“1 Samuel 25: Tabangan Ta sa Manluluwas nga Mopasaylo,” Manwal sa Magtutudlo sa Seminary sa Daang Tugon (2026)
“1 Samuel 25: Tabangan Ta sa Manluluwas nga Magpasaylo,” Manwal sa Magtutudlo sa Seminary sa Daang Tugon
1 Samuel 17–18; 24–26; 2 Samuel 5–7: Leksiyon 75
1 Samuel 25
Tabangan Ta sa Manluluwas nga Mopasaylo
Sa tibuok natong kinabuhi, ang ubang mga tawo lagmit nga makapasakit o makapasilo kanato. Si David giinsulto sa usa ka tawo nga ginganlan og Nabal. Ingon nga usa ka sama ni Jesukristo, ang asawa ni Nabal, si Abigail, nanginlabot ug gitabangan si David nga magpasaylo. Makakat-on kita og dugang bahin kang Jesukristo ug sa tabang nga Iyang gihatag kanato pinaagi sa pagtandi kang Abigail ngadto Kaniya. Kini nga leksiyon makatabang sa mga estudyante nga masabtan kon sa unsang paagi makatabang si Jesukristo kanila nga pasayloon ang uban.
Pagpangandam sa estudyante: Dapita ang mga estudyante nga basahon, tan-awon, o paminawon ang “Nagdala Akog Kalipay Inay Kagul-anan: Ang Makaayo nga Dalan sa Pagpasaylo” ni Sister Kristin M. Yee (Liahona, Nob. 2022, 36–38). Pwede nilang tun-an ang tibuok pakigpulong o mga bahin niini nga imo nang gipili. Dapita ang mga estudyante nga mosulod sa klase nga andam sa pagpakigbahin sa mga panghunahuna nga ilang nakuha bahin sa pagkadawat sa tabang sa Manluluwas nga pasayloon ang uban.
Posibleng mga Kalihokan sa Pagkat-on
Ang Pag-ula ni Jesukristo
Ikonsiderar ang pagpakita sa imahe ni Jesukristo, sama sa usa nga anaa sa sinugdanan sa leksiyon. Isulat ang mosunod nga dili kompleto nga pahayag diha sa pisara. Dapita ang mga estudyante nga gamiton ang ilang mga journal sa pagtuon aron ilista ang daghang paagi nga makompleto nila kini. Pwede kang magpatukar og makadios nga musika samtang namalandong ug nagsulat ang mga estudyante.
Tungod ni Jesukristo, ako maka …
Human sa igong panahon, dapita ang mga estudyante nga andam sa pagpakigbahin sa ilang nakompletong pamahayag. Pwede usab nilang ipahayag ang ilang gibati o gituohan bahin sa unsay ilang gipakigbahin. Ipakita ang mosunod nga pamahayag aron suportahan o dugangan ang lista nga gihimo sa mga estudyante.
Gihulagway ni Presidente Russell M. Nelson ang usa ka butang nga kaya natong tanan nga himoon tungod ni Jesukristo:
Pinaagi sa walay kinutoban nga Pag-ula [sa Manluluwas], kamo makapasaylo niadtong kinsa nakapasakit kaninyo ug kinsa dili gayod modawat sa responsibilidad sa ilang pagkabangis nganha kaninyo.
Sa kasagaran sayon ra kaayo ang pagpasaylo sa usa ka tawo kinsa sinsero ug mapainubsanong nangayo sa inyong pasaylo. Apan ang Manluluwas mohatag kaninyo sa abilidad sa pagpasaylo ni bisan kinsa nga miabusar kaninyo sa bisan unsa nga paagi. Dayon ang ilang masakit nga mga binuhatan dili na makadaot sa inyong kalag. (“Upat ka Gasa nga Gitanyag ni Jesukristo Kaninyo” [First Presidency Christmas Devotional, Dis. 2, 2018], Librarya sa Ebanghelyo)
-
Unsa ang gihimong posible ni Jesukristo pinaagi sa Iyang Pag-ula?
Kompletoha ang pamahayag nga naa sa pisara pinaagi sa mosunod nga kamatuoran: Tungod ni Jesukristo, makahimo ko sa pagpasaylo sa mga tawo nga nakapasakit nako. Pwede nimong dapiton ang mga estudyante nga idugang kini nga kamatuoran diha sa ilang mga journal kon wala kini maapil sa ilang unang lista.
David ug Nabal
Ang 1 Samuel 25 naglangkob og asoy diin ang mga aksyon sa asawa ni Nabal, si Abigail, mahimong ikatandi ngadto ni Jesukristo. Kini nga pagtandi makatabang nato nga makakat-on og dugang bahin Kaniya. Kini nga mga klase sa pagtandi usahay gitawag og mga matang ni Jesukristo. Dasiga ang mga estudyante nga dapiton ang Espiritu Santo aron tabangan sila nga mas masabtan ang sama ni Kristo niini nga kapitulo. Makatabang tingali ang pagpamubo sa tibuok asoy ayha sugdan sa pagtuon sa mga estudyante aron mas makapunting sila sa pagpangita kon unsay gitudlo niini nga asoy bahin ni Kristo.
Samtang nagbiyahe sa kamingawan si David ug ang iyang mga sundalo, nahimamat nila ang mga ulipon sa usa ka lalaki nga ginganlan og Nabal. Sa panahon sa gubat, sagad supakon sa gikapoy nga mga sundalo ang balaod aron makuha ang ilang gikinahanglan. Si David ug ang iyang mga sundalo nagkinahanglan og tabang ug suporta. Adunahan nga tawo si Nabal ug naay daghang karnero ug mga baka. Imbes hudlaton ang mga ulipon ni Nabal ug kuhaon ang ilang gikinahanglan, buotan nga gitratar ni David ug sa iyang mga sundalo kini nga mga ulipon ug walay gikuha nga bisan unsa gikan kanila (tan-awa sa 1 Samuel 25:7, 15–16). Gipadala ni David ang 10 sa iyang mga ulipon aron malinawong hangyoon si Nabal sa gikinahanglan kaayo nilang pagkaon ug mga suplay (tan-awa sa 1 Samuel 25:5–9). Giinsulto ni Nabal si David ug midumili siya sa pagtabang kaniya ug sa iyang kasundalohan (tan-awa sa 1 Samuel 25:10–11).
Ubos sa nakompletong pamahayag diha sa pisara, pwede kang magdrowing og duha ka nawong. Butangi og label ang usa nga David ug ang lain Nabal. Pagbilin og lugar diin nimo pwedeng idrowing ang ikatulong nawong sa tunga niining duha sa ulahing bahin sa leksiyon. Ubos sa nawong nga nagrepresentar kang David, pwede nimong isulat: Buotan ngadto sa mga ulipon ni Nabal; Nangayog tabang kang Nabal. Ubos sa nawong nga nagrepresentar kang Nabal, pwede nimong isulat: Giinsulto si David;Midumili sa pagtabang. Pwede nimong dapiton ang mga estudyante nga usbon ang mga emosyon sa mga nawong samtang ilang basahon ang mga bersikulo sa ubos.
Dapita ang katunga sa klase sa pagbasa bahin ni Nabal ug ang laing katunga sa pagbasa bahin ni David. Kon gikinahanglan, ipatan-aw sa mga estudyante ang mga footnote alang sa dugang pagsabot.
-
Basaha ang 1 Samuel 25:3, 14, 17, 25, nga pangitaon ang mga kinaiya ni Nabal.
-
Basaha ang 1 Samuel 25:13, 21–22, nga pangitaon ang reaksyon ni David sa mga insulto ni Nabal ug pagdumili sa pagtabang.
Paghangyo og boluntaryo gikan sa kada grupo nga isulat sa pisara ang ilang nakat-onan bahin sa tawo nga giasayn kanila. Pananglitan, ilawom sa Nabal pwede nilang isulat ang Bastos; Daotan; Walay pagbati. Ilawom sa David pwede nilang isulat ang Nasuko; Mibating gimaltratar; Gustong manimalos. Pwedeng ilisan sa mga estudyante ang mga emosyon sa kada nawong aron makita ang ilang nakat-onan.
Hatagi og higayon ang mga estudyante nga hunahunaon ang kaugalingon nilang mga sitwasyon. Pasaligi sila nga dili nila ipakigbahin ang ilang mga tubag niini nga pagsusi sa kaugalingon.
Pamalandongi ang imong mga tubag sa mosunod nga mga pangutana:
-
Kanus-a man nga naay tawo nga mimaltratar nimo?
-
Unsang mga paningkamot, kalamposan, o pakigbisog ang imong gihimo o nahimo aron mapasaylo kini nga tawo sa ilang pagmaltrato?
Si Abigail isip usa ka sama ni Kristo
Dapita ang mga estudyante nga tun-an ang bahin kang Abigail pinaagi sa pagpaila sa kahanas sa pagtuon sa pagpangita sa mga matang ni Kristo. Ipasabot nga pwedeng pangitaon sa mga estudyante ang mga butang nga gisulti o gihimo ni Abigail nga nagpahinumdom nila kang Jesukristo, Iyang mga papel, ug Iyang misyon sa plano sa Langitnong Amahan.
Nasaksihan sa usa ka ulipon ni Nabal ang panagbangi tali sa iyang agalon ug ni David. Gipahibalo sa ulipon si Abigail, ang asawa ni Nabal (tan-awa sa 1 Samuel 25:14–17). Dihang nahibaloan ni Abigail kini nga panagbangi, nakiglabot siya sa ngalan ni Nabal ug gihangyo si David nga pasayloon siya [Nabal] (tan-awa si 1 Samuel 25:18–20, 23–28). Si Abigail mahimong tan-awon isip usa ka sama ni Kristo. Makakaplag kita og mga sama ni Kristo samtang atong tun-an ang mga kasulatan ug pangitaon kon sa unsang paagi makatabang nato ang mga indibiduwal, mga butang, o bisan ang mga panghitabo nga hunahunaon si Kristo.
Diha sa pisara, pagdrowing og nawong taliwala ni David ug Nabal. Butangi og label kini nga nawong og Abigail. Hatagi og igong panahon ang mga estudyante nga tun-an ang mosunod nga tagsa-tagsa o sa gamayng grupo.
Basaha ang 1 Samuel 25:18–19, 23–28, 31, nga pangitaon ang bisan unsa nga gisulti o gihimo ni Abigail nga susama sa giingon o gihimo ni Jesukristo. Ikonsiderar ang pagmarka sa inyong makit-an.
Ilawom sa nawong nga nagrepresentar kang Abigail, paghimo og lista sa mga butang nga nakaplagan sa mga estudyante. Apil sa posibleng mga tubag mao ang: Mihatag og daghang suporta(bersikulo 18); Giangkon ang mga sala ni Nabal(bersikulo 24); Gihangyo si David nga pasayloon siya tungod sa mga sala ni Nabal(bersikulo 28); Naningkamot nga mawala ang kaguol ug kalain gikan sa kasingkasing ni David(bersikulo 31).
-
Sa unsang paagi si Abigail maoy sama ni Kristo?
Si Sister Kristin M. Yee sa Kinatibuk-ang Kapangulohan sa Relief Society mipakigbahin og mga panabot sa abilidad sa Manluluwas nga tabangan kita nga mopasaylo.
Niini nga asoy, si Abigail makita nga usa ka gamhanan nga matang o simbolo ni Jesukristo. Pinaagi sa Iyang maulaong sakripisyo, Siya makapalingkawas kanato gikan sa sala ug kabug-at sa pagbati sa kasuko ug kalagot ug mohatag kanato sa atong gikinahanglan.
Sama nga si Abigail andam nga modawat sa sala ni Nabal ngadto sa iyang kaugalingon, mao usab ang Manluluwas—sa dili matukib nga paagi—angkonon Niya ang atong mga sala ug ang mga sala niadtong kinsa nakapasakit o nakapasilo nato. …
Ang pagdala ni Abigail og daghang pagkaon ug mga suplay makatudlo kanato nga ang Manluluwas nagtanyag niadtong kinsa nasakitan ug nasamdan sa tabang nga atong gikinahanglan aron mamaayo. …
Sama nga si Abigail mitabang ni David nga dili “makapangdol sa kasingkasing” [1 Samuel 25:31] ug sa pagdawat sa gikinahanglan nga tabang, mao usab ang Manluluwas motabang kaninyo. (“Nagdala Akog Kalipay Inay Kagul-anan: Ang Makaayo nga Dalan sa Pagpasaylo,” Liahona, Nob. 2022, 36–37)
Dapita ang mga estudyante sa pagpakigbahin kon unsay makahuloganon sa pamahayag ni Sister Yee para nila. Samtang nakigbahin ang mga estudyante, pwede nimong ilisan ang nawong nga nagrepresentar sa nawong ni Abigail og imahe ni Jesukristo nga imong gipakita sa unang bahin sa leksiyon, nga ibutang ang imahe sa Manluluwas tali sa mga nawong ni Nabal ug David.
-
Sa unsang paagi nga ang Manluluwas motabang nato sa pagpasaylo sa uban?
Basaha ang 1 Samuel 25:32–35, nga pangitaon kon sa unsang paagi ang mga aksyon ni Abigail nakaapektar kang David.
-
Sa unsang paagi susama niini ang atong bation dihang atong madawat ang tabang sa Manluluwas nga pasayloon ta?
Ipakita ang pagsabot
Hatagi og higayon ang mga estudyante nga ipahayag ang ilang nasabtan bahin sa abilidad sa Manluluwas sa pagtabang nila nga pasayloon ang uban. Ang mosunod maoy usa ka paagi nga mahimo nimo kini.
Kompletoha ang mosunod diha sa imong journal sa pagtuon:
-
Pagdrowing og nawong nga nagrepresentar sa imong pagbati kon dunay nakapasakit o nakapasilo nimo.
-
Tupad sa maong imahe, pagdrowing og nawong nga nagrepresentar sa usa ka tawo nga nakapasakit tingali nimo.
-
Sa tunga sa duha ka drowing, paghimo og lista sa imong nasabtan bahin sa Manluluwas nga makatabang nimo sa pagpasaylo sa uban.
Ikonsiderar ang pagdapit sa mga estudyante sa pagpakigbahin sa unsay ilang gisulat bahin sa Manluluwas. Pwede usab nimo silang dasigon nga ipakigbahin sa uban gawas sa klase ang ilang nakat-onan. Idugang ang imong pagsaksi sa tabang nga gihatag kanato sa Manluluwas samtang naningkamot kita nga pasayloon ang uban.