ការបង្រៀនរបស់ថ្នាក់ដឹកនាំសាសនាចក្រ ៖ មេរៀនទី ២១៣
ការបង្រៀនរបស់ថ្នាក់ដឹកនាំសាសនាចក្រទី ៧
ការសិក្សា និងការអនុវត្តតាមការបង្រៀនរបស់ពួកអ្នកបម្រើរបស់ព្រះអម្ចាស់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ពួកអ្នកជំនាញបានប៉ាន់ប្រមាណថា នៅក្នុងឆ្នាំ១៤៤០ នៃគ.ស. មានសៀវភៅប្រមាណ៣០,០០០ក្បាលនៅទូទាំងអឺរ៉ុប ។ សព្វថ្ងៃនេះ មានសៀវភៅជាង១១,០០០ក្បាលបានបោះពុម្ពក្នុងមួយថ្ងៃ ។ គឺមានសៀវភៅថ្មីមួយក្បាលរៀងរាល់ប្រាំបីវិនាទីម្ដង !
ដោយមានព័ត៌មានច្រើនបែបនេះ អ្នករៀនដ៏ល្អបំផុតពុំមែនជាអ្នកដែលគ្រាន់តែអាចចូលប្រើព័ត៌មានទាំងនោះនោះទេ តែជាអ្នកដែលដឹងពីរបៀបតភ្ជាប់អ្វីដែលពួកគេកំពុងរៀននៅក្នុងរបៀបដ៏មានអត្ថន័យ ។
គោលបំណងមេរៀន ៖ ដើម្បីជួយអ្នករៀនពីរបៀបធ្វើការតភ្ជាប់ដ៏មានអត្ថន័យ នៅពេលអ្នកសិក្សាសុន្ទរកថាសន្និសីទទូទៅ ។
រៀនអំពីរបៀបធ្វើ
របៀបប្រើមេរៀននេះ
មេរៀននេះមានពីរផ្នែក ។ ផ្នែកទីមួយនឹងបង្រៀនអ្នកនូវជំនាញពីរដែលអាចជួយអ្នកឲ្យមានបទពិសោធន៍សិក្សាសារលិខិតសន្និសីទទូទៅកាន់តែមានអត្ថន័យ ។
នៅក្នុងផ្នែកទីពីរនៃមេរៀននេះ អ្នកនឹងប្រើជំនាញដែលអ្នកបានរៀនទាំងឡាយ ដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
ភ្ជាប់ការបង្រៀនទៅអ្វីដែលអ្នកដឹង
របៀបមួយដើម្បីធ្វើការតភ្ជាប់ដ៏មានអត្ថន័យគឺការផ្ដោតលើរបៀបដែលអ្វីដែលអ្នកកំពុងរៀន ទាក់ទងទៅនឹងអ្វីដែលអ្នកដឹងរួចហើយ ។ វគ្គបទគម្ពីរចំណេះចំណានខាងគោលលទ្ធិអាចជាចំណុចដ៏ល្អដើម្បីចាប់ផ្ដើម ។
ឧទាហរណ៍ នៅពេលអ្នកអានអត្ថបទខាងក្រោមមកពីអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ សូមគិតដល់វគ្គបទគម្ពីរចំណេះចំណានខាងគោលលទ្ធិ ដែលអាចទាក់ទងនឹងអ្វីដែលគាត់បានបង្រៀន ។
អ្នកខ្លះយល់ខុសចំពោះអត្ថន័យនៃការសន្យារបស់ព្រះថា ការស្តាប់បង្គាប់ទ្រង់អាចផ្តល់លទ្ធផលច្បាស់លាស់តាមកាលវិភាគជាក់លាក់ ។ ពួកគេប្រហែលជាគិតថា « បើខ្ញុំខិតខំបម្រើបេសកកម្មពេញម៉ោង នោះព្រះនឹងប្រទានពរដល់ខ្ញុំឲ្យមានអាពាហ៍ពិពាហ៍ និងមានកូនចៅដ៏រីករាយ » ឬ « បើខ្ញុំតមមិនធ្វើកិច្ចការសាលានៅថ្ងៃបរិសុទ្ធ នោះព្រះនឹងប្រទានពរដល់ខ្ញុំឲ្យទទួលបានចំណាត់ថ្នាក់ល្អ » ឬ « បើខ្ញុំថ្វាយដង្វាយមួយភាគក្នុងដប់ នោះព្រះនឹងប្រទានពរដល់ខ្ញុំដោយផ្តល់ការងារដែលខ្ញុំចង់បាន » ។ បើជីវិតមិនបានកើតឡើងតាមរបៀបជាក់លាក់ ឬតាមតារាងពេលវេលាដែលបានរំពឹងទុកទេ នោះពួកគេអាចនឹងមានអារម្មណ៍ថា ព្រះបានក្បត់ពួកគេ ។ ប៉ុន្តែនៅក្នុងកិច្ចការរបស់ព្រះ គ្រប់យ៉ាងមិនដូចគ្រឿងម៉ាស៊ីនទេ ។ យើងមិនគួរគិតថា ផែនការរបស់ព្រះជាកន្លែងលក់លោហធាតុ ជាកន្លែងដែលយើង ( ១ ) អាចជ្រើសរើសពរជ័យដែលចង់បាន ( ២ ) បញ្ចូលចំនួនសរុបនៃកិច្ចការល្អដែលតម្រូវឲ្យធ្វើហើយ ( ៣ ) ការបញ្ជាទិញត្រូវបានបញ្ចូនមកភ្លាមៗនោះទេ ។ ( « ទំនាក់ទំនងរបស់យើងជាមួយព្រះ » លីអាហូណា ខែឧសភា ឆ្នាំ២០២២ ទំព័រ ៧៨ )
ដង្វាយមួយភាគក្នុងដប់ ពរជ័យ បទបញ្ញត្ដិ
អ្នកប្រហែលបានភ្ជាប់សេចក្ដីថ្លែងការណ៍នេះជាមួយនឹងវគ្គបទគម្ពីរចំណេះចំណានខាងគោលលទ្ធិមួយខាងក្រោមនៅឆ្នាំនេះ ។
-
ម៉ាឡាគី ៣:៨–១០ ៖ ពរជ័យនៃការថ្វាយដង្វាយមួយភាគក្នុងដប់
-
និក្ខមនំ ២០:៣–១៧ ៖ បទបញ្ញត្តិទាំងដប់ប្រការ
-
សុភាសិត ៣:៥–៦ ៖ « ចូរទីពឹងដល់ព្រះយេហូវ៉ាឲ្យអស់អំពីចិត្ត … នោះទ្រង់នឹងតម្រង់អស់ទាំងផ្លូវច្រករបស់ឯង »
នៅពេលអ្នករកឃើញសេចក្ដីថ្លែងការណ៍ដែលមានអត្ថន័យនៅក្នុងសុន្ទរកថាដែលអ្នកសិក្សានៅថ្ងៃនេះ សូមប្រើបញ្ជី វគ្គបទគម្ពីរចំណេះចំណានខាងគោលលទ្ធិ ដើម្បីស្វែងរកបទគម្ពីរដែលទាក់ទងនឹងអ្វីដែលអ្នកកំពុងរៀន ។ នៅពេលអ្នករកឃើញបទគម្ពីរ ឬសន្និសីទទូទៅដែលត្រូវគ្នា សូមបង្កើតតំណភ្ជាប់រវាងសេចក្ដីថ្លែងការណ៍ និងវគ្គចំណេះចំណានខាងគោលលទ្ធិនេះ ។ ការណ៍នេះនឹងជួយអ្នកឲ្យយល់កាន់តែច្បាស់នូវសុន្ទរកថាដែលអ្នកសិក្សា ក៏ដូចជាខចំណេះចំណានខាងគោលលទ្ធិដែលអ្នកបានជ្រើសរើសផងដែរ ។
រកមើល និងបង្កើតបញ្ជី
របៀបមួយផ្សេងទៀតដើម្បីយល់ពីព័ត៌មានដ៏ច្រើនបែបនេះគឺដោយការប្រើបញ្ជី ។ អ្នកឡើងនិយាយខ្លះសរសេរសុន្ទរកថារបស់ពួកគាត់ជាទម្រង់បែបបញ្ជី ។ ឧទាហរណ៍ នៅក្នុងសម័យប្រជុំបព្វជិតភាពក្នុងខែមេសា ឆ្នាំ២០១៣ ប្រធាន ឌៀថើរ អេហ្វ អុជដូហ្វ កាលនោះនៅក្នុងគណៈប្រធានទីមួយ បានផ្ដល់ការឡើងនិយាយដែលមានចំណងជើងថា « ងារទាំងបួន » ។ នៅក្នុងនោះ លោកបានបង្រៀនអំពីងារបួនជាក់លាក់ដែលជួយយើងឲ្យយល់ដឹងពីតួនាទីរបស់យើងនៅក្នុងផែនការរបស់ព្រះ ៖
បុត្រានៃព្រះវរបិតាសួគ៌ …
សិស្សនៃព្រះយេស៊ូវគ្រីស្ទ …
អ្នកព្យាបាលដួងព្រលឹង …
អ្នកគ្រងមរតកនៃជីវិតអស់កល្ប ( « Four Titles » Ensign ឬ Liahona ខែឧសភា ឆ្នាំ២០១៣ ទំព័រ ៥៨–៦០ )
ពេលខ្លះទៀត អ្នកឡើងនិយាយអាចផ្ដល់នូវឧទាហរណ៍ជាច្រើន ហើយទុកឲ្យអ្នកធ្វើបញ្ជី ។ ឧទាហរណ៍ នៅក្នុងសុន្ទរកថារបស់លោក « ត្រូវការអ្នកដែលផ្សះផ្សាគេ » ប្រធាន រ័សុល អិម ណិលសុន បានលើកឡើងពីរបៀបជាច្រើនដើម្បីធ្វើជាអ្នកផ្សះផ្សាគេ ។ ខណៈដែលឧទាហរណ៍របស់លោកមិនត្រូវបានដាក់លេខរៀង អ្នកអានដ៏ម៉ត់ចត់អាចបង្កើតបញ្ជីអំពីរបៀបប្រាំយ៉ាងដើម្បីធ្វើជាអ្នកផ្សះផ្សាគេបានយ៉ាងងាយស្រួល ។
ទោះបីជាអ្នកនិពន្ធមិនមានបំណងដើម្បីបង្កើតបញ្ជីក្ដី ជាញឹកញាប់អ្នកអាចបង្កើតបញ្ជីមួយដោយខ្លួនឯងបាន ។ ឧទាហរណ៍ ជំហានខាងក្រោមអាចជួយអ្នកធ្វើបញ្ជីចេញពីស្ទើរតែគ្រប់សុន្ទរកថា ៖
-
សិក្សាសុន្ទរកថាប្រកបដោយការអធិស្ឋាន ហើយគូសសម្គាល់ឃ្លាដែលលេចធ្លោចំពោះអ្នក ។
-
បន្ទាប់ពីអ្នកអានរួចហើយ សូមពិនិត្យមើលឃ្លាដែលអ្នកបានគូសសម្គាល់ឡើងវិញ ។
-
ធ្វើកំណត់ចំណាំនៅជាប់នឹងសុន្ទរកថា ដោយប្រើពាក្យពេចន៍របស់អ្នកផ្ទាល់ ហើយរៀបរៀងនូវគំនិតសំខាន់បំផុតចំនួនប្រាំដែលអ្នកនិពន្ធបានចែកចាយ ។
ការធ្វើតាមលំនាំនេះអាចជួយអ្នកឲ្យអនុវត្ដអ្វីដែលអ្នកបានរៀន ហើយធ្វើការតភ្ជាប់ដ៏មានអត្ថន័យទៅនឹងការបង្រៀននោះ ។
នៅពេលអ្នកសិក្សាសុន្ទរកថាសន្និសីទនៅថ្ងៃនេះ សូមបង្កើតបញ្ជីយ៉ាងហោចណាស់មួយ ។ វាអាចជាបញ្ជីដែលអ្នកឡើងនិយាយបានបង្ហាញ ឬបញ្ជីដែលអ្នកបានបង្កើតផ្អែកលើសុន្ទរកថារបស់ពួកលោក ។
ឥឡូវត្រូវធ្វើដូចម្តេចទៀត ?
ថ្ងៃនេះអ្នកបានរៀនជំនាញពីរ ៖
-
ការភ្ជាប់ការបង្រៀនទៅអ្វីដែលអ្នកដឹង
-
ការរកមើល និងការបង្កើតបញ្ជី
សូមប្រើជំនាញទាំងនេះដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នករៀនពីរបៀបធ្វើការតភ្ជាប់ដ៏មានអត្ថន័យ នៅពេលអ្នកសិក្សាសុន្ទរកថាសន្និសីទទូទៅ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
បញ្ជីដែលអ្នកបានរកឃើញ ឬបានបង្កើត នៅពេលអ្នកសិក្សា ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?