ការសិក្សាព្រះគម្ពីរ
ព្រះស្គាល់អ្នក ហើយស្រឡាញ់អ្នក ។ ទ្រង់សព្វព្រះទ័យធ្វើជាផ្នែកមួយនៅក្នុងជីវិតរបស់អ្នក ។ ទ្រង់គង់នៅក្បែរអ្នកក្នុងអំឡុងពេលលំបាក និងចែកចាយសេចក្តីអំណរជាមួយអ្នកក្នុងពេលរីករាយ ។ ទ្រង់បានជួយមនុស្សរាប់លាននាក់ ដែលធ្លាប់រស់នៅពីមុនអ្នក ។ មនុស្សមួយចំនួនទាំងនោះបានចែកចាយដំណើររឿងរបស់ពួកគេ ហើយវាត្រូវបានកត់ត្រានៅក្នុងព្រះគម្ពីរ ។ នេះគឺជាមគ្គទេសក៍ដើម្បីជួយអ្នកឲ្យដឹងពីរបៀបសិក្សាព្រះគម្ពីរ ។
ខិតកាន់តែជិតព្រះ
ការអានព្រះគម្ពីរគឺដូចជាការស្តាប់ដំណើររឿងអំពីព្រះ មកពីមនុស្សផ្សេងទៀតដែលស្គាល់ទ្រង់ផងដែរ ។ ការអានព្រះគម្ពីរអាចជួយអ្នកឲ្យដឹងថា តើព្រះគឺជានរណា និងតើទ្រង់មានលក្ខណៈដូចម្តេច ។ ប៉ុន្តែអ្នកត្រូវរៀនស្គាល់ព្រះនៅក្នុងជីវិតរបស់អ្នកផ្ទាល់ដោយខ្លួនឯង ។ នោះហើយជាមូលហេតុដែលយើងមិនគ្រាន់តែអានព្រះគម្ពីរប៉ុណ្ណោះទេ—គឺយើងសិក្សាវាដោយប្រុងប្រយ័ត្ន ។ ហើយនៅពេលយើងសិក្សាព្រះគម្ពីរ យើងមិនត្រឹមតែរកមើលព័ត៌មានប៉ុណ្ណោះទេ—គឺយើងចង់ប្រើអ្វីដែលយើងរៀន ដើម្បីខិតកាន់តែជិតព្រះ ។
ការខិតកាន់តែជិតព្រះនឹងមិនកើតឡើងតែនៅក្នុងថ្នាក់រៀននៅឯសាសនាចក្រនោះទេ—វានឹងកើតឡើង នៅពេលអ្នកសិក្សាព្រះគម្ពីរដោយខ្លួនឯង ។ នេះគឺជាគោលការណ៍ណែនាំមួយចំនួនស្ដីពីរបៀបសិក្សាព្រះគម្ពីរដោយខ្លួនឯង តាមវិធីដែលអាចជួយអ្នកឲ្យខិតកាន់តែជិតព្រះ ។
មុនពេលអ្នកចាប់ផ្ដើម
ស្វែងរកកន្លែងដែលអ្នកអាចសិក្សាដោយគ្មានការរំខាន ។ រៀបចំកន្លែងមួយដើម្បីសិក្សា ប្រសិនបើអ្នកត្រូវការ ។ ធ្វើឲ្យមានផាសុកភាព ប៉ុន្តែកុំដេកលក់ឲ្យសោះពេលអាន ! ដាក់អ្វីៗដែលមានប្រយោជន៍ ដូចជាសៀវភៅកំណត់ហេតុការសិក្សា ឬសៀវភៅសិក្សារបស់សាសនាចក្រនៅជិតដៃ ។
ជម្រះគំនិតរបស់អ្នកឲ្យបានស្អាតពីគំនិតរំខានណាមួយ ។ អ្នកអាចកត់ទុកការរំឭកសម្រាប់ខ្លួនឯង សម្រាប់អ្វីៗដែលអ្នកត្រូវធ្វើបន្ទាប់ពីការផ្តោតលើការសិក្សារបស់អ្នក ។
អធិស្ឋានទូលសូមជំនួយដើម្បីយល់ពីអ្វីដែលអ្នកសិក្សា ។ ព្រះអាចណែនាំអ្នកឲ្យសិក្សាអ្វីដែលនឹងជួយដល់អ្នកនៅពេលនេះ ។ សូមយាងអញ្ជើញទ្រង់ឲ្យជួយដល់អ្នក !
រៀបចំដួងចិត្តរបស់អ្នក ដើម្បីផ្តោតលើការខិតកាន់តែជិតព្រះ ។ ស្តាប់ ឬទន្ទេញចាំទំនុកបទនៃបទចម្រៀងសាសនាចក្រដើម្បីមានអារម្មណ៍ល្អ ។
ក្នុងអំឡុងការសិក្សារបស់អ្នក
ស្វែងយល់ពីបទគម្ពីរដែលអ្នកកំពុងសិក្សា ។ អ្នកអាចអានចំណងជើងជំពូក ឬក្បាលកណ្ឌ ដើម្បីស្វែងយល់ពីដំណើររឿងព្រះគម្ពីរដែលអ្នកកំពុងអាននោះ ។ អ្នកក៏អាចរកឃើញព័ត៌មានដ៏មានប្រយោជន៍នៅក្នុងជំនួយការសិក្សាបានផងដែរ ដូចជាវចនានុក្រមព្រះគម្ពីរប៊ីប ឬសេចក្ដីណែនាំដល់បទគម្ពីរទាំងឡាយ ប្រសិនបើវាមានជាភាសារបស់អ្នក ។
គូសសម្គាល់បទគម្ពីររបស់អ្នក ( សូមមើលផ្នែក « ការគូសសម្គាល់បទគម្ពីររបស់អ្នក » ) ។ ការគូសសម្គាល់បទគម្ពីររបស់អ្នកគឺជាវិធីដ៏ល្អមួយ ដើម្បីចងចាំអ្វីដែលអ្នកបានរៀន នៅពេលអ្នកសិក្សា ។ មានវិធីជាច្រើនដែលអ្នកអាចគូសសម្គាល់បទគម្ពីររបស់អ្នកបាន មិនថាវាជាព្រះគម្ពីរបោះពុម្ព ឬឌីជីថលនោះទេ ។
កត់ត្រាសំណួរណាមួយដែលអ្នកមាន ។ អ្នកអាចមានសំណួរអំពីគំនិត ឬពាក្យពេចន៍ដែលអ្នកកំពុងអាន ។ សូមសរសេរសំណួររបស់អ្នកទុកនៅក្នុងព្រះគម្ពីររបស់អ្នក ឬនៅក្នុងសៀវភៅកត់ចំណាំរបស់អ្នក ដើម្បីអ្នកអាចត្រឡប់មករកវាវិញនៅពេលក្រោយ ។
សិក្សាបទគម្ពីរដែលទាក់ទង ។ អ្នកអាចរកឃើញបទគម្ពីរដែលទាក់ទង ដោយប្រើជំនួយការសិក្សាដូចជា លេខយោង Topical Guide ឬប្រធានបទ និងសំណួរជាដើម ។ បទគម្ពីរដែលទាក់ទងអាចបង្កើនការយល់ដឹងរបស់អ្នកអំពីប្រធានបទមួយបាន ។
នៅពេលអ្នកបញ្ចប់
កត់ត្រាអ្វីដែលអ្នកបានរៀន ។ នៅពេលអនាគត អ្នកអាចត្រឡប់មកវិញ ហើយចងចាំអ្វីដែលអ្នកបានរៀន ប្រសិនបើអ្នកកត់ត្រាវាទុក ។ ការកត់ត្រាអ្វីដែលអ្នករៀនក៏បង្ហាញដល់ព្រះផងដែរថា អ្នកឲ្យតម្លៃអ្វីដែលទ្រង់បានបង្រៀនអ្នក ។
រស់នៅតាមអ្វីដែលអ្នកបានរៀន ។ នៅពេលអ្នកសិក្សា សូមសួរខ្លួនឯងថា « តើការណ៍នេះទាក់ទងនឹងខ្ញុំ និងជីវិតរបស់ខ្ញុំយ៉ាងដូចម្តេច ? » ពេលខ្លះ សំណួរនេះអាចពិបាកនឹងឆ្លើយ ។ ដំណើររឿងព្រះគម្ពីរត្រូវបានកត់ត្រាទុករាប់រយ ឬរាប់ពាន់ឆ្នាំមកហើយ ។ ប៉ុន្តែមានរឿងមួយចំនួននៅក្នុងដំណើររឿងទាំងនេះ ដែលមនុស្សទាំងអស់ដកបទពិសោធន៍ ដែលអ្នកអាចយល់បាន ។ អ្នកប្រហែលជាអាចមើលឃើញខ្លួនឯងនៅក្នុងបុគ្គលម្នាក់នៅក្នុងដំណើររឿង ដែលអ្នកបានសិក្សាទាំងនេះ ។
ចែកចាយអ្វីដែលអ្នកបានរៀន ។ អ្នកនឹងមានឱកាសចែកចាយអ្វីដែលអ្នកកំពុងរៀនជាមួយនរណាម្នាក់ទៀត ។ ការណ៍នេះអាចកើតឡើងជាមួយគ្រួសាររបស់អ្នក នៅក្នុងថ្នាក់រៀននៅសាសនាចក្រ ឬសូម្បីតែនៅក្នុងការសន្ទនាធម្មតាៗជាមួយមិត្តភក្តិ ។ វាជារឿងធម្មតាទេ ដែលមានអារម្មណ៍ភ័យខ្លាចអំពីការចែកចាយអ្វីដែលអ្នកកំពុងរៀន ។ នៅពេលអ្នកចែកចាយ សូមព្យាយាមផ្តោតលើរបៀបដែលអ្វីដែលអ្នកបានរៀន កំពុងជួយដល់អ្នកនៅក្នុងជីវិតរបស់អ្នក ។
សូមនិយាយជាមួយអ្នកដទៃអំពីរបៀបកែលម្អការសិក្សារបស់អ្នក ។ ប្រសិនបើវាពិបាកសម្រាប់អ្នកក្នុងការសិក្សាព្រះគម្ពីរ នោះវាមិនអីទេ ! សូមព្យាយាមសួរអ្នកដទៃរកមើលគំនិតអំពីរបៀបដែលពួកគេសិក្សាព្រះគម្ពីរ ។