“Ester, Bahin 1: Tungod ug Alang sa Panahon nga Sama Niini,” Manwal sa Magtutudlo sa Seminary sa Daang Tugon (2026)
“Ester, Bahin 1: Tungod ug Alang sa Panahon nga Sama Niini,” Manwal sa Magtutudlo sa Seminary sa Daang Tugon
Ester: Leksiyon 94
Ester, Bahin 1
Tungod ug Alang sa Panahon nga sama Niini
Nakahunahuna na ba ka kon nganong gitultolan ka sa Langitnong Amahan niining dapita, aning orasa, ug kon unsay Iyang ipabuhat nimo? Mao pod tingali nay pangutana sa walay ginikanan nga Judeo nga babaye nga ginganlan og Ester. Ang pagkabihag ni Ester sa Persia nagbutang niya sa posisyon nga motabang sa Ginoo sa pagluwas sa Iyang katawhan, ang mga Judeo. Kini nga leksiyon makatabang sa mga estudyante nga mailhan kon sa unsang paagi ang Langitnong Amahan mobutang kanato sa mga sitwasyon nga makatabang Niya sa pagpatuman sa Iyang Buluhaton.
Pagpangandam sa estudyante: Ikonsiderar ang paghangyo sa mga estudyante nga mainampoong mamalandongon kon sa unsang paagi molampos ang buhat sa Langitnong Amahan pinaagi kanila niini nga klase sa seminary o sa ilang ward o branch, eskwelahan, siyudad, o pamilya
Posibleng mga Kalihokan sa Pagkat-on
Balaanong plano
Ikonsiderar ang pagsugod sa klase pinaagi sa pagpakitag chessboard ug mga piyesa niini o litrato sa chessboard. Dapita ang mga estudyante nga ipakigbahin ang ilang nahibaloan bahin sa dula nga chess. Kon kinahanglan, ipasabot nga himoon ang dula pinaagi sa pagsibog sa mga player sa ilang mga piyesa sa maayong posisyon nga ilang giplano aron modaog sa dula. Pwede nimong pangutan-on ang mga estudyante kon para nila unsa ang makapahimong hanas nga modula og chess. Kon dili mahisgotan sa mga estudyante, ikonsiderar ang pagpakigbahin nga abanteng planohon sa hanas nga mga modula ang ilang plano sa pagdaog samtang nagdula. Dayon pwede nimong pangutan-on ang mga estudyante nga hunahunaon kon sa unsang paagi ang atong kinabuhi sama og dula sa chess, nga ipakigbahin ang pagpasabot ni Elder Rasband.
Si Elder Ronald A. Rasband sa Korum sa Napulog Duha ka Apostoles mitudlo:
Ang atong kinabuhi sama sa usa ka chessboard, ug ang Ginoo mobalhin kanato gikan sa usa ka dapit ngadto sa lain—kon molihok kita sa espirituhanong mga pag-aghat. Kon hunahunaon nato ang nangagi, makita nato ang Iyang impluwensya sa atong kinabuhi. (“Pinaagi sa Balaan nga Plano,” Liahona, Nob. 2017, 55)
-
Para nimo nganong mas sayon nga makita ang impluwensiya sa Dios sa atong kinabuhi kon motan-aw sa nangagi, kay sa karon?
Gipakita sa asoy ni Ester kon sa unsang paagi ang impluwensiya sa Dios sa kinabuhi ni Ester nagbutang niya sa posisyon aron matuman ang Iyang buluhaton. Niini nga leksiyon, imong tun-an ang unang bahin sa iyang asoy. Samtang magtuon ka, mainampoong tinguhaon ang Espiritu Santo nga motabang nimo nga mailhan kon sa unsang paagi ang Langitnong Amahan mobutang kanimo sa mga sitwasyon nga motabang Niya sa pagtuman sa Iyang buluhaton.
Tungod ug alang sa panahon nga sama niini
Human mapildi sa mga Taga-Persia ang mga Taga-Babelonia, daghang Judeo ang nagpabilin sa Persia, apil si Ester ug ang iyang tig-atiman nga si Mardoqueo. Ang hari sa Persia, nga si Ahasuero, wala mahimuot sa iyang asawa nga si Vasti ug gipalayas kini (tan-awa ang Ester 1:1–12). Kay nangitag bag-ong asawa, gianunsyo ni Ahasuero nga ipahatod ngadto kaniya ang tanang babaye sa Persia (tan-awa sa Ester 2:1–4).
Aron tabangan ang mga estudyante nga makasabot sa asoy ni Ester, pwede nimong organisahon sa gagmayng grupo ang mga estudyante aron tun-an ang usa sa mosunod nga mga hut-ong sa kasulatan. Dapita ang mga grupo sa pag-summarize sa ilang bahin sa asoy para sa klase. Pwede kang maghunahuna og makapainteres nga paagi nga i-sumamarize sa mga estudyante ang ilang asoy. Pwede silang magdrowing og usa ka simbolo diha sa papel nga morepresentar sa istorya (pananglitan, usa ka korona o belo nga pangkasal, harianong singsing, espada, o naghilak nga emoji). Pwedeng dramahon sa mga estudyante ang istorya samtang iasoy kini sa uban.
Basaha ang tudling nga na-assign ninyo nga pangitaon ang malisod nga mga kahimtang nga giatubang ni Ester ug Mardoqueo.
Ester 2:5–11, 15–17
Ester 3:1–13
Ester 4:1–9
Samtang ipakigbahin sa mga estudyante, bantayi ang oras aron dili mogahin og dako kaayong panahon ang mga estudyante sa pag-summarize niini nga mga asoy.
-
Sa imong hunahuna, unsa kahay gibati sa Langitnong Amahan ug ni Jesukristo bahin sa mga panghitabo niini nga mga bersikulo? Bahin kang Mardoqueo? Bahin kang Ester?
Basaha ang Ester 4:10–14, nga pangitaon kon giunsa pagtabang ni Mardoqueo si Ester nga makita ang impluwensiya sa Langitnong Amahan sa mga sirkumstansiya sa kinabuhi ni Ester.
Pwede nimong pamarkahan sa mga estudyante ang pangutana nga “kinsay nahibalo kong ikaw wala pa mahiabot sa gingharian sa maingon niini nga panahona?” (bersikulo 14).
Gipamatud-an ni Elder Rasband nga impluwensiyahan gayod sa Dios ang mga kahimtang sa atong kinabuhi aron tumanon ang Iyang buluhaton.
Nasayod ko nga ang Ginoo mobalhin kanato diha sa daw chessboard aron sa paghimo sa Iyang buhat. Ang unsay morag sulagma lang, sa pagkatinuod, gidumala sa usa ka mahigugmaong Amahan sa Langit, kinsa makaihap sa mga buhok sa matag ulo. Wala gani usa ka gagmayng langgam nga mahulog sa yuta nga dili mahibaloan sa atong Amahan. Ang impluwensya sa Ginoo makita sa ginagmayng mga detalye sa atong kinabuhi, ug kadtong mga insidente ug mga oportunidad moandam kanato aron mobayaw sa atong mga pamilya ug sa uban samtang magtukod kita sa gingharian sa Dios dinhi sa yuta. …
Ang Langitnong Amahan makabutang kanato sa mga sitwasyon uban sa piho nga katuyoan sa hunahuna. Gibuhat Niya kini sa akong kinabuhi, ug nagbuhat usab Siya niini sa inyong kinabuhi. (“Pinaagi sa Balaan nga Plano,” Liahona, Nob. 2017, 56)
-
Unsang mga kamatuoran ang atong makat-onan bahin sa Langitnong Amahan gikan sa asoy ni Ester ug ni Elder Rasband?
Samtang ipakigbahin sa mga estudyante ang ilang mga tubag, pagsulat og kamatuoran diha sa pisara gamit ang mga pulong sa mga estudyante nga sama sa ang Langitnong Amahan mobutang kanato sa mga sitwasyon diin makatabang ta sa pagtuman sa Iyang buluhaton.
Timan-i: Ang kaisog ni Ester sa pag-atubang sa hari aron luwason ang iyang katawhan tun-an sa Leksiyon 95: “Ester, Bahin 2.”
Pag-ila sa giya sa Langitnong Amahan
Makatabang tingali ang pagpasabot nga kasagaran dili usa ka dramatikong kasinatian ang pagtuman sa buluhaton sa Ginoo. Ginagmay ra tingali ni, pero importante gihapon. Alang sa pipila ka ehemplo sa ginagmay pero importanteng mga kasinatian, pwede nimong ipakigbahin ang asoy ni Sister Michelle Craig sa “Mata aron sa Pagtan-aw” sa time code 2:23 hangtod 4:54 (Liahona, Nob. 2020, 16) o ang asoy ni Elder Brook P. Hales sa “Mga Tubag sa Pag-ampo,” sa time code 2:16 hangtod 4:32. Makita nimo ang mga bidyo niini nga mga asoy diha sa ChurchofJesusChrist.org.
-
Sa unsang paagi ikaw o ang imong kaila gihatagan sa Ginoo og kahigayonan nga mahimong instrumento sa Iyang mga kamot?
Ikonsiderar ang pagpakigbahin og kasinatian dihang nailhan nimo ang mga kahigayonan nga gihatag kanimo sa Langitnong Amahan sa pagtuman sa Iyang buluhaton.
Aron tabangan ang mga estudyante sa pagpamalandong kon sa unsang paagi ang Langitnong Amahan mibutang kanila sa mga sitwasyon diin matuman ang Iyang buluhaton, pwede nimo silang hatagan og panahon nga hilom nga mamalandong sa ilang tubag sa mosunod nga pangutana. Pwede nilang irekord ang ilang mga nahunahunaan diha sa ilang journal sa pagtuon.
-
Sa imong hunahuna,sa unsang paagi ang pamahayag ni Mardoqueo diha sa bersikulo 14 naghulagway tingali nimo?
Kon gibati nimo nga nagkinahanglan og dugang tabang ang mga estudyante aron mailhan niini nga mga kahigayonan sa ilang kinabuhi, pwede nimong ipahimo ang mosunod nga kalihokan sa mga estudyante.
Sa imong journal sa pagtuon, isulat ang ngalan sa usa ka tawo sa imong kinabuhi (pamilya, eskwelahan, simbahan, o sa uban pang kahimtang). Dayon tubaga ang dili moubos sa usa sa mosunod diha sa imong journal.
-
Unsang ebidensiya ang imong nakita nga ang Langitnong Amahan mibutang sa imong kinabuhi sa maong tawo “tungod ug alang sa panahon nga sama niini?” (Ester 4:14)?
-
Kanus-a nimo nakita nga gibutang ka sa kamot sa Langitnong Amahan diha sa kinabuhi sa usa ka tawo o sa piho mga sitwasyon “tungod ug alang sa panahon nga sama niini?” (Ester 4:14)?
Kon nahiangay, pwede nimong dapiton ang andam nga mga estudyante nga mopakigbahin sa ilang gisulat ngadto sa klase. Ikonsiderar ang pagdasig sa mga estudyante sa paglihok uyon sa bisan unsang espirituwal nga mga impresyon nga tingali ilang madawat panahon sa leksiyon.