Kaveinga ʻo e Māhina Ní: Feohi Fafalé mo e Fehokotakí

Mālō e Lelei, ngaahi kaungāmeʻa.

ʻI he taʻu nai ʻe nima kuohilí, ʻi hono kamataʻi mai ʻa e YA Fakauiké ko e makasini fakaʻilekitulōnika ʻa e Siasí maʻá e kakai lalahi kei talavoú, naʻe ʻikai ke mau ʻiloʻi ʻi heʻemau hoko ko e kau ngāué ʻa e lahi ʻo e meʻa te mau ako ʻo kau ki he ngaahi meʻa kehekehe lahi. ʻOku mau sio kotoa ki he ngaahi tefito ʻo e ongoongoleleí mei he anga ʻemau ngaahi fakakaukaú mo e aʻusiá, pea ʻi ai ha ngaahi tefito ʻoku mau tohi ʻo kau ki ai ʻoku ongo fakataautaha ange ia kiate kimautolu ʻi he ngaahi tefito kehé.

Ko ha tefito ʻe taha kuo mau ako lahi ange ki ai ʻi he ngaahi taʻu kuo hilí—fakafou ʻi ha ngaahi fepōtalanoaʻaki lahi ʻaupito mo e kakai lalahi kei talavoú, kau faleʻi fakaʻatamai, kau taki ʻo e Siasí, kau faifaleʻí, mo e niʻihi kehé—ko e mahuʻinga ʻo e fehokotakí.

Mahalo pē ʻoku ʻikai ko e meʻa ia naʻá ke ʻamanaki ki aí.

ʻOku mau ongoʻi hangē ʻoku mau ʻilo ki he meʻa ʻoku foua ʻe he kakai lalahi kei talavoú (he ko hono moʻoní, ko e tokolahi taha ʻo kimautolu ko e kau ngāué, ko ha kakai lalahi kei talavou). ʻOku mau fehangahangai mo ha ngaahi fili ngali taʻemalava ʻi he ʻaho kotoa pē ʻo kau ki he teití, akó, ngāue maʻuʻanga moʻuí, ngāue fakafaifekaú, founga ke fakaʻaongaʻi ai hotau taimí, founga ke matuʻuaki ʻaki e ngaahi ʻahiʻahi ʻo e māmaní, mo e founga ke tau hoko ai ko e kakai ʻoku finangalo e Tamai Hēvaní ke tau aʻusiá. ʻOku mau hohaʻa ki he ngaahi faingataʻa pe tōʻonga moʻui ʻoku mau ongoʻi he ʻikai ke tau lava ʻo hao mei aí. Ka ko e meʻa tēpuú, ʻoku hangē ʻoku fakamoleki ʻe ha tokolahi ʻo kitautolu ha taimi lahi ke ongoʻi tuenoa.

ʻOku fakamavaheʻi kitautolu ʻe he fai angahalá. ʻOku fakamavaheʻi kitautolu ʻe he loto-hohaʻa fakasōsialé pe ngaahi faingataʻa kehe ʻo e moʻui lelei fakaeʻatamaí. ʻOku fakamavaheʻi kitautolu ʻe he ponokālafí. ʻOku fakamavaheʻi kitautolu ʻe he māmani fakaʻilekitulōnika ko ʻení (he ko hono moʻoní, ʻoku ʻikai tatau ʻa e ngaahi kaungāmeʻa he ʻinitanetí mo e ngaahi kaungāmeʻa ʻoku tau feohí)

Te ke lava ʻo maʻu ʻi he māhiná ni ha ngaahi talanoa mei he kakai lalahi kei talavou kuo nau ongoʻi ʻoku fiemaʻu ha fehokotaki mo ha feohi fafale lahi ange ʻi heʻenau moʻuí. ʻOku kau ʻi he fanga kiʻi talanoa ko ʻení ʻa e:

• Faleʻi meia ʻEletā Iaki ʻo e Kau Fitungofulú ki he anga hono langa ha fehokotaki faka-Kalaisi ʻi ho ngaahi vā fetuʻutakí

• Ko ha tokotaha lahi kei talavou mei Palāsila ʻokú ne vahevahe ha ngaahi tōʻonga moʻui ʻe tokoni ke ne moʻui ʻaki e fono ʻo e angamaʻá

• Ngaahi fakakaukau ʻe tolu ki he founga te ke lava ai ʻo faʻu ha fehokotaki lahi ange ʻi he kōlomu ʻo e kaumātuʻá

• Ko ha tokotaha lahi kei talavou mei he ʻOtu Filipainí ʻoku ʻikai ke ne ongoʻi “māfana” ʻi heʻene fuofua teiti mo e tangata naʻe iku ʻo na mali kimui angé—mo e meʻa naʻá ne ongoʻí

• Ko ha fakamatala naʻe tohi ʻe ha taha ʻo e kau ngāué mo ha ngaahi fehuʻi ʻe nima ke ʻeke pē kiate koe kapau ʻokú ke fefaʻuhi mo e ponokālafí ka ʻokú ke fie teiti

ʻOku ʻi ai foki mo haʻamau ngaahi fakamatala ko ha konga ʻo ʻetau ngaahi talanoa hokohokó.

• Fakataha Lotu ʻOku ʻOatú: ʻOku ʻomi ʻe ʻEletā ʻEnitaseni ha faleʻi ʻe fā ki hono kumi ʻo e tokotaha totonu ke mali mo iá

• Ngaahi Taukei ʻo e Moʻuí: Ngaahi tefitoʻi moʻoni ʻo e ongoongoleleí ʻe lava ʻo tokoni ʻi hoʻo moʻui fakapalōfesinalé

• Ko Hono Fakaʻaongaʻi ʻo e Tokāteline mo e Ngaahi Fuakavá ki Hoʻo Moʻuí: Tokoni ki hoʻo ako ʻo e Haʻu, ʻo Muimui ʻIate Au mo ha talanoa ʻo kau kia Tōmasi B. Maasi pea mo e founga te tau lava ai ʻo vakai ki he niʻihi kehé ʻi hono maʻu ha mahino mo e manavaʻofa lahi ange

• Tautautefito ki he Kau Mali Foʻoú: Ko e founga te ke lava ai ʻo tuku ha taimi ʻi hoʻo nofo malí ki ho ngaahi vaivai fakataautahá, lolotonga hoʻomo ngāue fakataha ke fakatupulakí

ʻI heʻetau falala kia Sīsū Kalaisí, ʻoku foaki mai ai kiate kitautolu ha mālohi ke ikunaʻi hotau ngaahi vaivaí. Pea ʻi heʻetau fetuʻutaki mo e niʻihi kehé, te tau lava foki ʻo ʻiloʻi ʻoku ʻikai ko kitautolu pē ʻoku faingataʻaʻiá. ʻE lava ke tokoniʻi kitautolu ʻi heʻetau feinga ke hoko ko ha kau ākonga lelei ange ʻa Kalaisí. Pea te tau lava ʻo mateuteu ke fiefia ʻi he faʻahinga feohi fafale kehekehe ʻi hono kotoa ʻetau moʻuí.

ʻAki ʻa e ʻofa mo e ʻamanaki lelei lahi,

Kau ngāue ʻa e YA Fakauiké