نُورِ خُدا میں چلیں

آپ رُوحُ القُدس کو مُستقل ساتھی کے طور پر پا سکتے ہیں۔ جب آپ کو کلِیسیا کے رُکن کے طور پر اِستحکام حاصِل ہُوا، تو آپ کو ”رُوحُ القُدس پانے“ کی دعوت دی گئی تھی۔ پاک رُوح کو اپنے مُستقل ساتھی کے طور پر پانے کا موقع آپ کے واسطے خُدا کی سب سے بڑی نعمت ہے۔

اچھے فیصلے کرنے سے رُوح کو محسُوس کرنے کی آپ کی صلاحیت میں بہتری آتی ہے۔ اِس دُنیا میں بہت سی اچھی اور صحت بخش چیزیں ہیں۔ جس طرح آپ کے کھانے اور پینے سے آپ کا بدن مُتاثر ہوتا ہے، اِسی طرح آپ جو پڑھتے، دیکھتے اور سُنتے ہیں اِس سے آپ کا دماغ اور رُوح گہری طور پر مُتاثر ہوتے ہیں۔

ہر روز خُداوند کے لیے وقت نکالیں۔ اُس کو جانیں۔ ہمیشہ اُسے یاد رکھیں۔ اپنے آسمانی باپ سے دُعا کریں۔ پاک صحائف اور آخِری ایّام کے نبیوں کے کلام کو پڑھیں۔ پھر آپ جو سیکھتے ہیں اُس کے مُطابق زِندگی بسر کرنے کے خواہاں ہوں۔

جو سَر بُلند کرتا، اِلہام بخشتا اور رُوح کو دعوت دیتا ہے اُس کے مُشتاق ہوں۔ جب آپ اِس بارے میں فیصلہ کرتے ہیں کہ کیا دیکھنا، پڑھنا، سُننا، یا کس میں شِریک ہونا ہے، تو اِس کے مُتعلق سوچیں کہ آپ کو کیسا محسُوس ہوتا ہے۔ کیا یہ اچھے خیالات کو دعوت دیتا ہے؟ ہر اُس چیز سے دُور رہیں جو مُقدّس چیزوں کا تمسخر اُڑاتی یا غیر اِخلاقی ہوں۔ کسی بھی اَیسی چیز میں شریک نہ ہوں جو آپ کے فیصلوں یا رُوح کے لیے حساسیت کو کم کرتی ہے، جیسا کہ تشدد، شراب، اور نُقصان دہ منشیات۔ کسی ویڈیو یا گیم کو بند کرنے، فِلم یا رقص کو ترک کرنے، اپنی موسیقی کو بدلنے، یا کسی اَیسی چیز سے مُنہ موڑنے کی ہمت رکھیں جو رُوح کے مُوافق نہ ہو۔

تقویت بخشنے کے لیے سوشل میڈیا کا اِستعمال کریں۔ سوشل میڈیا ایک طاقتور ذریعہِ اَبلاغ ہو سکتا ہے۔ اگر آپ اِس کا اِستعمال کرتے ہیں، تو نُور، اِیمان، اور سچّائی پر توجہ مرکُوز کریں۔ اپنی زندگی کا اُس سے موازنہ نہ کریں جو دُوسرے لوگ محسُوس کرتے ہوں۔ یاد رکھیں کہ آپ کی قدروقِیمت آسمانی والدین کی اولاد ہونے سے ہوتی ہے، سوشل میڈیا سے نہیں۔

صحت بخش تجربات اور حقیقی، دیرپا تعلقات کے طلب گار ہوں۔ مُحتاط رہیں کہ آپ کا ٹیکنالوجی اور میڈیا کا اِستعمال خاندان اور دوستوں کے ساتھ ذاتی وقت گُزارنے کی جگہ نہ لے۔ بدلے میں بُہت زیادہ فائدہ دِیے بغیر سوشل میڈیا اور دیگر ٹیکنالوجی آپ کا بُہت زیادہ وقت لے سکتی ہے۔ خیالی دُنیا سے تھوڑا وقفہ لیں اور حقیقی زِندگی میں لوگوں سے جُڑیں۔

اُس کا رُوح ہمیشہ آپ کے ساتھ رہ سکتا ہے۔ یہ وعدہ اُس عہد کا حِصّہ ہے جو آپ ہر بار عِشائے ربّانی لیتے وقت باندھتے ہیں۔ رُوح آپ کو آسمانی باپ اور یِسُوع مسِیح کی گواہی دے گا۔ وہ آپ کو تسلّی بخشے گا، راہ نُمائی، تنبیہ، اور پاک صاف کرے گا۔ وہ سچّائی کو پہچاننے اور دُنیا میں اچھائی دیکھنے میں آپ کی مُعاونت فرمائے گا۔