Gikan sa YA Matag Semana
Unsaon Nako nga Makapadayon sa Unahan sa Dalan sa Pakigsaad Kon Dili Pa ko Minyo?
Kon bation nako nga nag-urong diha sa pagsubay sa dalan sa pakigsaad, mopaduol ko ni Kristo.
Usa ko ka tawo nga kanunayng may tseklist. Ganahan kong maghimo og mga box ug i-tsek kini.
Ang akong mga tseklist magamit kaayo kon kinahanglan kong mamutos para sa usa ka pagbakasyon, maglimpiyo sa balay, og pagmonitor sa akong mga homework nga buluhaton. Apan ang paghimo og usa ka tseklist sa akong espirituwal nga pag-uswag naghatag kanako og labihan nga kahingawa.
Tungod kay dunay usa ka box nga dili pa nako kabutangan og tsek: ang "Magminyo sulod sa templo" nga box.
Tungod kay dili pa ko minyo, sayon rang bation nga naungot ko dapit sa pagtuga [endowment] ug sa mga pagselyo nga mga pakigsaad. Ang mga pulong nga "dalan sa pakigsaad" nagsugyot nga kita kinahanglang mosubay sa dalan—ug dayon mopadayon sa unahan.
Ang giawhag ni Presidente Russell M. Nelson (1924–2025) nga “mapadayon ang positibo nga espirituhanong paglambo.” nagsugyot og susama nga imahe sa panghunahuna bahin sa pagpadayon.
Apan tungod kay ang pagpaselyo sulod sa templo desisyon himoon sa duha ka tawo, usahay mobati ko nga mibangga ko sa usa ka sarado nga ganghaan. Nabalaka ko basin mahubsan ko sa espirituhanong paglambo samtang maghulat ko nga moabli ang ganghaan. Pwede ba kong magpadayon sa unahan sa dalan sa pakigsaad kon sa kasamtangan dili ko makahimo sa sunod nga pakigsaad?
Ang tubag sa akong mga kahadlok miabot pinaagi sa pagsabot og mas labaw og gamay sa dalan sa pakigsaad.
Padulong sa Ibabaw nga Paglihok
Kon maghunahuna ko og usa ka dalan isip usa ka tseklist o tul-id nga linya nga may mga bato nga tumbanan—bunyag, pagkompirma, initiatory, pagtuga, pagselyo—wala koy gibati nga duna koy butang nga mahimo taliwala sa mga lakang.
Apan nausab ang akong panglantaw dihang si Elder Dale G. Renlund sa Korum sa Napulog Duha ka Apostoles dunay lahi nga paghulagway sa dalan: "Ang labing maayo nga paglarawan niini nga proseso mao ang paghunahuna og usa ka taas nga dalan pasaka sa tumoy sa bungtod. Kon imong tan-awon kini nga dalan gikan sa taas nga dapit, tanan nga imong makita nagsapya ra nga liyok. Apan, kon lantawon nimo kini nga dalan gikan sa kilid, makita nimo ang pasaka nga pagliyok."
Sa lahi nga pagkasulti, ang pagsunod sa ebanghelyo wala magpasabot sa pagliyokliyok—o gani sa pagpadayon lang sa unahan. Nagpasabot nga pataas, padulong sa langit. Matag lakang paabante, dako o gamay, magdala kanimo paduol sa Manluluwas.
Wala madugay, gihulagway ni Elder Renlund ang espirituwal nga pag-uswag isip usa ka balikbalik ug iusab-usab nga proseso—balikbalik nga pagsunod sa ebanghelyo ni Kristo, pagpalambo sa atong kaugalingon ug pagpaduol sa Manluluwas sa matag liyok.
Bantayi unsa nga pulong ang wala niya gamita: tseklist. Ang ebanghelyo ni Jesukristo dili butang nga buhaton nimo og kausa ug dayon wala na. Ang pagkadisipulo mao ang butang nga imong sundon matag adlaw.
Ug bisan asa ka man diha sa dalan sa pakigsaad, sa kanunay ikaw makapaduol ni Kristo. Walay mga babag sa Iyang gugma.
Mas napaduol ngadto ni Jesukristo
Samtang naghulat ako inubanan sa paglaom alang sa pagminyo sa templo, nakakaplag ko og kalig-on gikan sa istorya sa apohan nga babaye ni Elder Renlund. Nagpuyo siya sa Finland dugay na sa wala pa ang templo matukod didto, mao nga wala gayod siya mahatagi sa pagtuga o maselyo sa iyang pamilya sa panahon sa iyang kinabuhi. Sa gihapon, siya "nagpakabuhi sama og siya nakadawat na niini nga mga pakigsaad,” nga naghatag kaniya og kalig-on sa paglahutay sa personal nga mga trahedya sa iyang kinabuhi.
Bisan og ako dili pa makahimo sa mga pakigsaad sa pagselyo, pwede ra kong magpakabuhi sama nga ako aduna niini. Makapaningkamot ra ko sa pagpalambo og Kristohanong mga kalidad. Makaadto ko sa templo kanunay kutob sa mahimo ug mobag-o sa mga pakigsaad nga akong gihimo pinaagi sa sinemana nga pag-ambit sa sakramento. Akong mahimo ang akong pagkadisipulo nga mao ako, dili lamang usa ka lista sa mga buluhaton nga akong buhaton.
Dugang pa, ang pakigsaad sa pagselyo lahi nga niana ikaw makaapil sa puli nga mga pagselyo sa dili pa ikaw maselyo alang sa imong kaugalingon. Nalipay ko nga akong makita ug madungog ang ordinansa alang sa akong kaugalingon busa nasayod ko sa eksakto gayod unsay gikinahanglan sa pakigsaad, ug nalipay nga mobati ko og kamaya sa mahangturong mga pamilya samtang magluhod ko dapit sa altar tungod og alang sa akong mga katigulangan. Ang pipila sa akong labing espirituwal nga mga gutlo didto sa templo nahitabo atol sa mga sesyon sa pagselyo.
Tanan kini nga butang nagtabang kanako sa pag-ugmad og suod nga relasyon sa akong Manluluwas, nga usa ka bililhong panalangin makuha man nako o dili ang pakigsaad sa pagkaselyo niining kinabuhia. Ang pagduol ngadto Kaniya usa ka positibo nga espirituhanong paglambo, ug samtang padayon ako nga magpaduol Kaniya kutob sa akong mahimo, Siya dili gayod mohikaw kanako sa Iyang gugma.