ہَیکَل کی رُسُوم اور عہُود آپ کو خُدا کی برکات تک زیادہ رسائی فراہم کرتے ہیں

ودیعت عِلم اور قُدرت کا تُحفہ ہے۔ ہَیکَل کی ودیعت کی رُسُوم میں، آپ مزید بھرپُور طریقے سے نجات دہندہ کا نام اپنے اُوپر اَوڑھتے ہیں۔ آپ خُدا کی فرماں برداری کرنے کا عہد باندھتے ہیں، اُس کی مرضی پُوری کرنے کے لیے قُربانی دیتے ہیں، یِسُوع مسِیح کی اِنجِیل پر عمل کرتے ہیں، پاک دامنی کے قانُون کی فرماں برداری کرتے ہیں، اور تقدیس کرتے ہیں—یا—آپ کی زِندگی اور وہ سب کُچھ جو خُدا نے آپ کو اپنی کلِیسیا میں سونپ دِیا ہے۔ یہ آپ کے وعدے ہیں۔ خُدا آپ کو زیادہ عِلم، تحفُظ، اور اپنی قُدرت تک رسائی سے برکت دینے کا وعدہ کرتا ہے۔ وہ آپ کو اپنے ساتھ اَبَدی زِندگی دینے کا وعدہ بھی کرتا ہے۔ ودیعت کے حِصّہ کے طور پر، آپ پاک کہانت کا زیرِ جامہ زیب تن کرنے کا مُقدّس اِعزاز پاتے ہیں۔ زیرِ جامہ یِسُوع مسِیح کی علامت اور آپ کے ہَیکَل کے عہُود کی یاد دِہانی ہے۔

ہَیکَل کی مُہر بندی جوڑوں اور خاندانوں کو اَبَدیت کے لیے مُتحد کرتی ہے۔ ہَیکَل کی مُہر بندی کی رسم میں، آپ اور آپ کا جیون ساتھی خُدا اور ایک دُوسرے کے ساتھ عہد باندھیں گے۔ آپ خُدا اور ایک دُوسرے کے ساتھ مُکمل طور پر وفادار رہنے، ایک دُوسرے سے محبّت رکھنے اور خِدمت کرنے، اور خُدا کے قوانین کو ماننے کے لیے باہم مِل کر کام کرنے کا وعدہ کریں گے۔ یہ آپ کا وعدہ ہے۔ خُدا وعدہ فرماتا ہے کہ آپ کے جیون ساتھی اور آپ کے بچّوں کے ساتھ آپ کے تعلقات ہمیشہ کے لیے قائم رہ سکتے ہیں۔ وہ وعدہ فرماتا ہے کہ جب آپ اپنے عہُود پر قائم رہتے ہیں تو آپ سیلیسیٹیئل بادشاہی میں اُس کے ساتھ اعلیٰ ترین جلال پا سکتے ہیں۔ اِس برکت کو سرفرازی کہا جاتا ہے۔

ہمیشہ اِجازت نامہ برائے ہَیکَل کے حامل ہوں۔ اِس کو پانے کے لیے صدارتِ بِشپ کے کسی رُکن سے مُلاقات کریں۔ وہ آپ سے سوالات پُوچھے گا کہ آپ اُس کے پاک گھر میں داخِل ہونے کے لیے خُداوند کے معیارات پر کیسے عمل کر رہے ہیں۔ اِن سوالات کا اکثر جائزہ لیں۔ (وہ سوال آپ کو اِس ہدایت نامہ کے ضمیمہ میں مِل سکتے ہیں۔) حتیٰ کہ اگر آپ ہَیکَل سے بُہت دُور بھی رہتے ہیں، تو اپنے اِجازت نامہ کو خُداوند کے لیے اپنی محبّت اور اُس کے معیارات کے مُطابق زِندگی گُزارنے کے عزّم کی علامت بننے دیں۔

جتنی بار ہو سکے ہَیکَل میں جائیں۔ اپنے اِجازت نامہ کے ساتھ، آپ خُداوند کے گھر میں داخِل ہو سکتے ہیں اور اپنے آباؤ اَجداد کے لیے بپتِسما اور اِستحکام پا سکتے ہیں، تاکہ وہ آپ کی دی گئی برکات کو حاصِل کر سکیں۔ ہَیکَل میں جانے کے ہر موقع سے فائدہ اُٹھائیں۔ خُداوند کو اُس کے گھر میں ڈھُونڈیں۔ رَسُومات، علامات، اور رُوح میں جو آپ محسُوس کرتے ہیں اُسی کی جُستجُو میں رہیں۔ آپ اُسے پائیں گے۔

خُداوند کے گھر میں عہُود باندھنے کے لیے تیاری کریں۔ اَیسا کرنے کا بہترین طریق یہ ہے کہ اپنے بپتِسما کے عہُود پر قائم رہیں۔ ہَیکَل کی رُسُوم پانے اور زِندگی بھر عہد پر عمل کرنے والے بننے کے لیے اِسے اپنے راہ نُما مقاصِد میں سے ایک بنائیں۔ اَبھی سے اُن قوانین پر عمل پیرا ہونے کی اِبتدا کریں جن کی فرماں برداری کرنے کا وعدہ آپ ہَیکَل میں کریں گے: خُدا کے حُکموں کی فرماں برداری، قُربانی، یِسُوع مسِیح کی اِنجِیل، پاک دامنی، اور تقدیس۔ آپ کا خاندان، بِشپ، اور دیگر کلِیسیائی قائدین آپ کی مدد کر سکتے ہیں۔

آپ مزید یِسُوع مسِیح کی مانِند بن سکتے ہیں۔ وہ آپ کو راست بازی کا عظیم پیروکار بننے میں مدد دے گا۔ ہَیکَل کی رَسُومات اور عہُود آپ کو سِکھاتے ہیں کہ خُدا کی حُضُوری میں کیسے داخِل ہوں اور اُس کے ساتھ اَبَدی زِندگی کیسے حاصِل کریں۔

آپ خُدا کی قُدرت سے لیس ہوں گے۔ ہَیکَل کے عہُود اِس وعدے کے ساتھ آتے ہیں کہ خُدا کی قُدرت اور جلال آپ پر ہوگا۔ اُس کے فرِشتے آپ کی نِگہبانی کریں گے۔

ہَیکَل میں وقت آپ کو یِسُوع مسِیح اور رُوحُ القُدس کے ساتھ زیادہ قریب سے جوڑے گا۔ آپ خُدا کے اِطمینان اور آرام کو محسُوس کریں گے۔ آپ اُس کی آواز کو زیادہ واضح طور پر سُنیں گے۔ آسمان آپ کے لیے کھُلیں گے، اور آپ اُس کی راہوں کو بہتر طور پر سمجھیں گے۔ آپ اپنی چنوتیوں کا سامنا کرنے کے لیے زیادہ مضبُوطی پائیں گے کیوں کہ آپ کا دِل اُس کے ساتھ جُڑا ہُوا ہے۔