Autalavou
9. Ua faamanuiaina oe i ki ma le pule o le perisitua
avefeau faalelagi ua toefuatai mai ki o le perisitua i le Malumalu o Katelani

9.

Ua faamanuiaina oe i ki ma le pule o le perisitua

Mataio 16:18–19

Ina ua aoao atu e Iesu ia Peteru e uiga i le pule o le perisitua, sa Ia fetalai e uiga i ki. O ki e faaaoga e tatala ai mea. O ki o le perisitua e mafai ona tatala ai le mana, meaalofa, ma faamanuiaga a le Atua i lou olaga.

Upumoni e Faavavau

O ki uma o le perisitua ma le pule e oo mai e ala mai ia Iesu Keriso. E mafai e i latou uma e umia le perisitua ona saili lana pule e toe foi atu ai ia te Ia. E fuafua e le Faaola po o ai e maua lenei pule ma po o ai e mauaina ki o le perisitua. Tatou te faatuatuaina Lona malamalama atoatoa.

Ua toefuatai mai e Iesu Keriso Lana perisitua i o tatou aso. Na te taitaia le auala o le a faaaoga ai le perisitua. O Atamu, Mose, Peteru, ma le tele o isi perofeta i le talafaasolopito atoa na mauaina ki o le perisitua. I o tatou aso, na maua e Iosefa Samita ki o le perisitua mai ia Ioane le Papatiso, Peteru, Mose, Elaia, Elia, ma isi. O sui o le Au Peresitene Sili ma le Korama a Aposetolo e Toasefululua o loo umia ki uma o le perisitua i le lalolagi i le taimi nei. E umia foi e taitai perisitua ma peresitene o korama i le lotoifale ia ki o le perisitua mo o latou valaauga. O ki o le perisitua e pulea ai le galuega a le Atua. Latou te faataga ma faamalosia alii ma tamaitai e fesoasoani i lena galuega.

O le pule o le perisitua e faamanuia ai fanau uma a le Atua. Ona ua toefuatai mai le perisitua, e mafai ona e maua sauniga ma osia feagaiga ma le Atua. E mafai ona e galue i le suafa o le Atua pe a e maua se tofiga po o se valaauga mai se tasi o i ai le pule.

Valaaulia

Talia valaauga o le Ekalesia ma auauna atu ma le faamaoni. Pe a e maua se valaauga o le Ekalesia, e vaetofia oe i le pule mai le Atua e auauna atu ai i lena matafaioi. E mafai foi ona e maua le taitaiga mai le Atua mo lau auaunaga. A o e auauna atu, e fai oe ma sui o Iesu Keriso. Tuu atu ia te Ia le mea sili e te mafaia.

Lagolago i latou ua valaauina e le Atua e auauna atu. O le lagolago o lona uiga e sili atu nai lo le na o le sii o lou lima pe a lau mai se igoa i se sauniga a le Ekalesia. O lona uiga ia lagolago ma fesoasoani. Vaavaai mo ni auala e faaali atu ai e te lagolagoina tagata ua valaauina Iesu Keriso e auauna atu i Lana Ekalesia.

Faataunuu tofiga mai ou taitai o le Ekalesia—e aofia ai [tofiga] mai lau au peresitene o le korama po o le vasega. Ua ia i latou le pule mai le Atua, lea latou te faasafua atu ia te oe mo lena tofiga. Atonu e tofia oe e auauna atu i se tasi, faafeiloai tagata a o latou taunuu atu i le sauniga faamanatuga, pe fesoasoani i se gaoioiga. Po o le a lava le tofiga, vaai i ai o se avanoa e avea ai ma se soo o Iesu Keriso ma auauna atu i fanau a le Atua.

O Iesu Keriso o loo papatisoina e Ioane le Papatiso i le Vaitafe o Ioritana

Faamanuiaga Folafolaina

E mafai ona e faatuatuaina o sauniga e te mauaina ua faatagaina e Iesu Keriso. O se tasi lenei o mea e tulaga ese ai le Ekalesia a Iesu Keriso. E ala i sauniga o le perisitua, ua faaalia ai le mana o le Atua.

O le a avea oe o se meafaigaluega i aao o le Alii. A o e auauna atu i le Alii i Lana pule ma i lalo o le taitaiga a Ana auauna o e umia ki o le perisitua, o le a Ia fesoasoani ia te oe ia iloa le auala e auauna atu ai i isi i Lana galuega. O Iesu Keriso o lou malosiaga lea. O lau auaunaga o le a fesoasoani e te latalata atili atu ai ia te Ia ma aumaia ia te oe le olioli.

O Fesili ma Tali

O ai i la’u uarota e umia ki o le perisitua? O le epikopo ma peresitene o korama a toeaina, aoao, ma tiakono e umia ki o le perisitua. O lona uiga ua tofia i latou e le Alii e taitai pe faapefea ona faaaoga le perisitua e auauna atu ai ma faamanuia ai tagata uma o le uarota.

E faapefea ona faamanuia au e ki o le perisitua? O sauniga e pei o le papatisoga ma le faamanatuga e faatagaina e ki o le perisitua. Pe a e maua se valaauga i le Ekalesia, e vaetofia oe i lalo o le taitaiga a se tasi o loo umia ki. O lenei mea e faamanuia ai oe i le pule e auauna atu ai i lena valaauga. O taitai ma faiaoga o le Ekalesia o e auauna atu ia te oe na mauaina foi le pule o le perisitua e ala i ki.

E faapefea ona auauna atu alii ma tamaitai i le pule o le perisitua? O alii agavaa ua faaee atu i o latou luga le perisitua ma ua faauuina i tofi o le perisitua e pei o le tiakono, aoao, ositaulaga, ma le toeaina. O tamaitai ma alii uma ua vaetofia e galulue i se valaauga e maua le pule o le perisitua ua faamatuu atu mai le Atua e faataunuu ai lena valaauga. E faapena foi ona moni mo tamaitai ma alii o e maua se tofiga mai se taitai o le Ekalesia.

Tagai Mataupu Faavae ma Feagaiga 35:24–27 (o le Ekalesia e taitaia e ala i ki ua tuuina mai e le Alii); 107:18–20 (ki o le Perisitua Mekisateko ma le Perisitua Arona); 110:11–16 (Na toefuatai mai e Mose, Elaia, ma Elia ki).

Fesili o le Faatalanoaga o Pepa Faataga o le Malumalu

  • E te lagolagoina le Peresitene o Le Ekalesia a Iesu Keriso o le Au Paia o Aso e Gata Ai o le perofeta, tagatavaai, ma tali faaaliga ma ua na o ia lava le tagata i le lalolagi ua faatagaina e faaaogaina ki uma o le perisitua?

  • E te lagolagoina uso o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga?

  • E te lagolagoina isi Au Pulega Aoao ma taitai o le Ekalesia i le lotoifale?