Gikan sa YA Matag Semana
Pagsul-ob sa Garment sa Templo
Ang tagsulat nagpuyo sa Colombia.
Ang pagsul-ob sa garment usa ka pribelihiyo nga akong nakuha sa matag adlaw nga pag-apil.
Sa dihang nabunyagan ko sa Simbahan ni Jesukristo sa mga Santos sa Ulahing mga Adlaw sa edad nga 17, akong nahibaloan ang mahitungod sa templo.
Ang oportunidad sa paghimo gani sa mas dugang pa nga mga pakigsaad uban sa Langitnong Amahan ug ni Jesukristo. Gikinahanglan ko kana sa akong kinabuhi.
Apan sa tinuod, unsay nakadasig kanako sa hilabihan sa pagpangandam nga makasulod sa templo mao ang pagkahibalo nga ang paghimo niini nga mga pakigsaad magtugot kanako sa pagkonektar ngadto sa Langitnong Amahan ug pagbatyag sa Iyang mga panalangin nga mas labaw kay sa kaniadto.
Sa dihang sa kataposan miabot na ang adlaw, sama kini katahom sa akong gidahoman. Apan ang espirituwal nga epekto sa akong kasingkasing mao sa kataposan nga pagsul-ob kanako sa garment sa templo. Nasayod ako nga ang pagsul-ob sa garment sa adlaw ug gabii usa ka bahin sa mga pakigsaad nga akong buhaton isip natugahan nga miyembro sa Simbahan, apan ang pagkat-on mahitungod sa mga panalangon nga gisimbolo niini mipuno kanako sa kalipay.
Ang pagsul-ob niining sagrado nga sapot matag adlaw nagpasabot og daghan pa kay sa akong gihunahuna. Ang mga mensahe sa kalibotan maghimo kanato sa pagtuo nga ang pagkatinugahan ug ang pagpakigsaad nga mosul-ob sa garment usa ka dako nga sakripisyo tungod kay mobalda kini sa mga uso sa sininaan, diin sa tinuod lang maoy nakapabalaka usab kanako sa wala pa ko makadawat sa pagtuga.
Apan ang garment sa templo dili mahitungod sa urog [fashion]—kining sagrado nga sapot usa ka simbolo sa pagkahimong disipulo ni Kristo.
Uban niini nga kahibalo, ang pagsul-ob sa garment dili gayod sakripisyo para kanako—usa kini ka pribilihiyo. Aniay pipila sa daghang paagi sa pagsul-ob sa garment nga magdala og kahayag sa kinabuhi.
1. Espirituhanong Gahom
Usa sa gisaad nga mga panalangin sa pagtuga sa templo mao ang espirituhanong gahom nga mahatag pinaagi sa pagtuman sa atong mga pakigsaad dinhi sa atong kinabuhi—gahom nga may igong kusog sa pagbuntog sa mga tentasyon sa kaaway.
Gibati ko kana nga kamatuoran sa akong kinabuhi. Akong nahunahuna nga nagpasabot kini nga ang mga tentasyon dili na makaapekto kanako, apan adunay mas daghan pa niini nga saad.
Ang garment nagpahinumdom kanako nga ako wala mag-inusara nga ang Langitnong Amahan ug si Jesukristo kanunay nga nag-uban kanako.
Si Presidente Russell M. Nelson (1924–2025) mipamatuod: “Diha sa templo, kita makadawat og panalipod gikan sa mga paghampak sa kalibotan. Kita makasinati sa tiunay nga gugma ni Jesukristo ug sa atong Langitnong Amahan sa dakong kaabunda! Kita mobati og kalinaw ug espirituhanong kasegurohan, nga sukwahi sa kagubot sa kalibotan.”
Kon mag-atobang ako og lisod nga mga hagit o mga tintasyon, ang akong mga pakigsaad magsilbi isip pahinumdom nga ang akong espiritu gustong magpabilin nga nahiuyon sa pamaagi sa Ginoo. Dili ako perpekto bahin niini, apan ang katahom sa Pag-ula ni Jesukristo mao nga sa matag adlaw ako mapuno sa espirituhanong gahom kon ako maghinulsol.
2. Hingpit nga Gugma
Sukad niadtong ako gisininaan sa garment sa templo sa unang higayon, akong gibati ang proteksiyon sa Dios sa paagi nga dili nako mahulagway. Akong naamgohan nga ingon og mas mabatyagan nako ang presensiya sa Dios ug ang Iyang gugma samtang naa ko sa Iyang balay. Akong naamgohan nga ang tanan nakong angay buhaton aron makabatyag sa Iyang presensya sa akong kinabuhi mao ang paggamit sa akong pagtuo ug pagsalig Kaniya matag adlaw. Ug kay ako nasayod man nga Siya nahigugma kanako sa hingpit, akong nakita ang akong pagpili nga mosul-ob sa akong mga garment matag adlaw isip usa ka buhat sa pagtuo ug pagsalig Kaniya.
Ang akong pahinumdom sa akong mga pakigsaad ngadto sa Langitnong Amahan naghimo kanako nga magmabination ug mahigugmaon sa uban dinhi sa kalibotan nga sa kasagaran dili mabination o malinawon agig balos.
Sigon sa tambag ni Presidente Nelson: "Samtang ang kalibotan nagkagrabe ang kadaotan, kinahanglan kitang molambo nga mas magkaputli. Ang atong mga hunahuna, mga pulong, ug mga buhat kinahanglan napuno sa hiyas ug putli nga gugma ni Kristo ngadto sa tanang tawo. Ang dakong oportunidad sa atong atubangan mao ang pagkahimong mga tawo nga gusto sa Dios nga kita mamahimo.”
Ang pagsul-ob sa garment sa templo matag adlaw nagpahinumdom kanako kon si kinsa ako ug kon si kinsa ako ug kon unsa ang gusto sa Dios nga ako mamahimo.
3. Koneksiyon ngadto kang Kristo
Ang pagdawat sa pagtuga ug paghimo og mga pakigsaad magkinahanglan og mga sakripisyo sa atong bahin, tingali lakip sa ubang mga kausaban sa atong mga kupo. Apan alang kanako, ang pagsakripisyo sa usa ka paborito nga blouse lisod ikompara ngadto sa unsay gisakripisyo sa Manluluwas nga isakripisyo alang kanako o sa pagbati sa gugma sa Dios.
Si Jesukristo mao ang tanan kanako. Nasayod ako nga ang Iyang labing dako nga tinguha alang kanako ug sa tanan nga anak sa Dios mao nga kita makabalik sa pagpakig-uban Kaniya. Mapasalamaton kaayo ako alang Kaniya ug kanunay nga gustong mopalawom sa akong koneksyon ngadto Kaniya.
Si Sister J. Anette Dennis, Unang Magtatambag sa Kinatibuk-ang Kapangulohan sa Relief Society, mihulagway sa unsang paagi ang pagsul-ob sa garment sa templo makausab sa atong relasyon ni Kristo: “Samtang ako magtuman sa akong mga pakigsaad ug mga obligasyon sa Dios, lakip na ang pagsul-ob sa garment sa balaan nga pagkapari, ang akong kinabuhi mismo mahimong usa ka personal nga simbolo sa akong gugma ug lawom nga pagpasalamat sa akong Manluluwas, si Jesukristo, ug sa akong tinguha nga makauban Siya nako kanunay.”
Nasayod ko nga dili ako perpekto, apan kanunay akong naningkamot nga mas mahisama ni Jesukristo. Ang pagpabiling matinud-anon sa akong pasalig nga mosul-ob sa garment sa templo matag adlaw nagpahinumdom kanako nga kinahanglan ako nga maka-akses sa balaanong gahom, nga ako konektado Kaniya, ug nga ako Iyang disipulo