Pagbuntog sa Akong Kahadlok sa Pagsimba diha sa Templo

Ni Love Sabine Lucien

Dili kinahanglan nga ang kahadlok nga mopugong kanimo sa pagdawat sa mga panalangin sa templo.

paghulagway sa kahayag nga nagdan-ag gikan sa templo ngadto sa usa ka babaye

Bag-ohay lang, midangop ko sa akong presidente sa stake nga, bisan og kanunay ko nga may aktibo nga rekomend sa templo, usa ka makapaluya nga kahadlok nagpugong pa gihapon kanako sa pagsulod sa mga pultahan nianang sagrado nga lugar.

Isip usa ka miyembro sa Haiti Public Affairs Council, mitabang pa gani ko sa mga kalihokan para sa pagpahinungod sa Port-au-Prine Haiti Temple. Mao nga sa dihang ang akong presidente sa stake nangutana nganong dili ko gusto motambong sa templo, mipasalig ko niya nga dili tungod kay walay pagtuo apan ang dili mabuntog nako nga pagkaperpeksiyonista nga kahadlok. Mipasabot usab ako nga bisan og gipadako ko sa nakasentro sa ebanghelyo nga panimalay ug sa gihapon nangita sa tinuod nga pagkatinun-an, kini nga kahadlok mipugong kanako sa paghimo sa sunod nga lakang.

Nakapalayo kini nako, bisan sa akong sinsero nga tinguha sa pagsulod. Naminaw ang akong presidente sa stake ug miawhag nako sa pag-ampo ug mohangyo sa Dios sa pagpawala sa kahadlok nga nag-ali sa akong espirituhanon nga paglambo. Sa akong pag-ampo ug namalandong sa akong mga resulosyon alang sa bag-ong tuig, nakaamgo ko nga panahon na sa paghunong sa paghikaw sa akong kaugalingon sa gisaad nga mga panalangin kanako sa Dios tungod sa akong kahadlok ug mga pagduda. Determinado ko sa pagtambong sa templo ug mopahigayon og mga ordinansa.

Mao nga naghimo ko og tumong sa pag-apil sa mga pagkumpirma ug misulti sa akong presidente sa stake mahitungod sa akong mga plano.

Uban sa hilabihang kamaayo, mitubag siya sa mga pulong nga sa gihapon milanog diri kanako: “Unta ang Kahayag ni Kristo modan-ag sa imong mga lakang samtang maglakaw ka sa dalan sa pakigsaad ug mobuntog sa imong kahadlok.” Kini nga mga pulong, puno sa kalumo ug pagtuo, mihatag kanako sa kalig-on ug pagsalig sa pagtan-aw niini nga pagbisita sa templo nga dili usa ka hagit apan usa ka mahinungdanon nga lakang sa akong espirituhanon nga panaw.

Paglihok pinaagi sa Pagtuo

Ang akong dughan nagputokputok samtang nag-andam ko sa pagkuyog sa akong inahan paingon sa templo. Adlaw kadto nga mikulit sa akong panumdoman nga usa sa labing mahinungdanon nga mga gutlo sa akong kinabuhi. Adunay parte nako nga nakuyawan gihapon, apan usa ka lig-on nga bahin naghinamhinam sa unsay akong bation.

Pipila pa lang ka minuto sa wala pa ko misulod sa templo, usa ka wala damha nga tawag sa telepono mipasanag sa akong kabuntagon. Nakadawat ko og pagkompirmar nga usa ka pagbiyahe nga pagtugot nga dugay na nakong giampo sa kataposan giaprobahan na. Kong wala pa kadto giaprobahan, dili unta ko makatambong og importante nga medikal nga appointment sa gawas sa nasud.

Kini nga balita usa ka balaan nga kompirmasyon nga ang Ginoo nakadungog sa akong mga pag-ampo. Ang akong kasingkasing napuno sa daghang kalipay. Miambak ko sa kalipay, nakaamgo nga ang Dios kanunay motubag kanato, bisan daw hilom Siya.

Nalig-on pinaagi niini, sa kataposan misulod ko sa mga pultahan sa templo, diin gisugat ko sa presidente sa templo ug sa iyang asawa. Nakahibalo sila sa kaimportante niining higayona alang nako ug nasayod sa akong mga kahadlok nga nakapugong kanako sa una. Ang ilang buotan nga pag-abi-abi ug pag-awhag miwagtang sa mga timailhan sa akong kahadlok. Sa tinuod gibati nako ang dili mahulagway nga kalinaw.

Sa akong pag-apil sa mga pagkompirmar, matag pulong milanog sa akong kalag, nagdala og katin-awan ug kalipay ug nagpahinumdom nako nga anaa ako sa usa ka balaan nga dapit. Human makompleto ang ordinansa, ang presidente sa templo miuban nako paingon sa gawas. Kini nga lihok, yano kaayo gani mahunahunaon, mipalig-on sa pag-abi-abi nga pagbati diha sa balay sa Ginoo.

Pagpalandong og Balaang Paggiya

Nakasabot ko nga ang Ginoo gusto nga maniguro nga wala ko magduhaduha sa Iyang kabubut-on alang kanako, ug ang mga pulong ni Presidente Russell M. Nelson dayon miabot sa hunahuna: “ Dili nato kalimtan kon unsa ang gibuhat sa Ginoo alang kanato karon. Iyang gibuhat ang Iyang mga templo nga mas dali nga maadtoan. Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel. Iya usab nga gihimong mas sayon alang sa matag usa kanato nga mahimong malamboon sa espirituhanon nga paagi. Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.”

Nakaamgo ko ang templo tinuod gayod nga usa ka dangpanan, usa ka sangtwaryo diin makadawat kita og tin-aw nga mga tubag ug walay kinutoban nga mga panalangin. Kadto nga kasinatian nakabag-o sa akong kinabuhi. Ang Langitnong Amahan mitabang nako sa pagbuntog sa kahadlok nga dugay nang nagpugong nako, ug Siya usab mipahinumdom kanako sa maluluy-ong giya nga Iyang gitanyag niadtong nagsalilg Kaniya.

Puno ang akong kasingkasing sa pasalamat, ug karon nahibalo na ko nga ang templo usa ka dapit nga mobalik ko og usab ug usab, mangita sa kahayag, direksiyon, ug kalinaw.

Ang tagsulat nagpuyo sa Port-au-Prince, Haiti.