1 Samuel 17

• Unsay imong nahibaloan bahin sa istorya ni David ug Goliat?

  Dapita ang pipila ka mga estudyante sa pagtindog ug pagtandi sa ilang gitas-on sa gitas-on ni Goliat diha sa bongbong. Dasiga sila nga hunahunaon kon unsa kahay bation kon one-on-one nga makigsangka kang Goliat.

  Pagdrowing og dakong stick nga porma og tawo [stick figure] diha sa pisara nga nagrepresentar kang Goliat. Butangi kini og label nga Among mga Hagit. Dapita ang mga estudyante sa paglista diha sa pisara sa mga hagit nga giatubang sa kabatan-onan tupad sa dakong stick nga porma og tawo.

• Unsa ang pipila sa mga hagit nga giatubang sa kabatan-onan karon—dagko man kini o gagmay?

Pamalandonga ang bisan unsang mga hagit nga naa sa imong kinabuhi. Pagpili og usa nga tutokan nimo karon. Hunahunaa kon unsa ka kamasaligon nga makatabang ang Ginoo kanimo niini nga hagit. Isulat ang imong mga hunahuna diha sa imong journal.

Samtang magtuon ka sa 1 Samuel 17, dapita ang Espiritu Santo nga tabangan ka kon sa unsang paagi madapit nimo ang tabang sa Manluluwas aron maatubang ang imong hagit.

Ang Israel nakiggubat sa mga Filistihanon. Ang Filistihanong sundalo, si Goliat, mipagula og usa ka hagit. Miingon siya nga kon naay usa sa mga Israelinhon ang makapildi niya sa one-on-one nga pakigsangka, nan mosurender ang mga Filistihanon og mahimong mga ulipon sa Israel. Pero kon modaog si Goliat, ang Israel mahimong ulipon sa mga Filistihanon. Sulod sa 40 ka adlaw miabot si Goliat ug gihagit ang mga Israelinhon nga makigsangka. Nahadlok si Hari Saul ug ang kasundalohan sa Israel. Miabot si David aron maghatod og mga pagkaon sa iyang mga igsoon nga mga sundalo. Iyang nadungog si Goliat nga mihagit sa kasundalohan sa Israel (tan-awa sa 1 Samuel 17:1–25).

Basaha ang 1 Samuel 17:26, nga mangita kon giunsa pagtubag ni David dihang iyang nadungog ang hagit ni Goliat sa kasundalohan sa Israel.

• Unsay imong ganahan kaayo sa tubag ni David?

Basaha ang 1 Samuel 17:31–37, nga pangitaon kon nganong dako kaayo ang pagsalig ni David sa “Dios nga buhi” (bersikulo 36).

Aron tabangan ang mga estudyante nga mahunahuna kini nga mga bersikulo, pwede nimong ipasalida ang bidyo nga “Si David ug Goliat” gikan sa time code 0:00 hangtod 1:20 o “Ang Ginoo Moluwas Kanako” gikan sa time code 0:47 hangtod 1:59. Ang duha ka bidyo anaa sa ChurchofJesusChrist.org.

2:36

3:24

• Unsay nakat-onan ni David bahin sa Ginoo nga mihatag niya og kompyansa sa pagsukol ni Goliat?

  Ang pagtabang sa mga estudyante sa pagpahayag og makapakabig nga mga baroganan sa kaugalingon nilang mga pulong makapalawom sa ilang pagsabot sa mga kasulatan ug sa mga pulong sa mga propeta. Usa ka paagi sa paghimo niini mao ang pagpangutana og follow up nga mga pangutana human mipakigbahin ang estudyante og usa ka katin-awan. Ang mosunod nga pangutana mao ang usa ka pananglitan.

  (Alang sa dugang nga pagbansay kon unsaon sa pagtabang sa mga estudyante sa pagpahayag og makapakabig nga mga baroganan, tan-awa ang “Paghatag og gibug-aton sa mga kamatuoran nga modala ngadto sa pagkakabig ug paglig-on sa hugot nga pagtuo diha ni Jesukristo” diha sa Pagpalambo sa mga Kahanas sa Magtutudlo.)

• Sa unsang paagi makatabang nato ang nakat-onan ni David bahin sa Ginoo samtang mag-atubang sa atong mga hagit?

Basaha ang 1 Samuel 17:38–51, nga pangitaon ang mga paagi nga misalig si David sa Ginoo samtang nakig-away siya ni Goliat. Ikonsiderar ang pagmarka sa inyong makit-an.

Kon basahon sa mga estudyante ang lainlaing papel sa istorya, pwede nilang ipadayon ang pagbuhat niini nga mga bersikulo. Pwede kang magdugang og laing estudyante para sa parte ni Goliat.

Pwede usab nimong humanon ang usa sa mosunod nga mga bidyo: “Si David ug Goliat” gikan sa time code 1:20 hangtod 2:36 o “Ang Ginoo Moluwas Kanako” gikan sa time code 1:59 hangtod 3:23.

2:36

3:24

• Giunsa pagpakita ni David nga misalig siya sa Ginoo?

Pagpili og usa sa mga hagit nga gilista diha sa pisara ubos sa Among mga Hagit.

Ilha ang lima ka paagi, piho sa hagit nga imong gipili, nga ang usa ka indibidwal makasalig sa Langitnong Amahan ug ni Jesukristo samtang ilang giatubang kini nga hagit. Hisgoti kon nganong imong gipili ang matag aksyon.

• Sa unsang paagi nakatabang nimo o sa imong kaila ang Langitnong Amahan ug si Jesukristo sa pag-atubang og usa ka hagit?

• Unsa nga mga aksiyon ang gihimo nimo o kana nga tawo aron madawat ang Ilang tabang?

Si Elder Dieter F. Uchtdorf sa Korum sa Napulog Duha ka Apostoles mipamatuod kon sa unsang paagi makatabang nato si Jesukristo samtang mag-atubang kita og mga hagit:

14:11

Kon ang Manluluwas nagbarog karon dinhi, Siya mopahayag sa Iyang walay kinutoban nga gugma alang kaninyo, sa Iyang hingpit nga pagsalig kaninyo. Siya mosulti kaninyo nga kamo makahimo niini. Kamo makatukod og makalingaw, malipayon nga kinabuhi tungod kay si Jesukristo mao ang inyong kalig-on. (“Si Jesukristo Mao ang Kalig-on sa Kabatan-onan,” Liahona, Nob. 2022, 12)

• Unsay imong nahibaloan bahin kang Jesukristo nga makatabang nimo sa pag-atubang sa mga kalisdanan uban ang mas dakong pagsalig Kaniya?

Pamalandonga ang personal nga hagit nga imong gisulat ganina sa imong journal. Tinguhaa ang mga impresyon sa Espiritu Santo aron tabangan ka sa pagpili og bisan usa lang ka paagi nga makasalig ka sa Ginoo nga maatubang kana nga hagit.

Pagdrowing og usa o kapin pa nga mga bato sa imong journal sa pagtuon. Isulat sa tupad o sa sulod sa bato kon unsay imong himoon ug kon unsaon nimo kini paghimo.