E paia lou tino

O lou tino o le faatusa o le Atua—o le Tagata sili ona mamalu ma maoae i le atulaulau. Ua faatusa e tusitusiga paia o tatou tino i se malumalu paia, o se nofoaga e mafai ona afio ai le Agaga. Ioe, e le atoatoa lou tino i le taimi nei. Ae o aafiaga o loo e mauaina i lou tino e mafai ona fesoasoani e te saunia ai e maua i se aso se tino atoatoa, toetu, ma faamamaluina.

Ua lou tagata ua fausia mai lou tino ma lou agaga. Mo lenei mafuaaga, o le soifua maloloina faaletino ma le soifua maloloina faaleagaga e vavalalata lava le fesootaiga. Sa faaali mai e le Faaola le Upu o le Poto e aoao mai ai mataupu faavae mo le tausiga o lou tino ma folafola mai ai faamanuiaga faaletino ma faaleagaga.

O lagona feusuai o se vaega taua o le fuafuaga a le Atua e fatu ai ni faaipoipoga fiafia ma ni aiga e faavavau. O nei lagona e le agasala—e paia. Ona o lagona feusuai e matua paia ma mamana tele, ua tuuina mai ai e le Atua ia te oe Lana tulafono o le legavia e saunia ai oe e faaaoga nei lagona e pei ona Ia faamoemoeina. O loo tau mai i le tulafono o le ola mama e faapea e faamaonia e le Atua le gaoioiga faalefeusuaiga i le na o le va o se alii ma se tamaitai ua faaipoipoina. E toatele tagata i le lalolagi e le amanaia pe tauemu foi i le tulafono a le Atua, ae ua valaaulia i tatou e le Alii ia avea ma Ona soo ma ola i se tulaga faatonuina e maualuga atu.

Taulima lou tino—ma tino o isi—ma le faaaloalo. A o e faia ni faaiuga e uiga i ou laei, faiga o lou ulu, ma foliga vaaia, fesili ifo ia te oe lava, “Pe o o’u faamamaluina lo’u tino o se meaalofa paia mai le Atua?” E finagalo le Tama Faalelagi ia tatou vaai atu i le tasi ma le isi mo tagata moni e i ai i tatou: e le na o tino faaletino ae o Ana fanau pele e i ai se taunuuga paia. Aloese mai sitaili e faamamafa pe aumaia ai le tosina le talafeagai i lou tino faaletino nai lo le tagata ua avea ai oe o se atalii/afafine o le Atua ma se lumanai e faavavau. Ia avea le amio mama ma le alofa mo le Atua e taiala ai au filifiliga. Saili fautuaga mai lou aiga.

Fai mea o le a faamalosia ai lou tino, ae le o mea o le a faatiga pe faaleagaina ai. Olioli ma le lotofaafetai i mea lelei e tele ua saunia e le Atua. Ae ia manatua o le ava malosi, tapaa, kofe, lauti, ma isi fualaau ma vailaau faasaina e le mo lou tino po o lou agaga. E oo lava i fualaau faasaina aoga, e pei o fualaau mai le fomai, e mafai ona faataumaoia pe afai e le sao le faaaogaina.

Ia tausia le paia o lagona feusuai ma faalefeusuaiga. E le tatau ona avea i latou ma mataupu o tala malie po o faafiafiaga. I fafo atu o le faaipoipoga i le va o se alii ma se tamaitai, e sese le pa’i atu i itutino sa, ma paia o le tino o se isi tagata e tusa lava pe o fai ni lavalava. I au filifiliga e uiga i mea e te faia, vaai i ai, faitau, faalogo, mafaufau i ai, tuu i luga, po o le tesi, ia aloese mai soo se mea e faaosofia ai ma le faamoemoeina lagona o le tuinanau i isi po o oe lava ia. O lenei mea e aofia ai ponokalafi o soo se ituaiga. Afai e te iloa o tulaga po o gaoioiga e atili malolosi ai faaosoosoga, aloese mai ai. Ua e iloa nei tulaga ma gaoioiga. Ma afai e te le o mautinoa, e mafai e le Agaga, ou matua, ma ou taitai ona fesoasoani ia e iloa. Faaali atu i lou Tama oi le Lagi e te faamamalu ma faaaloalogia le mana paia e foafoa ai le ola.

O le a faateleina lou faaaloalo mo oe lava ma isi a o e faamamalu i lou tino e ala i au amioga, foliga vaaia, ma laei.

Ua folafola mai e le Alii oa sili o le malamalama ia i latou o e tausia le Upu o le Poto. O se tino maloloina, e saoloto mai le tagofia o mea ua fai ma vaisu, e faateleina ai foi lou tomai e maua faaaliga faaletagata lava ia, mafaufau manino, ma auauna atu i le Alii.

O le ola ai i le tulafono o le legavia e aumaia ai le faamaoniga a le Atua ma le mana faaleagaga faaletagata lava ia. E puipuia ai oe ma lou aiga i le lumanai. A e faaipoipo, o lenei tulafono o le a aumaia ai le alofa sili atu, faatuatuaina, ma le lotogatasi i lau faaipoipoga. O le usitaia i lenei tulafono o le a mafai ai e oe ona alualu i luma e faavavau ma avea atili ai e faapei o lou Tama Faalelagi. O le a tuputupu ae lou mautinoa ao e ola o se soo o Iesu Keriso.