Gikan sa YA Matag Semana
Sa Unsang Paagi ang Templo Nagtabang Kanako nga Mobati nga Naa sa Panimalay Dihang Mibalhin ko sa Laing Nasod
Ang mga kamatuoran sa templo naghupay kanako atol sa panahon sa padayon nga kausaban.
Human dayon sa pagpasakop sa Ang Simbahan ni Jesukristo sa mga Santos sa Ulahing mga Adlaw sa edad nga 19, mibalhin ko tadlas sa nasod gikan sa New York ngadto sa Idaho. Ang kalibog sa kultura nakapatingala kanako, ug naglibog ko sa mga sumbanan sa bag-o nakong relihiyon ug sa akong bag-o nga estado. Mibati ko nga nawala, padulong sa daghang lahilahi nga direksiyon.
Bisan human sa maminyo, nanglimbasog gihapon ko sa pagbati nga nag-inusara. Apan nausab kadto sa dihang nagsugod ko sa pagserbisyo sa templo.
Wala ko magdahom nga kadtong mga kasinatian sa templo nagtabang kanako nga mabuntog ang akong kasubo o kalibog sa kultura, apan dunay tulo ka paagi nga nahimo kini nga mao ang:
1. Paghinumdom sa Manluluwas
Ang pagserbisyo sa templo nakatabang nako sa pagkaamgo unsa kadako ang paningkamot sa paghimo sa templo nga usa ka prayoridad. Nagtugot kini nga makonekta ako sa mga miyembro sa Simbahan sa akong bag-ong panimalay ug sa pagsabot ngano ug giunsa nila sa pagsunod ang ebanghelyo.
Nagsugod ko sa pagkamatikod nga kadaghanan sa mga tawo motambong sa templo aron sa paghinumdom sa mga saad sa Manluluwas ug mas mahisama Kaniya.
Usahay sayon ra ang pagtutok kon unsay gipangbuhat sa tanan ug maputos sa kadaghan nga buluhaton sa kinabuhi. Mao diay nganong naglisod ko sa pagsabot sa lahilahi nga pamaagi sa tanan sa paghimo sa mga butang sa dihang bag-o kong mibalhin. Apan si Jesukristo miingon nga Siya mohatag og pahulay kon kita mosalig Kaniya (tan-awa sa Mateo 11:28–30). Mao nga dihang nabug-atan ko, akong naamgohan nga ang tanan nga kinahanglan nakong buhaton mao ang pagpunting sa akong kasingkasing ngadto Kaniya.
Ug ang pagkaanaa sa templo nakatabang kanako nga mahimo kana nga labing maayo! Si Presidente Russell M. Nelson (1924–2025) mitudlo: “Si Jesukristo mao ang rason nga kita magtukod og mga templo. Ang matag usa Iyang balaan nga balay." Kon magtutok kita ni Kristo, makakat-on kita sa pagkahimong mas manggiloy-on sa atong kaugalingon ug sa mga tawo sa atong palibot.
2. Pagkonektar sa Akong Pamilya
Ang pamilya mahinungdanon kaayo sa tanan ngari nako. Human nga nagpasakop ko sa Simbahan, nasayod ko nga ang pamilya nga akong gisugdan kauban sa akong bana mahimong mahangturon kon among gitahod ang among mga pakigsaad sa templo, apan ang akong mga ginikanan ug mga igsoon dili mga miyembro. Sila—ilabi na ang akong papa—naglisod sa pagsabot sa akong mga pagbati ug akong gituohan, ug duna silay daghan kaayong pangutana nga dili nako matubag sa kanunay.
Dihang mibati ko og kasubo ug nabug-atan bahin sa akong pamilya, mitambong ko usa ka sesyon sa pagtuga [endowment] sa Spanish, akong lumad nga pinulongan. Naghunahuna ko bahin sa akong papa. Ug mibati ko og kusog nga impresyon gikan sa Espiritu nga ang akong papa dunay oportunidad sa moabot nga adlaw sa pagkat-on mahitungod sa ug modawat sa akong gituohan.
Ang akong patriyarkal nga panalangin nagsaad usab nga mobati ako nga duol sa akong mga kaliwatan didto sa templo. Maong nagbuhat ko og daghan bahin sa buhat sa family history. Ang akong bana mihimo og proxy nga buhat alang sa akong lolo nga taga-Ecuador, nga nagtuman sa saad pinaagi sa usa ka emosyonal kaayong paagi alang nako. Nawad-an ko sa akong papa dihang kwatro anyos ko, ug ang pagserbisyo kaniya—ug sa uban sa akong mga katigulangan—didto sa templo nagpahinumdom kanako nga wala ako mag-inusara.
Si Elder Gerrit W. Gong sa Korum sa Napulog Duha ka Apostoles mipamatuod: “Ang pagkonektar ngadto sa atong mga katigulangan makausab sa atong kinabuhi sa makasurprisa nga mga paagi. Gikan sa ilang mga pagsulay ug mga kalamposan, kita makabaton og pagtuo ug kalig-on. Gikan sa ilang gugma ug mga sakripisyo, kita makat-on sa pagpasaylo ug mopadayon sa paglambo. … Ang atong mga anak mahimong lig-on. Kita makabaton og panalipod ug gahom. Ang koneksiyon uban sa mga katigulangan mopalambo sa kasuod sa pamilya, kamapasalamaton, mga milagro. Ang maong koneksiyon magdala og tabang gikan sa pikas habig sa tabil."
3. Nahibalo nga ang Dios Nakaila Kanako
Kon mosimba ko sa templo, kanunay nakong bation ang kumpirmasyon nga ang Dios nakaila kanako, bisan asa man ako. Kanunay akong mobati og pagbati sa kalinaw ug pagkapamilyar didto, sama sa pagpauli. Kini nakatabang kaayo atol sa panahon sa transisyon. Kay mapahinumdoman kon si kinsa gayod ako ug giunsa Niya sa pagtuman ang Iyang mga saad nagtabang kanako sa pagkaplag og lig-on nga tumbanan.
Nasayod ko nga matag usa kanato posibling naa sa managlahi nga dalan sa kinabuhi, apan isip mga anak sa Dios, tanan kita dungan nga nag-abante ngadto sa dalan sa pakigsaad padulong Kaniya.
Kon imong makita ang imong kaugalingon nga nag-atubang og dako kaayong kausaban sa kinabuhi, tingali lisod sa sinugdanan, apan salig lang sa Langitnong Amahan nga motabang nimo sa pag-adjust. Tambong sa tempo kanunay kon mahimo, ug kon dili man, pamalandong ug tutok lang sa gahom sa imong mga pakigsaad. Pagpakabuhi nga usa ka disipulo ni Kristo
Bisan unsay mahitabo, hibaloi nga Siya naggiya kanimo ug nga ang imong mga katigulangan nag-abiba kanimo.