ការបង្រៀនរបស់ថ្នាក់ដឹកនាំសាសនាចក្រ ៖ មេរៀនទី ២១០
ការបង្រៀនរបស់ថ្នាក់ដឹកនាំសាសនាចក្រទី ៤
ការសិក្សា និងការអនុវត្តតាមការបង្រៀនរបស់ពួកអ្នកបម្រើរបស់ព្រះអម្ចាស់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ពេលមើលពីផ្ទៃខាងលើ មហាសមុទ្រគឺអស្ចារ្យណាស់ ។ ផ្ទៃរបស់ផែនដីត្រូវបានគ្របដណ្ដប់ដោយផ្ទៃមហាសមុទ្រប្រមាណជា ៣៦១.៩ លានគីឡូម៉ែត្រការ៉េ ( ១៣៩.៥ លានម៉ាយល៍ការ៉េ ) ។ ទោះជាយ៉ាងនេះក្ដី ផ្ទៃខាងលើគ្រាន់តែជាការចាប់ផ្ដើមប៉ុណ្ណោះ ។ នៅចំណុចជ្រៅបំផុតរបស់វា មហាសមុទ្រមានជម្រៅរហូតដល់ ១១ គីឡូម៉ែត្រ ( ៧ ម៉ាយល៍ ) ក្រោមនីវ៉ូទឹកសមុទ្រ !
សន្និសីទទូទៅគឺដូចជាមហាសមុទ្រ ។ ខណៈដែលសុន្ទរកថានីមួយៗ គឺអស្ចារ្យពីខាងក្រៅ អ្នកដែលស្វែងយល់កាន់តែលម្អិត ជាញឹកញាប់នឹងរកឃើញអត្ថន័យថ្មីៗជាច្រើន ។
គោលបំណងមេរៀន ៖ ដើម្បីជួយអ្នកឲ្យស្វែងរករបៀបសិក្សាសុន្ទរកថាសន្និសីទទូទៅរបស់អ្នកឲ្យបានកាន់តែជ្រៅជ្រះ ។
រៀនអំពីរបៀបធ្វើ
របៀបប្រើមេរៀននេះ
មេរៀននេះមានពីរផ្នែក ។ ផ្នែកទីមួយនឹងបង្រៀនអ្នកនូវជំនាញពីរដែលអាចជួយអ្នកឲ្យមានបទពិសោធន៍សិក្សាសារលិខិតសន្និសីទទូទៅកាន់តែមានអត្ថន័យ ។
នៅក្នុងផ្នែកទីពីរនៃមេរៀននេះ អ្នកនឹងប្រើជំនាញដែលអ្នកបានរៀនទាំងឡាយ ដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
ប្រើលេខយោងដើម្បីធ្វើឲ្យការសិក្សាអ្នកឲ្យបានស៊ីជម្រៅ
សុន្ទរកថាសន្និសីទទូទៅជាមធ្យមគឺត្រឹមតែរយៈពេល១២នាទីប៉ុណ្ណោះ ។ ដោយពេលវេលាមានកំណត់ អ្នកឡើងនិយាយជាញឹកញាប់កាត់ព័ត៌មានខ្លះៗចេញពីសុន្ទរកថារបស់ពួកលោក ។ ជាសំណាងល្អ សុន្ទរកថាដែលបានបោះពុម្ពផ្សាយជាញឹកញាប់មាននូវលេខយោង ។ លេខយោងផ្ដល់នូវប្រភពដែលទាក់ទង និងព័ត៌មានបន្ថែមទៅលើប្រធានបទរបស់អ្នកឡើងនិយាយ ។ អ្នកអាចប្រើលេខយោងទាំងនេះដើម្បីធ្វើឲ្យការសិក្សាសន្និសីទទូទៅរបស់អ្នកកាន់តែទូលំទូលាយបាន ។
ឧទាហរណ៍ ប្រធាន អេមីលី បេលី ហ្វ្រីមែន ប្រធានយុវនារីទូទៅ បានបង្រៀន ការណ៍ខាងក្រោមនេះអំពី អិមម៉ា ស្ម៊ីធ ៖
ទីមួយ ព្រះអម្ចាស់បានរំឭកអិមម៉ាពីតួនាទីរបស់គាត់នៅក្នុងផែនការរបស់ទ្រង់ ដោយរួមទាំងថាតើគាត់ជានរណា និងមានចំណែកនៅឯណា—ជាបុត្រីម្នាក់នៅក្នុងនគររបស់ទ្រង់ ។ គាត់ត្រូវបានអញ្ជើញឲ្យ « ដើរតាមផ្លូវគុណធម៌ » ផ្លូវដែលបានរួមបញ្ចូលទាំងពិធីបរិសុទ្ធទាំងឡាយដែលអាចបើកបង្ហាញព្រះចេស្ដារបស់ព្រះ ប្រសិនបើអិមម៉ានៅជាប់នឹងសេចក្តីសញ្ញារបស់គាត់ ។ ( « រស់នៅឲ្យស្របតាមអភ័យឯកសិទ្ធិរបស់ក្មួយៗ » លីអាហូណា ខែវិច្ឆិកា ឆ្នាំ២០២៤ ទំព័រ ៨ )
ពិធីបរិសុទ្ធ សេចក្ដីសញ្ញា
នៅចុងបញ្ចប់នៃសេចក្តីថ្លែងការណ៍នោះ លេខ ១៦ តូចមួយ ដែលបានវាយជាលេខតូចមួយនៅខាងលើ បានលេចឡើងបន្ទាប់ពីពាក្យ សេចក្ដីសញ្ញា ។ លេខយោង ១៦ យោងទៅ គោលលទ្ធិ និងសេចក្ដីសញ្ញា ២៥:១៣ ( វិវរណៈដែលបានប្រទានដល់ អិមម៉ា ស្ម៊ីធ ) និងសម្រង់ខាងក្រោមចេញពីសៀវភៅដោយអែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ និងភរិយារបស់លោក គឺរ៉ូត ៖
ពាក្យ សេចក្តីសញ្ញា គឺមានដើមកំណើតចេញពីភាសាឡាតាំងគឺ con venire ហើយមានន័យពិតប្រាកដគឺ « មករួមគ្នា » ។ នៅក្នុងបរិបទនៃបព្វជិតភាព « សេចក្ដីសញ្ញា » គឺជាការមករួមគ្នា ឬការព្រមព្រៀងរវាងព្រះ និងមនុស្ស ។ វាសន្មតថាព្រះ និងមនុស្សមករួមគ្នាដើម្បីធ្វើកិច្ចសន្យា ដើម្បីឯកភាពលើការសន្យា ការយល់ព្រម អភ័យឯកសិទ្ធិ និងការទទួលខុសត្រូវទាំងឡាយ ។ ( ឌែល ជី រិនឡាន់ និង រ៉ូត លីប៊ើត រិនឡាន់ The Melchizedek Priesthood: Understanding the Doctrine, Living the Principles [ ឆ្នាំ២០១៨ ] ទំព័រ ៦០ ) ។
ការអានលេខយោងនោះអាចជួយអ្នកឲ្យយល់កាន់តែច្បាស់នូវអ្វីដែលប្រធាន ហ្វ្រីមែន កំពុងបង្រៀន ។ ការភ្ជាប់សេចក្ដីថ្លែងការណ៍របស់ប្រធាន ហ្វ្រីមែន ទៅនឹង គោលលទ្ធិ និងសេចក្ដីសញ្ញា ២៥:១៣ អាចជួយអ្នកឲ្យយល់ពីវគ្គបទគម្ពីរនោះនៅពេលក្រោយដែលអ្នកសិក្សាវា ។
នៅពេលអ្នកសិក្សានៅថ្ងៃនេះ សូមប្រើលេខយោងដើម្បីភ្ជាប់សេចក្ដីថ្លែងការណ៍មកពីថ្នាក់ដឹកនាំសាសនាចក្រយ៉ាងហោចណាស់ពីរទៅនឹងវគ្គបទគម្ពីរដែលវាជួយបញ្ជាក់ ។
សួរសំណួរអំពីអ្វីដែលអ្នកសិក្សា
របៀបមួយទៀតដែលអ្នកអាចធ្វើឲ្យការសិក្សារបស់អ្នកកាន់តែទូលំទូលាយគឺដោយការរកមើលឱកាសដើម្បីសួរសំណួរអំពីអ្វីដែលអ្នកបានសិក្សា ។
ឧទាហរណ៍ អែលឌើរ ផាទ្រីក ខៀរ៉ុន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ដោយសារផែនការដ៏ពេញដោយក្តីស្រឡាញ់របស់ព្រះវរបិតាសួគ៌សម្រាប់បុត្រាបុត្រីរបស់ទ្រង់ម្នាក់ៗ ហើយដោយសារព្រះជន្មដ៏ប្រោសលោះ និងបេសកកម្មរបស់ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ នោះយើងអាច—និងគួរតែ—ជាមនុស្សដ៏រីករាយបំផុតនៅលើផែនដីនេះ ! ( « សូមស្វាគមន៍មកកាន់សាសនាចក្រនៃអំណរ » លីអាហូណា ខែវិច្ឆិកា ឆ្នាំ២០២៤ ទំព័រ ៣៦ )
បន្ទាប់ពីអានសេចក្ដីថ្លែងការណ៍នោះរួចមក អ្នកអាចធ្វើកំណត់ចំណាំមួយ ដែលសួរសំណួរដូចជា « តើហេតុអ្វីការមានដំណឹងល្អគួរតែធ្វើឲ្យយើងជាមនុស្សដែលមានសេចក្ដីអំណរបំផុតនៅលើផែនដីនេះ ? »
នៅពេលអ្នកសិក្សានៅថ្ងៃនេះ សូមចំណាយពេលដើម្បី កត់ត្រាយ៉ាងហោចណាស់នូវសំណួរពីរ ទុកជាកំណត់ចំណាំនៅជាប់នឹងសេចក្ដីថ្លែងការណ៍ដែលបានបំផុសគំនិតឲ្យមានសំណួរនោះ ។ ទោះបីអ្នកមិនអាចឆ្លើយសំណួរនៅក្នុងវគ្គសិក្សានេះក្ដី ការចំណាយពេលដើម្បីកត់ត្រាសំណួរទាំងនោះគឺជាសកម្មភាពនៃសេចក្ដីជំនឿ ។
ឥឡូវត្រូវធ្វើដូចម្តេចទៀត ?
ថ្ងៃនេះអ្នកបានរៀនជំនាញពីរ ៖
-
ការប្រើប្រាស់លេខយោងដើម្បីធ្វើឲ្យការសិក្សារបស់អ្នកបានស៊ីជម្រៅ
-
ការសួរសំណួរអំពីអ្វីដែលអ្នកសិក្សា
សូមប្រើជំនាញទាំងនេះដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យស្វែងរករបៀបសិក្សាសុន្ទរកថាសន្និសីទទូទៅរបស់អ្នកឲ្យបានកាន់តែជ្រៅជ្រះ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
លេខយោងដែលអ្នកចូលចិត្ដដែលអ្នកបានរកឃើញ ហើយយ៉ាងហោចណាស់សំណួរមួយដែលអ្នកបានកត់ត្រា ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?