“Sukda ang Imong Nakat-onan 6: 1 Mga Hari 17–Ester,” Manwal sa Magtutudlo sa Seminary sa Daang Tugon (2026)
“Sukda ang Imong Nakat-onan 6: 1 Mga Hari 17–Ester,” Manwal sa Magtutudlo sa Seminary sa Daang Tugon
Ester: Leksiyon 96
Sukda ang Imong Nakat-onan 6
1 Mga Hari 17–Ester
Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Langitnong Amahan ug ni Jesukristo. Kini nga leksiyon gidisenyo aron tabangan ang mga estudyante nga pamalandongan ang mga tumong nga ilang gitakda ug ang paglambo nga ilang nasinati sa ilang pagtuon sa 1 Mga Hari 17–Ester.
Pagpangandam sa estudyante: Dapita ang mga estudyante sa pagtambong nga andam sa pagpakigbahin og tudling sa kasulatan nga makahuloganon para nila gikan sa ilang pagtuon sa Daang Tugon. Hangyoa sila nga maghunahuna kon sa unsang paagi nakatabang nila ang maong tudling sa pagsunod kang Jesukristo.
Posibleng mga Kalihokan sa Pagkat-on
Ang pagtuon sa imong klase sa 1 Mga Hari 17–Ester nagpunting tingali sa managlahi nga mga resulta kay niadtong gisukod niini nga leksiyon. Kon mao, ipahiangay ang mga kalihokan sa pagsukod sa nasinati nga pag-uswag sa mga estudyante gikan sa mga resulta nga gitutokan sa imong klase.
Niini nga leksiyon, makabaton og higayon ang mga estudyante nga masukod ang ilang paglambo sa mosunod nga mga bahin:
-
Pagbati og dugang tinguha sa pagsalig sa Ginoo alang sa kalig-on ug kaluwasan. (Timan-i: Kini nga kalihokan gibase sa mga pagtulun-an gikan sa Leksiyon 74: “1 Samuel 17”; Leksiyon 85: “2 Mga Hari 6”; Leksiyon 86: “2 Mga Hari 18–20”; Leksiyon 95: “Ester Bahin 2.”)
-
Pagkahimong disipulo ni Jesukristo. (Timan-i: Kini nga kalihokan makakuha sa bisan unsang leksiyon nga nagpunting sa paghimo og plano o pagtakda og tumong aron magamit. Wala gidahoman nga nalista sa mga estudyante ang kada leksiyon nga naay kalihokan aron andam para niini nga pagsukod.)
Espirituhanong Paglambo
Dapita ang mga estudyante sa pagkompara sa ilang gitas-on karon og niadtong bata pa sila.
Pwede nimong ipakita ang hulagway sa sinugdanan sa leksiyon.
-
Sa unsang paagi ang pag-ila sa kausaban sa atong gitas-on ikatandi sa pag-ila sa atong espirituwal nga paglambo?
-
Unsa ang pipila ka paagi nga atong maila ang atong paglambo sa espirituwal ug mas mahisama sa Manluluwas?
Samtang hisgotan sa mga estudyante kining mga pangutanaha, pwede nimo silang tabangan nga mamatikdan nga ang kabag-ohan sa atong gitas-on dili mailhan kada adlaw, mailhan kini paglabay sa panahon. Sa samang paagi, ang atong espirituwal nga paglambo sagad mamatikdan lang dihang atong susihon ang atong kinabuhi paglabay sa panahon. Pananglitan, tingali atong mabati ang kalig-on sa paghimog maayo (tan-awa sa Mosiah 5:2), mahimong mas regular sa atong pag-ampo ug pagtuon sa kasulatan, o trataron ang uban sa dugang gugma.
Dapita ang mga estudyante sa pagpamalandong sa ilang nakat-onan sa klase sa milabayng pipila ka semana ug ang bisan unsang espirituwal nga impresyon nga ila tingaling nadawat. Pwedeng rebyohon sa mga estudyante ang ilang mga nasulat sa ilang journal ug ang mga kasulatan nga ilang gibasa o gimarkahan. Ikonsiderar ang pagdapit sa mga estudyante nga tubagon ang mosunod nga mga pangutana diha sa ilang journal sa pagtuon sa dili pa hisgotan sa klase.
-
Unsay imong nakat-onan o gibati panahon sa imong pagtuon sa Daang Tugon?
-
Sa unsang mga paagi ang mga kamatuoran nga imong nakat-onan ug gigamit nakatabang nimo sa pagsunod ni Jesukristo?
Mobati og dugang nga tinguha nga mosalig sa Ginoo alang sa kalig-on ug kaluwasan
Samtang gitun-an sa mga estudyante ang Daang Tugon, nadasig tingali sila sa mga ehemplo sa mga indibidwal nga gipanalanginan sa Ginoo nga misalig Kaniya alang sa kusog ug kaluwasan.
Ikonsiderar ang pagpakita sa mosunod nga mga pamahayag aron makatabang sa mga estudyante nga mahinumdoman ang mga ehemplo nga bag-ohay lang nilang gitun-an. Ang usa ka paagi sa pagbuhat niini mao ang pagpakita sa mosunod nga pamahayag nga dili apil ang mga ngalan sa namulong. Ilista ang mga ngalan nga dili pasunod. Dayon dapita ang mga estudyante nga ipares kon kinsay nagsulti sa pamahayag.
Kon posible, pwede pod nimong ipakita ang mga hulagway nga konektado sa kada indibidwal.
David—“Miduol ka kanako dala ang imong espada ug bangkaw apan ako makigsangka kanimo sa ngalan sa Ginoo nga Labing Gamhanan, ang Dios sa kasundalohan sa Israel” (1 Samuel 17:45).
Eliseo—“Ayaw kahadlok kay ang ania uban kanato mas daghan kay niadtong uban kanila” (2 Mga Hari 6:16).
Ezequias—“Pagmalig-on ug pagmaisog kamo. Ayaw kamo kahadlok … kay may mas gamhanan nga ania kanato kay kaniya. Gahom sa tawo ang iyang gisaligan apan uban kanato mao ang Ginoo nga atong Dios aron pagtabang ug pagpakig-away alang kanato” (2 Cronicas 32:7–8).
Ester—“Magpuasa usab ako ug ang akong mga sulugoong babaye. Unya moadto ako sa hari bisag supak kini sa balaod. Ug kon mamatay ako, mamatay ako” (Ester 4:16).
Pwede nimong pahinumdoman ang mga estudyante sa mga kalihokan gikan sa mga leksiyon bahin niini nga mga indibidwal. Makatabang kini sa mga estudyante nag mahinumdoman ang mga pagbati ug mga impresyon nga anaa tingali nila panahon sa ilang pagtuon.
Pwedeng mahinumdoman sa mga estudyante ang bato nga ilang gidrowing nga nagrepresenta sa usa ka paagi sa pagpakitag pagtuo kang Jesukristo uban ang ilang hagit sa Leksiyon 74: “1 Samuel 17.”
Pwedeng mahinumdoman sa mga estudyante ang mga lista sa mga paagi sa pagbantay ug pag-atiman sa Ginoo kanato diha sa Leksiyon 85: “2 Mga Hari 6.”
Pwedeng hinumdoman sa mga estudyante kon giunsa pagluwas sa Ginoo si Haring Ezequias ug ang mga Judeo diha sa Leksiyon 86: “2 Mga Hari 18–20.”
Mahinumdoman tingali sa mga estudyante kon giunsa nila pag-usab sa mga pulong sa Ester 4:16 diha sa Leksiyon 95: “Ester Bahin 2.”
-
Sa unsang paagi ka nadasig sa mga paagi nga gipanalanginan sa Ginoo ang usa o daghan pa niini nga mga indibidwal?
Human marebyo ang mga asoy sa kasulatan, dapita ang mga estudyante sa pagpamalandong sa kaugalingon nilang pagbati. Usa ka paagi sa pagbuhat niini mao ang pagdapit sa mga estudyante nga tubagon ang usa o kapin pa sa mosunod nga mga pangutana diha sa ilang journal sa pagtuon. Human ang igong panahon, pwedeng ipakigbahin sa ganahan nga mga estudyante ang ilang hunahuna ug pagbati ngadto sa klase.
-
Unsay imong nakat-onan bahin sa Langitnong Amahan ug ni Jesukristo nga makatabang nimo sa pagsalig Kanila alang sa kusog ug kaluwasan?
-
Unsay imong nasinati bag-o lang nga nakapadako sa imong tinguha sa pagsalig sa Langitnong Amahan ug ni Jesukristo alang sa kusog ug kaluwasan?
Pagkahimong disipulo ni Jesukristo
Opsiyon 1
Naa tingali daghang kahigayonan ang mga estudyante diha sa bag-ohay lang nga mga leksiyon sa pagpalalom sa ilang pagkadisipulo ni Jesukristo ug sa Iyang ebanghelyo. Niay listahan sa mga leksiyon diin ang mga estudyante mahimong magtakda og mga tumong aron mapalawman ang ilang pagkadisipulo:
Sa Leksiyon 81: “1 Mga Hari 17,” gidapit ang mga estudyante nga molihok uban ang mas dakong pagtuo kang Jesukristo pinaagi sa pagsunod sa mga pulong sa Iyang mga propeta.
Sa Leksiyon 84: “2 Mga Hari 5,” gidapit ang mga estudyante sa paghimo sa gamay ug yanong mga butang nga gipahimo kanato sa Ginoo.
Sa Leksiyon 87: “2 Mga Hari 21–23,” gidapit ang mga estudyante nga modangop sa Ginoo pinaagi sa ilang personal nga pagtuon sa kasulatan.
Sa Leksiyon 90: “2 Cronicas 14–16,” gidapit ang mga estudyante nga maghimo og plano sa pagtinguha sa Ginoo.
Sa Leksiyon 93: “Nehemias,” gidapit ang mga estudyante nga magpabiling nakatutok sa buluhaton nga gipahimo kanila sa Langitnong Amahan.
Sa Leksiyon 95: “Ester, Bahin 2,” gidapit ang mga estudyante nga molihok uban ang kaisog sa paghimo sa kabubut-on sa Ginoo.
Mainampoong ikonsiderar kon hain sa mga plano o mga tumong ang gihimo sa mga estudyante niini nga mga leksiyon aron mapalawman ang ilang pagkadisipulo ni Jesukristo. Hatagig higayon ang mga estudyante sa pagtimbangtimbang sa ilang mga paningkamot sa paghimo sa ilang mga plano ug tumong. Pwedeng ilhon sa mga estudyante ang ilang mga kalamposan ug mopasalig pag-usab o magpadayon sa ilang plano. Makatabang sa mga estudyante ang mosunod nga graphic sa padayon nga pagpaningkamot nga makab-ot ang ilang mga tumong.
Opsiyon 2
Pwedeng gamiton ang mosunod nga pangutana ug graphic aron tabangan ang mga estudyante nga mailhan ug motubag sa mga pag-aghat sa Espiritu Santo.
Hunahunaa kon unsay imong gibati nga pag-aghat sa Espiritu Santo nga buhaton sa milabayng pipila ka semana. Lainlain tingali ang kahimtang niini nga mga pag-aghat, apil ang sa balay, sa simbahan, o sa seminary. Para sa kada pag-aghat nga imong nailhan, hunahunaa kon asa na ka dapit diha sa mosunod nga diagram. Irekord ang imong mga hunahuna diha sa imong journal sa pagtuon bahin sa kon para nimo unsay mga sunod nimong himoon aron sundon ang mga pag-aghat nga imong nadawat.
Hatagig panahon ang mga estudyante nga hilom nga mamalandong ug magrekord diha sa ilang journal sa pagtuon. Human ang igong panahon, ikonsiderar ang paghisgot sa pipila sa mosunod nga mga pangutana uban sa mga estudyante.
-
Para nimo, unsa ang pipila sa lisod nga mga lakang niini nga proseso?
-
Sa unsang paagi kita makakuha og kusog gikan ni Jesukristo aron makaya kini nga mga babag sa atong pagkadisipulo?