خُدا کا منصُوبہ آپ کے لیے ہے

آسمانی باپ منصُوبے کا مُصنف ہے۔ وہ آپ کی رُوح کا باپ ہے، اور وہ آپ سے محبّت کرتا ہے۔ وہ آپ کو اپنی عظیم ترین برکت عطا کرنا چاہتا ہے—یعنی اُس کے ساتھ اِبَدی زِندگی۔ دُوسرے لفظوں میں، وہ چاہتا ہے کہ آپ مزید اُس کی مانِند بنیں اور خُوشیوں سے بھرپُور، جلالی زِندگی گُزاریں جیسی اُس نے گُزاری۔ اُس کے پاس ساری قُدرت ہے اور وہ سب کُچھ جانتا ہے۔ آپ اُس پر بھروسا کر سکتے ہیں، حتیٰ کہ جب زِندگی مُشکل بھی ہو۔

یِسُوع مسِیح منصُوبے کو مُمکن بناتا ہے۔ دُنیا کی تخلیق سے پہلے، آسمانی باپ نے اُسے آپ کے مُنّجی کے طور پر چُن لِیا۔ یِسُوع مسِیح ہی وہ واحِد ہستی ہے جو آپ کو آسمانی باپ کے پاس واپس لا سکتا ہے۔ یہی وجہ ہے کہ ہم اُس کی پیروی کرنے کا چُناؤ کرتے ہیں۔ سب کُچھ اُس اِنتخاب پر مُنحصر ہے!

شادی اور خاندان خُدا کے منصُوبے کے لیے ضرُوری ہیں۔ آپ خُدا کے خاندان کا حِصّہ ہیں، اور اُس کے تمام رُوحانی بچّے ایک ماں اور باپ کے ذریعے زمین پر آتے ہیں۔ خُدا چاہتا ہے کہ اُس کے بیٹے اور بیٹیاں اَبَدی کاملیت کی جانب اِکٹھے پیش رفت کریں۔ مَرد اور خواتین میں سے ہر ایک پیار بھری، مُتحد شادی میں، یکساں حِصّہ ڈالتا ہے۔ زمین پر خاندانی زِندگی—یہاں تک کہ اپنی تمام تر خامیوں کے باوجُود—بڑی خُوشی لا سکتی ہے۔ اِس کا مقصد آپ کو خُدا کے ساتھ اَبَدی زِندگی کے لیے تیار کرنے میں مدد کرنا ہے۔

اَبَدی تناظر کو برقرار رکھیں۔ جب بھی آپ آزمایشوں، اِمتحانوں، مایُوسیوں، یا مُشکل اِنتخابات کا سامنا کرتے ہیں، تو خُود کو خُدا کے منصُوبے کی یاد دِلائیں۔ دیکھیں کہ اُس کے منصُوبے کے بارے میں آپ جو اَبَدی سچّائیاں جانتے ہیں وہ آپ کو اپنی چنوتیوں کو مُختلف اَنداز سے دیکھنے میں کیسے مدد کر سکتی ہیں۔

اپنی زِندگی میں خُدا کے دَستِ کرم کو دیکھیں۔ اُن طریقوں پر غور کریں جن سے خُدا آپ کو برکت دے رہا ہے۔ یہ کسی کی طرف سے مہربان عمل، لمحہِ اِطمینان، یا دُعا کا جواب ہو سکتا ہے۔

خُدا کے منصُوبے کی پیروی کرنے کا چُناؤ کریں۔ اِس بارے میں جانیں کہ آپ کا آسمانی باپ آپ سے کیا کروانا چاہتا ہے۔ جب آپ صحائف، زِندہ نبیوں کا کلام، خاندانی اِعلامیہ، اور اپنی بطریقی برکت کا مُطالعہ کرتے ہیں تو اُس کی ہدایت کے طالِب ہوں۔ اِس سے آپ کو خُداوند کی خِدمت کرنے کی تیاری میں مدد مِلے گی، بطور مِشنری اور اپنی زِندگی بھر۔ خُداوند کی خِدمت کریں، اَبَدی بیاہ کریں، اور بچّوں کی پرورش کو اپنی اعلیٰ ترجیح بنائیں۔ یِسُوع مسِیح کی تعلیمات پر عمل کرتے ہُوئے اَبھی سے ایک خُوش حال خاندان بننے میں اپنا کِردار اَدا کریں۔

آپ مسِیح میں اُمید اور حوصلے کے ساتھ زِندگی کی آزمایشوں کا سامنا کر سکتے ہیں۔ چُوں کہ آپ خُدا کے اَبَدی منصُوبے کے بارے میں جانتے ہیں، آپ کے پاس قابلِ قدر آلہ ہے جو مُشکل اوقات میں آپ کی مدد کر سکتا ہے۔ آپ جانتے ہیں کہ پیدایش اور مَوت کے درمیان جو کُچھ ہوتا ہے زِندگی اُس سے کہیں زیادہ ہے۔ آپ جانتے ہیں کہ آپ واقعی کون ہیں، آپ کا مقصد کیا ہے، اور آپ نجات دہندہ کی مدد سے کیا بن سکتے ہیں۔ یِسُوع مسِیح آپ کی طاقت ہے!

جب آپ یِسُوع مسِیح کی پیروی کرتے ہیں تو آپ اَبَدی زِندگی پا سکتے ہیں۔ وہ آپ کو مزید اپنی مانِند بننے، اپنے آسمانی والدین کی طرف لوٹنے، اور اَبَدی طور پر اپنے پیاروں کے ساتھ خُوشی میں زِندگی گُزارنے کی طاقت دے گا۔ یِسُوع مسِیح پر بھروسا رکھیں۔