ការបង្រៀនរបស់ថ្នាក់ដឹកនាំសាសនាចក្រ ៖ មេរៀនទី ២០៧
ការបង្រៀនរបស់ថ្នាក់ដឹកនាំសាសនាចក្រទី ១
ការសិក្សា និងការអនុវត្តតាមការបង្រៀនរបស់ពួកអ្នកបម្រើរបស់ព្រះអម្ចាស់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅថ្ងៃទី១៨ ខែមីនា ឆ្នាំ១៩៦៥ អវកាសយានិកជនជាតិសូវៀត ឈ្មោះ អាឡិចស៊ី លេអូណូវ បានបើកទ្វារយានអវកាស វ៉ូស្កុដ ២ ( Voskhod 2 ) ។ គាត់រៀបនឹងធ្វើអ្វីមួយដែលពុំមាននរណាម្នាក់ធ្លាប់បានធ្វើពីមុនឡើយ ៖ ការបណ្ដែតខ្លួនដោយសេរីនៅក្នុងទីអវកាស ។ ខណៈដែលគាត់មានបច្ចេកវិទ្យាល្អបំផុតដែលអាចរកបាន ឧបករណ៍សំខាន់បំផុតគឺខ្សែស្តើងប្រវែង ៤.៨ ម៉ែត្រ ( ១៦ ហ្វីត ) ដែលភ្ជាប់ខ្លួនគាត់ទៅនឹងយានអវកាស ។ បើគ្មានខ្សែនេះទេ នោះលោកលេអូណូវ អាចនឹងរសាត់បាត់នៅក្នុងលំហ ដោយគ្មានឱកាសអាចនឹងជួយសង្គ្រោះគាត់បានឡើយ ។
ដូចគ្នានឹងខ្សែចងភ្ជាប់របស់លោកលេអូណូវ ទៅនឹងយានអវកាសរបស់គាត់ដែរ ទំនាក់ទំនងរបស់អ្នកទៅនឹងព្រះគ្រីស្ទគឺជាកូនសោទៅរកសុខសុវត្ថិភាពខាងវិញ្ញាណរបស់អ្នក ។ ការផ្ដោតដោយមានចេតនាទៅលើទំនាក់ទំនងនោះនៅគ្រប់ពេលដែលអ្នកសិក្សាសុន្ទរកថាសន្និសីទទូទៅ គឺជារបៀបមួយដើម្បីធានាបាននូវបទពិសោធន៍សិក្សាដ៏មានអត្ថន័យ ។
គោលបំណងមេរៀន ៖ ដើម្បីជួយអ្នករៀនពីរបៀបធ្វើឲ្យការសិក្សាសន្និសីទទូទៅរបស់អ្នកកាន់តែប្រសើរឡើងដោយការផ្ដោតលើព្រះយេស៊ូវគ្រីស្ទ ។
រៀនអំពីរបៀបធ្វើ
របៀបប្រើមេរៀននេះ
មេរៀននេះមានពីរផ្នែក ។ ផ្នែកទីមួយនឹងបង្រៀនអ្នកនូវជំនាញពីរដែលអាចជួយអ្នកឲ្យមានបទពិសោធន៍សិក្សាសារលិខិតសន្និសីទទូទៅកាន់តែមានអត្ថន័យ ។
នៅក្នុងផ្នែកទីពីរនៃមេរៀននេះ អ្នកនឹងប្រើជំនាញដែលអ្នកបានរៀនទាំងឡាយ ដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
គូសសម្គាល់ព្រះបរមងារ និងគុណលក្ខណៈរបស់ព្រះយេស៊ូវគ្រីស្ទ
របៀបមួយដើម្បីផ្ដោតលើព្រះគ្រីស្ទ នៅពេលអ្នកសិក្សាសុន្ទរកថាសន្និសីទទូទៅ គឺការរកមើល និងការគូសសម្គាល់ព្រះបរមងារ និងគុណលក្ខណៈរបស់ទ្រង់ ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ បានបង្រៀនដូចតទៅនេះ ៖
ការដើរតាមព្រះគ្រីស្ទគឺការប្រែក្លាយកាន់តែដូចជាទ្រង់ ។ វាគឺជាការៀនពីចរិតលក្ខណៈរបស់ទ្រង់ ។ …
… គុណលក្ខណៈដូចជាព្រះគ្រីស្ទគឺជាគ្រឹះ ។ គុណលក្ខណៈទាំងនោះគឺជាគោលការណ៍មូលដ្ឋាន ។ ( « Christlike Attributes—the Wind beneath Our Wings » Liahona ខែវិច្ឆិកា ឆ្នាំ២០០៥ ទំព័រ ១០២, ១០៣ )
ប្រធាន រ័សុល អិម ណិលសុន បានពង្រីកការបង្រៀននោះ នៅពេលដែលលោកបង្រៀន ៖
សូមសិក្សាអ្វីគ្រប់យ៉ាងដែល ជា ព្រះយេស៊ូវគ្រីស្ទដោយការអធិស្ឋាន និងដោយការខិតខំស្វះស្វែងដើម្បីយល់ពីអ្វីដែលព្រះបរមងារ និងព្រះនាមនីមួយៗរបស់ទ្រង់មានន័យសម្រាប់អ្នក ផ្ទាល់ ។ ឧទាហរណ៍ ទ្រង់ពិតជាព្រះគាំទ្រ របស់អ្នក ជាមួយនឹងព្រះវរបិតា ។ ( « Prophets, Leadership, and Divine Law » [ ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក ថ្ងៃទី៨ ខែមករា ឆ្នាំ២០១៧ ] នៅក្នុងបណ្ណាល័យដំណឹងល្អ )
នៅពេលអ្នកសិក្សាសុន្ទរកថាសន្និសីទទូទៅថ្ងៃនេះ សូមធ្វើតាមដំបូន្មានរបស់អែលឌើរ អុជដូហ្វ និងប្រធាន ណិលសុន ។ សូមផ្តោតលើព្រះបរមងារ និងគុណលក្ខណៈរបស់ព្រះគ្រីស្ទ ។ រាល់ពេលដែលអ្នករកឃើញព្រះបរមងារ ឬគុណលក្ខណៈមួយ សូមគូសសម្គាល់វាតាមរបៀបពិសេសមួយ ។ អ្នកអាចជ្រើសរើសពណ៌ថ្មីមួយ ឬដាក់សញ្ញាផ្កាយនៅជាប់នឹងវគ្គបទគម្ពីរនោះ ។
ដាក់ស្លាកគុណលក្ខណៈនៃព្រះគ្រីស្ទ
ការគូសសម្គាល់គឺជាវិធីដ៏ល្អបំផុតមួយដើម្បីកំណត់គុណលក្ខណៈនៃព្រះគ្រីស្ទដែលអ្នកឡើងនិយាយបានឃើញ ។ ដើម្បីធ្វើឲ្យការសិក្សារបស់អ្នកកាន់តែប្រសើរ សូមរកមើលគុណលក្ខណៈនៃព្រះគ្រីស្ទដែលមិនបានលើកឡើងជាក់លាក់នៅក្នុងសុន្ទរកថាដែលអ្នកសិក្សា ។ ការដាក់ស្លាកគុណលក្ខណៈទាំងនេះនឹងជួយអ្នកឲ្យស្គាល់ព្រះគ្រីស្ទនៅក្នុងសុន្ទរកថាដែលអ្នកសិក្សា ហើយធ្វើឲ្យវាងាយស្រួលក្នុងការរកឃើញសេចក្ដីថ្លែងការណ៍នោះ នៅពេលអ្នកត្រូវការវានៅពេលក្រោយ ។
ឧទាហរណ៍ស៊ីស្ទើរ គ្រីស្ទីន អិម យី ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ បានចែកចាយដំណើររឿងអំពីការធ្វើឲ្យខូចរូបគំនូរព្រះយេស៊ូវគ្រីស្ទ ដែលគាត់ទើបនឹងគូររួចដោយចៃដន្យ ។ បន្ទាប់មកគាត់បានចែកចាយ ៖
ដូច្នេះ ខ្ញុំបានអធិស្ឋាន ហើយអង្វរសូមជំនួយ ហើយបានគូរពេញមួយយប់ដើម្បីជួសជុលផ្នែកនោះ ។ ហើយខ្ញុំចាំថា ពេលខ្ញុំមើលរូបគំនូរនោះនៅពេលព្រឹក—វាមើលទៅល្អជាងមុនទៅទៀត ។ តើវាអាចកើតឡើងយ៉ាងម៉េចបាន ? អ្វីដែលខ្ញុំគិតថាជាកំហុសដែលមិនអាចកែប្រែបាន គឺជាឱកាសមួយដែលបើកឲ្យព្រះហស្តដ៏មេត្តាករុណារបស់ទ្រង់បានបង្ហាញឡើង ។ ទ្រង់មិនទាន់បញ្ចប់រូបគំនូរនោះទេ ហើយទ្រង់ក៏មិនទាន់បញ្ចប់ជាមួយខ្ញុំដែរ ។ អំណរ និងការធូរស្បើយយ៉ាងខ្លាំងក្លាបានបំពេញដួងចិត្តរបស់ខ្ញុំ ។ ខ្ញុំបានសរសើរតម្កើងព្រះអម្ចាស់ចំពោះសេចក្តីមេត្តាករុណារបស់ទ្រង់ សម្រាប់អព្ភូតហេតុនេះ ដែលមិនគ្រាន់តែបានជួយស្រោចស្រង់រូបគំនូរនោះប៉ុណ្ណោះទេ ប៉ុន្តែបានបង្រៀនខ្ញុំបន្ថែមទៀតអំពីសេចក្តីស្រឡាញ់ និងព្រះចេស្ដារបស់ទ្រង់ក្នុងការសង្គ្រោះយើងម្នាក់ៗពីកំហុស ភាពទន់ខ្សោយ និងអំពើបាបរបស់យើង ហើយជួយយើងឲ្យក្លាយជាមនុស្សល្អប្រសើរ ។ ( « អំណរនៃសេចក្តីប្រោសលោះ » លីអាហូណា ខែវិច្ឆិកា ឆ្នាំ២០២៤ ទំព័រ ៥៧ )
ស៊ីស្ទើរ យី បានលើកឡើងថា ព្រះគ្រីស្ទគឺមាននូវសេចក្ដីមេត្ដាករុណា សេចក្ដីស្រឡាញ់ និងមាននូវព្រះចេស្ដា ។ អ្នកអាចគូសសម្គាល់គុណលក្ខណៈទាំងនោះ នៅពេលអ្នកសិក្សា ។
គាត់ក៏បានលើកឡើងដែរថា ទ្រង់បានជួយសង្គ្រោះរូបគំនូររបស់គាត់ ហើយជួយសង្គ្រោះយើងម្នាក់ៗ ។ ខណៈដែលគាត់មិនដែលបានមានប្រសាសន៍ជាក់លាក់អំពីព្រះបរមងារ ឬគុណលក្ខណៈ អ្នកអាចពិចារណាដាក់ស្លាកអត្ថបទនោះថា « ព្រះអង្គសង្គ្រោះ » ឬ « ព្រះប្រោសលោះ » ។
នៅពេលអ្នកសិក្សានៅថ្ងៃនេះ សូមរកមើលព្រះបរមងារ និងគុណលក្ខណៈនៃព្រះគ្រីស្ទដែលត្រូវបានលើកឡើងច្បាស់ៗ ឬបានបង្កប់ន័យ ។ ការដាក់ស្លាកគុណលក្ខណៈដែលអ្នកបានរកឃើញ នឹងជួយឲ្យអ្នកមានភាពងាយស្រួលក្នុងការភ្ជាប់អ្វីដែលអ្នករៀនទៅនឹងព្រះគ្រីស្ទ ។
ឥឡូវត្រូវធ្វើដូចម្តេចទៀត ?
ថ្ងៃនេះអ្នកបានរៀនជំនាញពីរ ៖
-
ការគូសសម្គាល់ព្រះបរមងារ និងគុណលក្ខណៈរបស់ព្រះយេស៊ូវគ្រីស្ទ
-
ការដាក់ស្លាកគុណលក្ខណៈរបស់ព្រះយេស៊ូវគ្រីស្ទ
សូមប្រើជំនាញទាំងនេះដើម្បីសិក្សាសុន្ទរកថាសន្និសីទទូទៅដែលបានចាត់តាំងដោយគ្រូបង្រៀនរបស់អ្នក ។ ប្រសិនបើមិនមានសារលិខិតមួយត្រូវបានចាត់តាំងឲ្យអ្នកទេ សូមជ្រើសរើសសុន្ទរកថាមួយមកពី សន្និសីទទូទៅ ថ្មីៗនេះ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នករៀនពីរបៀបធ្វើឲ្យការសិក្សាសន្និសីទទូទៅរបស់អ្នកកាន់តែប្រសើរឡើងដោយការផ្ដោតលើព្រះយេស៊ូវគ្រីស្ទ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
យ៉ាងហោចណាស់ព្រះបរមងារ ឬគុណលក្ខណៈបីដែលអ្នកបានគូសសម្គាល់ ឬដាក់ស្លាកនៅក្នុងសុន្ទរកថាដែលអ្នកបានសិក្សា ។ តើព្រះបរមងារ ឬគុណលក្ខណៈទាំងនោះបានជួយធ្វើឲ្យបទពិសោធន៍របស់អ្នកកាន់តែទូលំទូលាយយ៉ាងដូចម្ដេច ?
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?