsaad sa Templo, apan Kana Wala Makapahunong Kanako gikan sa Pagsunod Niini
Ang tagsulat nagpuyo sa Kisumu, Kenya.
Nagpuyo ko layo sa templo apan duol ni Kristo.
Ang labing una nakong pagtambong sa templo, misakay ko og eroplano gikan sa Kenya padulong sa Johannesburg South Africa Temple aron maselyo sa akong mga ginikanan. Apan bata pa kaayo ko nga wala akoy tin-aw nga panumdoman sa akong kasinatian sa templo.
Komon kini alang sa mga miyembro sa Ang Simbahan ni Jesukristo sa mga Santos sa Ulahing mga Adlaw sa Kenya. Akong nabantayan ang gidaghanon sa mga miyembro sa akong area sa Simbahan nga midaghan gikan sa usa ka branch ngadto sa tulo, apan bisan pa niining impresibo nga paglambo, daghang miyembro dili makaadto sa templo sa paghimo og mga pakigsaadl. Ang pagbiyahe sa gawas sa nasod dili gayod sayon.
Apan mahimo gihapon kaming magpabilin nga duol sa Manluluwas pinaagi sa pagpakabuhi nga ingon og naghimo na kami og mga pakigsaad sulod sa templo.
Pagpakigbahin sa Iyang Ebanghelyo
Sama nga ikaw nagkinahanglan nga moatiman ug mobisibis sa usa ka kahoy aron madawat ang bunga niini, ikaw kinahanglang moatiman sa usa ka pagpamatuod aron mamentinar ang usa ka suod nga relasyon ngadto sa Manluluwas. Samtang dili ako makatambong sa templo ug mohimo og mga pakigsaad sa templo, akong gipili ang pagpalig-on sa akong pagpamatuod sa ebanghelyo sa ubang paagi.
Si Presidente Henry B. Eyring, Unang Magtatambag sa Unang Kapangulohan, mitudlo, "Kon kamo motuman sa inyong mga pakigsaad sa templo ug mohinumdom niini, kamo nagdapit sa pakig-uban sa Espiritu Santo aron sa paglig-on ug paglimpyo kaninyo."
Ang pagkapabuhi nga ingon og ako nakahimo niadto nga mga pakigsaad nakatabang kanako sa pagpangandam alang sa adlaw nga ako makasulod sa templo. Ug ang pagpakigbahin sa ebanghelyo maoy usa sa labing maayong mga paagi nga magpabiling konektado ngadto sa Manluluwas ug maandam alang sa akong pagtuga [endowment].
Tungod kay dili daghan ang mga miyembro sa Simbahan sa Kenya, duna koy daghang oportunidad sa pagpakigbahin sa ebanghelyo. Sa matag higayon nga pangutan-on ko mahitungod sa akong mga gituohan, sama sa nganong dili ko moinom og tsa o bino, kanunay kong mobati nga gigiyahan sa Espiritu Santo sa pagtubag sa labing maayo nga paagi kutob sa mahimo.
Mao nga samtang dili pa ko mahimong makapahigayon sa buhat sa templo sa akong kaugalingon o alang sa mga patay na, gihimo nako ang labing maayo nga dad-on nako ang akong kaugalingon ug ang uban nga mas maduol sa usa ka kinabuhi nga nagsunod sa pakigsaad.
Pagbati sa Iyang Gugma sulod sa Templo
Ang Nairobi Kenya Temple gipahinungod niadtong 2025. Bisan og ang templo unom pa ka oras nga biyahe ang gilay-on, sa kataposan mahimo na kining adtoon.
Samtang didto sa templo alang sa open house, nakadawat ko og kusog nga personal nga inspirasyon. Kanunay nakong gihunahuna ang templo nga balaan, apan wala gayod ako makasabot sa gidak-on niini hangtod nianang adlawa.
Samtang hilom ko nga diha sa celestial nga lawak, nakigsulti ko sa akong Langitnong Amahan sa pag-ampo ug gibati ang usa ka kompirmasyon nga Siya naminaw.
Akong gipamalandongan ang akong kinabuhi—kon unsay mga maayo nakong nahimo ug unsay mas maayo pa nakong buhaton. Gusto nakong mahibaloan unsaon nga ako mahimo nga mas maayo nga tawo ug makaandam sa paghimo og mga pakigsaad. Akong gibati ang Espiritu nga nag-uban kanako ug gibati ang katinuod sa akong balaanon nga pagkatawo. Ug akong nahibaloan nga pinaagi sa Pag-ula sa Manluluwas, ako “gakson sa mga bukton ni Jesus” (Mormon 5:11).
Gani sa wala pa mapahinungod ang templo, ug sa wala pa makapahigayon og bisan unsang ordinansa, nasayod ko sa akong kaugalingon nga ang templo tinuod gayod nga balay sa Ginoo. Ang pag-adto sa templo sa bisan unsang kapasidad—paglakaw-lakaw sa mga nataran, pagtambong og open house, pagpahigayon og mga proxy nga mga ordinansa, paghimo og mga ordinasa sa imong kaugalingon, o bisan gani sa paghimo og buhat sa family history—makadapit sa Espiritu diha sa imong kinabuhi ug makatabang kanimo nga maandam sa paghimo ug pagtuman og sagrado nga mga pakigsaad sa templo. Ug samtang ikaw mangandam sa paghimo ug pagtuman niana nga mga pakigsaad, nagtukod ikaw ug mas suod nga relasyon ngadto sa Manluluwas.
Pagtabang nga madali ang Iyang Buhat
Samtang wala pa ako makabalik sa templo, nangandam ko sa pagdawat sa akong kaugalingon nga pagtuga sa wala pa ko mobiya alang sa akong misyon. Akong gilantaw ang adlaw nga makatambong ko sa templo ug makahimo og mga pakigsaad sa akong kaugalingon ngadto sa Langitnong Amahan.
Diha, akong namatikdan ang dako kaayong kausaban sa akong komunidad tungod sa templo. Tulo o upat ka pamilya sa akong branch nangandam sa pag-adto sa templo, ug ang among mga klase sa pagpangandam alang sa templo mas aktibo kay sa kaniadto. Sama sa giingon ni Presidente Russell M. Nelson (1924–2025): “Nakita ba ninyo ang nanghitabo karon gayod? Akong pag-ampo nga dili nato mataligam-an ang kahalangdon niini nga panahon! Ang Ginoo nagpadali gayod sa Iyang buhat.
Ang pagpakabuhi nga naghupot sa usa ka pakigsaad bililhon, bisan asa man kamo sa dalan sa pakigsaad. Imong mapadali ang buhat sa Ginoo sa sulod o sa gawas sa templo.
Kon wala ka pa makahimo og mga pakigsaad sa templo, mahimo kang mangandam sa paghimo niini karon, bisan og daw lisod kining kab-oton. Samtang ikaw dunay gikatampo sa pagpadali sa buhat sa Manluluwas, imong mabatyagan ug ikapakigbahin ang Iyang gugma sa mas taas ug balaan nga paagi.