“Pagbansay 5 sa Doktrinal nga Kahanas: Pagsag-ulo sa mga Tudling ug Paggamit sa mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Daang Tugon (2026)
“Pagbansay 5 sa Doktrinal nga Kahanas: Pagsag-ulo sa mga Tudling ug Paggamit sa mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary alang sa Daang Tugon
1 Samuel 17–18; 24–26; 2 Samuel 5–7: Leksiyon 76
Pagbansay 5 sa Doktrinal nga Kahanas
Pagsag-ulo sa mga Tudling ug Paggamit sa mga Baroganan sa Pag-angkon og Espirituhanong Kahibalo
Ang doktrinal nga kahanas makatabang sa mga estudyante nga matukod ang ilang kinabuhi diha sa pundasyon ni Jesukristo ug sa Iyang ebanghelyo. Kini nga leksiyon makatabang sa mga estudyante nga masag-ulo ang mahinungdanong hugpong sa mga pulong sa kasulatan diha sa mga tudling sa doktrinal nga kahanas ug sa paggamit sa balaanong mga baroganan sa pag-angkon og espirituhanong kahibalo.
Pagpangandam sa estudyante: Ikonsiderar ang pagdapit sa mga estudyante sa pagpili ug pagsugod sa pagsag-ulo sa usa ka tudling sa kasulatan sa doktrinal nga kahanas. Makatabang tingali ang app sa Doktrinal nga Kahanas ingon nga kapanguhaan. Ang lista sa mga tudling makita diha sa Mahinungdanon nga Dokumento sa Doktrinal nga Kahanas (2023).
Posibleng mga Kalihokan sa Pagkat-on
Pagrebyo sa doktrinal nga kahanas: Pagsag-ulo
Pwede nimong sugdan ang klase pinaagi sa pagtabang sa mga estudyante nga makita ang bili sa pagsag-ulo sa mga pakisayran sa doktrinal nga kahanas ug mahinungdanong hugpong sa mga pulong sa kasulatan. Usa ka paagi sa paghimo niini mao ang pagpangutana sa mosunod.
-
Unsay una nimong mahinumdoman nga imong nasag-ulo? Nakahibalo pa ba ka niini?
-
Nakasag-ulo na ba ka og kasulatan? Unsay benepisyo sa pagsag-ulo niini?
-
Makahunahuna ba ka og mga higayon dihang nahinumdoman sa Manluluwas ang kasulatan gikan sa memorya?
Kon kinahanglan, pahinumdomi ang mga estudyante nga gikutlo ni Jesukristo ang kasulatan sa daghang kahimtang, sama sa dihang gitental Siya ni Satanas (tan-awa sa Mateo 4:4, 7, 12), dihang gisukna Siya og lisod nga mga pangutana (tan-awa sa Mateo 9:13; 15:4, 7–9; Marcos 10:7–8), ug dihang Iyang gitudloan ang mga Nephita (tan-awa sa 3 Nephi 22; 24–25).
Aron tabangan ang mga estudyante sa pagsag-ulo sa mga pakisayran sa doktrinal nga kahanas ug mahinungdanong mga hugpong sa mga pulong sa kasulatan, ikonsiderar ang paghimo sa mosunod. O pagpili og laing kalihokan sa pagsag-ulo gikan sa “Mga Kalihokan sa Pagrebyo sa Doktrinal nga Kahanas” diha sa apendiks.
Pagpakita og lista sa mga tudling sa doktrinal nga kahanas nga natun-an na sa mga estudyante. Dapita ang mga estudyante sa pagpili og tudling nga gusto nilang sag-ulohon. Dayon, dapita ang mga estudyante sa pagkompleto sa mosunod.
Isulat ang pakisayran sa doktrinal nga kahanas ug mahinungdanong hugpong sa mga pulong diha sa imong journal (mas maayo kon lapis ang gamiton). Unya basaha kini og kusog para sa imong kaugalingon. Human mabasa, papasa o tangtanga ang usa o duha ka pulong o numero. Basaha na pod kini og kusog. Sublia kini nga proseso hangtod nga mapapas na nimo ang tanang pulong ug numero. Dayon sulayi kon imong masulat ang pakisayran ug mahinungdanong hugpong sa mga pulong gikan sa memorya.
Kon naa pay igong panahon, pwede tingaling sublion sa mga estudyante ang proseso para sa ubang tudling.
Pagkat-on ug paggamit sa mga baroganan sa pag-angkon og espirituhanong kahibalo
Makatabang tingali sa mga estudyante ang pagbaton og daghang higayon nga rebyohon ang mga baroganan sa pag-angkon og espirituhanong kahibalo. Ang pagrebyo makatabang sa mga estudyante nga mapamalandongan ang mga baroganan aron magamit nila kini sa mga panahon sa panginahanglan. Ikonsiderar ang pagrebyo sa mga baroganan gamit ang usa sa mga gisugyot nga kalihokan sa pagrebyo ubos sa “Mga Kalihokan sa Pagrebyo sa Doktrinal nga Kahanas” diha sa apendiks. Ang mga deskripsiyon sa mga baroganan makita diha sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanong Dokumento sa Doktrinal nga Kahanas (2023).
Hatagi og senaryo ang mga estudyante nga makatabang nila sa pagtubag sa mga pangutana bahin sa bili sa matag tawo isip anak sa Dios ug ang kaimportante sa pagtan-aw ug pagtratar sa uban sama sa pagtan-aw sa Manluluwas. Bag-ohay lang nakat-onan sa mga estudyante ang mga kamatuoran bahin sa atong balaanong pagkatawo (tan-awa sa Genesis 1:26–27), kon sa unsang paagi ang Ginoo nagtan-aw kanato (tan-awa sa 1 Samuel 16:7), ug sa unsang paagi ang katawhan sa Ginoo kinahanglang magkahiusa (tan-awa sa Moises 7:18).
Pwede nimong ipakigbahin ang mosunod nga senaryo nga dili kini usbon, o pwede nimo kining ipahiuyon aron mas matubag ang mga panginahanglan sa imong mga estudyante. Ang laing opsiyon mao ang paggamit sa bidyo nga “Pagdaogdaog—Hunonga Kini (10:22),” nga naa sa ChurchofJesusChrist.org. Ipasalida ang bidyo gikan sa time code 0:00 hangtod 6:50. Dayon hunonga kadiyot ang bidyo ug padayon sa mga kalihokan sa leksiyon.
Ikonsiderar ang mosunod nga senaryo:
Si Joe apil sa grupo sa mga managhigala nga kanunayng dili maayo og pagtratar sa uban diha sa eskwelahan ug sa social media. Nagtuo sila nga ang ilang gibuhat kataw-anan ug makalingaw. Usa ka adlaw, nakit-an ni Joe nga ang iyang manghod nga babaye gisungog. Nakita niya nga nasakitan pag-ayo ang iyang manghod. Nabalaka siya kon unsa ang epekto sa pagdaogdaog kaniya. Ang pagkakita sa iyang manghod nga gidaogdaog maoy hinungdan sa pagkaamgo ni Joe sa usa ka butang nga wala niya makita kaniadto. Iyang nahibaloan kon unsay gipabati niya ug sa iyang mga higala ngadto sa uban. Nawad-an siya og kadasig ug naghunahuna kon unsay angay niyang himoon.
-
Unsa ang lisod nga mga desisyon bahin kon giunsa niya pagtratar ang uban, ang ikonsiderar tingali ni Joe nga himoon? Nganong kaha nga lisod ang paghimo niini nga mga kausaban?
Aron tabangan ang mga estudyante sa paggamit sa mga baroganan sa pag-angkon og espirituhanong kahibalo diha sa senaryo, pwede nimo silang dapiton nga himoon ang mosunod.
Pagpili og usa sa tulo ka baroganan sa pag-angkon og espirituhanong kahibalo nga para nimo makatabang kang Joe. Kompletoha ang kalihokan sa ubos nga katukma sa baroganan nga imong gipili.
Susiha ang mga konsepto ug mga pangutana nga adunay mahangtorong panglantaw
Paghimo og lista sa tanang butang nga para nimo gusto sa Langitnong Amahan nga mahibaloan ni Joe. Hunahunaa ang bahin sa mga pagtulun-an sa mga kasulatan sama sa Genesis 1:26–27 ug 1 Samuel 16:7 nga makatabang niya nga makita sa mas tukmang paagi ang iyang kaugalingon ug ang uban.
Tinguhaa ang dugang nga panabot pinaagi sa balaanong gitudlo nga mga tinubdan
Paghimo og lista sa mga kasulatan o mga pakigpulong sa kinatibuk-ang komperensiya nga pwedeng tun-an ni Joe aron matabangan siya sa paghinulsol ug pagbag-o.
Pwede kang moadto sa tab sa Kinatibuk-ang Komperensiya sa Librarya sa Ebanghelyo. Adto sa “Mga Hilisgotan,” ug pagpilig hilisgotan nga may kalabotan sa sitwasyon ni Joe, sama sa gugmang putli, kaluoy, ehemplo, o paghinulsol. Tan-awa ang pakigpulong ug pangita og pamahayag nga makapalig-on o makatudlo ni Joe.
Kon nagkinahanglan ka og tabang sa pagpangita og usa ka kasulatan, pwede nimong irebyo ang mga tudling sa kasulatan sa doktrinal nga kahanas.
Lihok uban ang hugot nga pagtuo
Aron mapakita kon unsay pwedeng himoon ni Joe, paghimo og comic strip nga naay tulo hangtod sa unom ka imahe nga nagpakita kon sa unsang paagi siya makalihok uban ang hugot nga pagtuo kang Jesukristo. Isip kabahin sa imong comic strip, ikonsiderar kon unsaon paggamit ni Joe ang iyang kahibalo bahin ni Jesukristo.
Ikonsiderar ang pagdapit sa mga estudyante sa pagpakigbahin sa unsay ilang gitun-an. Hangyoa ang mga estudyante sa pagpakigbahin sa ilang mga hunahuna samtang naminaw sa ilang mga kaedad.
Kon imong gipasalida ang bidyo, pwede nimong ipakita ang nahibiling bahin sa bidyo gikan sa time code 6:51 hangtod 10:23. Pwede nimong hangyoon ang mga estudyante nga pangitaon kon sa unsang paagi ang batan-ong lalaki nakabenepisyo o tungod sa paggamit sa mga baroganan sa pag-angkon og espirituhanong kahibalo.
Kon gigamit nimo ang senaryo, pwede nimong dapiton ang mga estudyante sa paghimo sa nahibiling bahin sa istorya diha sa gagmayng grupo. Dapita ang mga grupo sa paghimo sa mosunod nga duha ka bahin sa istorya:
-
Ang pagsanong ni Joe ngadto sa mga tawo nga wala niya tratara sa maayong paagi
-
Ang tubag ni Joe sa iyang mga higala
Hatagi og igong panahon ang mga estudyante nga kompletohon ang senaryo. Dayon pwede nimong dapiton ang mga estudyante nga mohimo og usa ka butang karon aron gamiton sa usa o kapin pa sa mga baroganan sa pag-angkon og espirituhanong kahibalo sa usa ka sitwasyon nga ilang giatubang o atubangon.
Taposa pinaagi sa pagpakigbahin sa imong pagpamatuod kon sa unsang paagi tabangan sa Langitnong Amahan ug ni Jesukristo ang mga estudyante sa personal nga mga hagit samtang modangop sila Nila alang sa direksiyon.