E mafai ona e fesoasoani i le galuega a le Atua

E alofa le Tama Faalelagi i Ana fanau uma. E finagalo o Ia e fesoasoani ia i latou ia maua le fiafia ma le olioli, toe foi atu ia te Ia, ma maua le ola e faavavau. Ua ta’ua lenei mea o Lana galuega o le faaolataga ma le faaeaga, ma ua Ia valaaulia oe e fesoasoani!

Upumoni e Faavavau

O le galuega ma le mamalu o le Atua, o le aumaia o le tino ola pea ma le ola faavavau. O le tino ola pea o le nonofo lea e faavavau ma se tino toetu faaletino. O le ola e faavavau, po o le faaeaga, o le avea lea e faapei o le Atua ma ola faatasi ma Ia e faavavau o ni aiga. Ua mafaia nei mea uma ona o Iesu Keriso ma Lana Togiola. E mafai ona e faatuatuaina o Ia.

E mafai ona e fesoasoani i le galuega a le Atua e ala i le o mai ia Keriso ma fesoasoani i isi ia faia foi faapea. Soo se taimi lava e te faia ai soo se mea e fesoasoani ai i se tasi e mulimuli ia Iesu Keriso, o loo e fesoasoani i le galuega a le Atua.

Valaaulia

Ola i le talalelei. Atinae lou faatuatua ia Iesu Keriso. Salamo i aso taitasi. Maua sauniga o le perisitua a le Atua ma tausi au feagaiga. Fai lena ma mamanu mo aso uma o totoe o lou olaga.

Tausia o i latou e lē tagolima. Saili ni auala e tautua ma auauna atu i isi, e aofia ai lou aiga, au uo, ma lou nuu. O se tasi o auala sili e fesoasoani ai i tagata e manaomia le fesoasoani o le usitaia lea o le tulafono o le anapogi ma le tuuina atu o taulaga anapogi.

Valaaulia tagata uma ia talia le talalelei. Ia atagia i au upu ma amioga lou faatuatua ia Iesu Keriso. Ia saunia e ta’u atu i soo se tasi e fesili atu ia te oe e uiga i le faamoemoe ma le fiafia e te lagonaina i le avea ai ma Ona soo. Mo alii talavou, o le auauna atu i se misiona talai o se tiutetauave faaleperisitua. Mo tamaitai talavou, o se avanoa mamana; tatalo ia iloa pe finagalo le Alii e te auauna atu. Ia saunia e faasoa atu le talalelei i lou olaga atoa.

Tuufaatasia aiga mo le faavavau e ala i le faia o galuega o talafaasolopito o aiga ma le malumalu. Aoao e uiga i ou augatuaa. Saili po o ai e manaomia sauniga o le malumalu. Alu soo i le malumalu i le tele e te mafaia ai ina ia papatisoina ma faamauina mo i latou. Afai e te manaomia le fesoasoani, alu i le FamilySearch.org.

O Iesu Keriso o loo auauna atu i le atu Amerika

Faamanuiaga Folafolaina

O le a e maua le fesoasoani a le Atua. E le o faamoemoe mai le Tama Faalelagi e te faia na o oe lenei galuega. O loo faatasi o Ia ma oe. Pe a e ofoina atu ma le lotomaualalo lou taimi ma lou loto, o le a Ia faia mea ofoofogia e ala atu ia te oe. O Iesu Keriso o lou malosiaga lea!

O le a faatumulia oe i le olioli. O le galuega a le Atua o se galuega o le olioli! A o e auai ai, e mafai ona e lagona le olioli o loo Ia lagonaina. Vaai faalemafaufau i le olioli o le a outou tofu maua ma le Tama Faalelagi ma Ana fanau o e na e fesoasoani e aumai ia te Ia!

O Fesili ma Tali

E mafai moni ona faaaoga a’u e le Atua i Lana galuega? Ioe! E tele auala e fesoasoani ai i le galuega. Atonu e foliga mai e sili atu ona talenia pe atamamai isi tagata, ae o loo silafia e lou Tama Faalelagi ou gafatia. Ua Ia tuuina atu ia te oe meaalofa e mafai ona e faaaoga e tautua ai ma faapotopoto mai Ana fanau. E le afaina pe afai e ese nei meaalofa mai meaalofa o i ai i isi tagata. O le mea moni, o le mafuaaga lena e taua tele ai au meaalofa. E manaomia oe!

Tagai i le Mataio 10:39 (afai e maumau lou ola i le galuega a le Faaola, o le a e mauaina); 1 Korinito 12:14–27 (e manaomia tagata uma i le tino o Keriso); Filipi 1:6 (ia mautinoa o loo galue le Atua ia te oe); Iakopo 5:72 (ua galue le Alii o le tovine faatasi ma outou); Mataupu Faavae ma Feagaiga 18:15–16 (o le a tele lou olioli faatasi ma i latou e te aumaia ia Keriso); 64:33–34 (o se galuega tele e sau mai mea laiti ma faatauvaa); Mose 1:6 (“Ua ia te au se galuega mo oe”); 6:31–34 (E faaagavaa e le Atua i latou Na te valaauina, e tusa lava pe latou te lagona le le gafatia).

Fesili o le Pepa Faataga o le Malumalu

E i ai sau molimau i le Toefuataiga o le talalelei a Iesu Keriso?