12.
E aumaia e Iesu Keriso le olioli
Mataupu Faavae ma Feagaiga 101:36
Ua oliloi lou Tama Faalelagi. E finagalo o Ia ia te oe, o Lona alo, ia maua le olioli tele i le mea e mafai ai. O le mafuaaga lea na Ia sauniaina ai le fuafuaga o le faaolataga. Na Ia auina mai Lona Alo, o Iesu Keriso, e avea ma ou Faaola ma aoao mai Lana talalelei. O le upu talalelei o lona uiga o le “tala fiafia,” ma o le tala fiafia e faapea ona o Iesu Keriso, ua mafai ai ona e maua le fiafia i lenei olaga ma se atoaga o le olioli mo le faavavau.
Upumoni e Faavavau
Ua faamoemoeina ia e maua le fiafia ma le olioli. O le faamoemoega lena o lou olaga. O le faamoemoega lena o le fuafuaga o le fiafia a le Tama Faalelagi. E le faapea la o le a e le faanoanoa lava pe oo i ni taimi faigata. Ae o lona uiga e mafai e le Faaola ona fesoasoani ia te oe e feagai ma taimi faigata ma maua le olioli.
O le olioli e le sau mai i ou tulaga; e sau mai le mulimuli ia Iesu Keriso. Atonu e i ai sou aso leaga, se vaiaso leaga, po o se tausaga leaga. Ae o le olioli e le o le leai o se faanoanoa i lou olaga; o le i ai o Keriso i lou olaga.
O le olioli o le Faaola e maoae atu ma sili atu ona tumau nai lo se isi lava mea. O le a faaosooso oe e Satani e saili le fiafia ma le faamalieina i auala manatu faapito pe mai tuinanau faalelalolagi. Soo se mea lava e feteenai ma Iesu Keriso ma Ana poloaiga e le mafai ona aumaia ia te oe le olioli ma le fiafia moni tumau. Ia manatua o mea o lenei lalolagi e le tumau. Ua ofoina mai e le talalelei a Iesu Keriso le olioli ma le fiafia lea e loloto, paia, ma tumau faavavau.
Valaaulia
Filifili le olioli. E ui e moni o loo i ai le faanoanoa ma faigata i lenei lalolagi, ae ua faatumulia foi e le Tama Faalelagi le lalolagi i le tele o mea matagofie, ma mananaia. Saili i ai. Taumafai e matau mafuaaga e olioli ai i aso uma—atonu foi e tusi i lalo. O nei meaalofa e mai lou Tama oi le Lagi alofa.
Aumai le olioli ma le fiafia i isi. Na maua e Iesu Keriso se atoatoaga o le olioli i le aumaia ia i tatou o le olioli. E mafai ona e mulimuli i Lana faataitaiga e ala i le mauaina o le olioli ma le fiafia i le auauna atu i isi. Fesoasoani i se tasi ia lagona le alofaina. Tuu atu o se faamālō faamaoni. Faamalosiau i se tasi o loo tauivi. Afai e i ai se taimi e te lagona ai e pei e te manaomia le olioli sili atu i lou olaga, taumafai e aumai le olioli i se isi tagata.
Ia olioli i le tapuai atu i le Alii. A e alu i le lotu, taulai atu i le olioli ua tuuina atu e Iesu Keriso ia te oe, ma viia o Ia mo lena mea! Fai lau vaega e saofaga ai i se agaga fiafia i tou sauniga a le Ekalesia. Ia avea musika paia ma se vaega o lau tapuaiga i le fale ma i le lotu.
Faamanuiaga Folafolaina
E mafai ona e lagona le olioli e tusa lava pe faigata le olaga. Atonu e te mafaufau pe faapefea ona mafai lenei mea, ae e moni. O lou faatuatua ia Iesu Keriso, Lona mana faamalolo, ma Ana folafolaga e faavavau e mafai ona tuuina atu ia te oe le olioli faifai pea. O Lona olioli e faamalumalu mai ai le faanoanoa ma aumaia ai le filemu lea e oo mai ai le malamalama uma.
O loo faatalitali mai se atoatoaga o le olioli ia te oe i le malo selesitila o le Atua. Na manumalo Iesu Keriso i mea uma lea e mafai ona taofia ai oe mai le mauaina o le olioli e faavavau. A o e faalagolago ia te Ia ma mulimuli ia te Ia, o le a avea lenei olioli ma au.
O Fesili ma Tali
Afai e fiafia le talalelei, aisea ou te lagona ai le faanoanoa tele? O le lagona faanoanoa e le o se faailoga lea e te le o ola ai i le talalelei. O le olaga o tagata uma e aofia ai faigata, tofotofoga, ma faanoanoaga. O le mulimuli ia Iesu Keriso e le suia ai lenei mea, ae e fesootai ai oe ma se Faaola e mafai ona faamafanafana oe ma fesoasoani ia te oe ia maua le olioli ma le fiafia.
Aisea ua tele ai puapuaga i lenei lalolagi? O nisi o mafatiaga i le lalolagi e oo mai ona e faaaoga e tagata o latou faitalia e faia ai filifiliga sese. O lenei mea e mafai ona mafua ai le puapuagatia mo i latou lava ma mo isi tagata. I nisi tulaga, o mafatiaga e le o se mea e sese ai se tasi—ua na o se taunuuga o le ola ai i se lalolagi e le atoatoa. Po o le a lava le mafuaaga, e mafai ona nutimomoia le vaai atu i se tasi o mafatia, aemaise lava o se tasi e te alofa i ai. Ia mautinoa e faanoanoa foi le Atua pe a e puapuagatia. Na te faatagaina tofotofoga o le olaga faaletino e fesoasoani ia te oe e tuputupu ae ai ma saunia mo le olioli e faavavau faatasi ma Ia, ae Na te le tuua oe e puapuagatia na o oe. Na Ia auina mai Iesu Keriso e tauave i Ona lava luga ou tiga ina ia mafai ona Ia fesoasoani ia te oe. O Iesu Keriso o lou malosiaga lea! Ma ua Ia valaaulia oe, o se tasi o Ona soo, e faia le mea e te mafaia e fesoasoani ai e tuumama mafatiaga o isi.
Tagai Salamo 16:11 (i le afioaga o le Atua o se atoatoaga o le olioli); 95:1 (pese i le Alii); Ioane 16:33 (ia fiafia; na manumalo Iesu Keriso i le lalolagi); Kalatia 5:22 (o le fua o le Agaga o le olioli); Eperu 12:2 (Na onosaia e Iesu Ona puapuaga ona o le olioli i le laveaiga o fanau a le Atua); 2 Nifae 2:25 (E finagalo le Atua ia e maua le olioli); Alema 26:15–16 (o le faia o le galuega a le Atua e taitai atu ai i le olioli); Mataupu Faavae ma Feagaiga 18:15–16 (o le a le tele o lou olioli pe a e fesoasoani i isi ia o mai ia Keriso).
Fesili o le Pepa Faataga o le Malumalu
-
E i ai sau molimau e uiga i le Togiola a Iesu Keriso ma Lana matafaioi i le avea ai ma ou Faaola ma Togiola?