یِسُوع مسِیح آپ کی مدد کرے گا

یِسُوع مسِیح آپ کو مضبُوط کرے گا۔ وہ آپ کی حسرتوں، آپ کے خیالات، اور آپ کے اَعمال کو بدلنے میں آپ کی مدد کرے گا۔ جب آپ کسی بھی طرح سے پریشان، خوف زدہ، یا دوڑ دھُوپ کر رہے ہوں، تو وہ آپ کو تسلّی بخشے گا۔ وہ زندگی کے ہر پہلُو میں آپ کی مُعاونت کرے گا۔ آپ اُس پر بھروسا کر سکتے ہیں۔

توبہ گُناہ کی سزا نہیں ہے؛ یہ وہ طریقہ ہے جس سے نجات دہندہ ہمیں گُناہ سے آزاد کرتا ہے۔ توبہ کرنے سے مُراد تبدیل ہونا ہے—یعنی گُناہ سے دُور ہونا اور خُدا کی جانب بڑھنا۔ اِس کا مفہُوم بہتر ہونا اور مُعافی پانا ہے۔ اِس قِسم کی تبدیلی ایک بار کا واقعہ نہیں ہے؛ بلکہ یہ ایک جاری و ساری عمل ہے۔

یِسُوع مسِیح کو اپنی زِندگی کا مرکز بنائیں۔ اپنے تمام کاموں میں اُس کی مدد کے طالِب ہوں۔

تَوبہ کریں۔ بہتر ہونے کی خواہش کے ساتھ خُداوند کی طرف رُجُوع کریں۔ جب آپ کُچھ غلط کرتے ہیں، تو دیانت داری سے اِسے خُدا کے حُضُور اور، حسبِ ضرورت، اپنے بِشپ اور کسی اَیسے شخص کے سامنے تسلیم کریں جسے آپ نے نُقصان پُہنچایا ہو۔ چیزوں کو دُرست کرنے کی اپنی بہترین کوشِش کریں۔

بہتر کرنے اور بہتر ہونے کے اِنعام میں شادمان ہوں۔ حتیٰ کہ جب یہ آسان نہ ہو اور آپ کی مرضی سے زیادہ وقت لگے، تو کوشِش کرنا ترک نہ کریں۔ کوشِش جاری رکھیں اور خُداوند پر توّکل کریں۔ وہ ہر قدم پر آپ کی مدد فرمائے گا۔

جب آپ توبہ کرتے ہیں تو آسمانی باپ آپ کو مُعافی اور شِفا بخشے گا۔ وہ آپ کے احساسِ قصور کو اِطمینان اور خُوشی سے بدل دے گا۔ وہ آپ کے گُناہوں کو یاد نہیں رکھے گا۔ یِسُوع مسِیح آپ کی طاقت ہے، اور اُس کی طاقت کے ساتھ، اُس کے حُکموں پر عمل کرنے کی آپ کی تمنا بڑھے گی۔

وہ آپ کے دِل اور زِندگی کو بدل دے گا۔ تھوڑا تھوڑا کر کے، آپ بڑھیں گے اور مزید اُس کی مانِند بن جائیں گے۔