یِسُوع مسِیح خُوشی لاتا ہے

آپ کا مقصد خُوشی اور شادمانی پانا ہے۔ یہ آپ کی زِندگی کا مقصد ہے۔ یہ آسمانی باپ کے خُوشی کے منصُوبے کا مقصد ہے۔ اِس کا یہ مطلب نہیں ہے کہ آپ کبھی اُداس نہیں ہوں گے یا مُشکل اوقات نہیں آئیں گے۔ مگر اِس کا مطلب یہ ہے کہ نجات دہندہ مُشکل وقت سے گُزرنے اور خُوشی پانے میں آپ کی مُعاونت کر سکتا ہے۔

خُوشی آپ کے حالات سے نہیں آتی؛ یہ یِسُوع مسِیح کی پیروی کرنے سے آتی ہے۔ آپ کی زِندگی میں کوئی بُرا دِن، بُرا ہفتہ، یا بُرا سال بھی آ سکتا ہے۔ لیکن خُوشی آپ کی زِندگی میں غم کی عدم موجُودگی نہیں ہے؛ بلکہ یہ آپ کی زِندگی میں مسِیح کی موجُودگی ہے۔

مُنّجی کی خُوشی کسی بھی چیز سے زیادہ عظیم اور دیرپا ہے۔ شیطان آپ کو خُود غرض طریقوں یا دُنیاوی خُوشی یا لذّتوں سے لُطف اَندوز ہونے اور تسکین حاصِل کرنے کی ترغیب دے گا۔ جو کُچھ بھی یِسُوع مسِیح اور اُس کے اَحکام کے برعکس ہے وہ آپ کو حقیقی، دیرپا خُوشی اور شادمانی نہیں دے سکتا۔ یاد رکھیں کہ اِس زمین کی چیزیں عارضی ہیں۔ یِسُوع مسِیح کی اِنجِیل گہری، پاک، اور اَبَدی خُوشی اور شادمانی پیش کرتی ہے۔

خُوشی کا اِنتخاب کریں۔ اگرچہ یہ سچ ہے کہ اِس دُنیا میں اُداسی اور مُشکلات ہیں، آسمانی باپ نے دُنیا کو بُہت سی خُوبصُورت، اور مُفید چیزوں سے بھی معمُور کِیا ہے۔ اُنھیں تلاش کریں۔ ہر روز شادمان ہونے کی وجُوہات پر غور کرنے کی کوشِش کریں—شاید اُنھیں لِکھ بھی لیں۔ یہ آپ کے پیارے آسمانی باپ کی طرف سے تحائف ہیں۔

دُوسروں کے لیے خُوشی اور شادمانی لائیں۔ یِسُوع مسِیح نے ہمیں شادمانی دینے کے لیے خُوشی کی معمُوری پائی ہے۔ دُوسروں کی خِدمت کرنے میں خُوشی اور شادمانی پانے سے آپ اُس کی مِثال کی پیروی کر سکتے ہیں۔ کسی کو پیار محسُوس کرنے میں مدد کریں۔ مُخلص تعریف کریں۔ کسی اَیسے شخص کی حوصلہ اَفزائی کریں جو جدوجہد کر رہا ہو۔ اگر آپ کبھی بھی محسُوس کریں کہ آپ کو اپنی زِندگی میں زیادہ خُوشی کی ضرُورت ہے، تو کسی اور کی زِندگی میں خُوشی لائیں۔

خُداوند کی عِبادت کرنے میں مسرُور رہیں۔ جب آپ گِرجا گھر جائیں، تو اُس خُوشی پر توجہ مرکُوز کریں جو یِسُوع مسِیح آپ کو دیتا ہے، اور اِس کے لیے اُس کی مدح سرائی کریں! اپنی کلِیسیائی عِبادات میں پُر مسرُور رُوح پیدا کرنے کے لیے اپنا کِردار اَدا کریں۔ گھر اور کلِیسیا میں مُقدّس موسیقی کو اپنی عِبادت کا حِصّہ بنائیں۔

زِندگی کٹھن ہونے کے باوجُود بھی آپ خُوشی محسُوس کر سکتے ہیں۔ آپ حیران ہوں گے کہ یہ کیسے مُمکن ہے، مگر یہ سچ ہے۔ یِسُوع مسِیح پر آپ کا اِیمان، اُس کی شِفا بخش قُدرت، اور اُس کے اَبَدی وعدے آپ کو مُستقل خُوشی دے سکتے ہیں۔ اُس کی خُوشی غم پر چھا جاتی ہے اور وہ اِطمینان لاتی ہے جو تمام سمجھ سے بالاتر ہے۔

خُدا کی سیلیسٹیئل بادشاہی میں خُوشی کی معمُوری آپ کی مُنتظر ہے۔ یِسُوع مسِیح اُن سب چیزوں پر غالِب آیا جو آپ کو اَبَدی خُوشی پانے سے دُور رکھ سکتی ہیں۔ جب آپ اُس پر بھروسا کرتے اور اُس کی پیروی کرتے ہیں، تو یہ خُوشی آپ کی ہوگی۔