1. O le fuafuaga a le Atua e mo oe

O le Tama Faalelagi o le tusitala o le fuafuaga. O Ia o le Tama o lou agaga, ma e alofa o Ia ia te oe. E finagalo o Ia e tuu atu ia te oe Lana faamanuiaga silisili—o le ola e faavavau faatasi ma Ia. I se isi faaupuga, e finagalo o Ia ia e avea atili e faapei o Ia ma ola i le olaga fiafia ma le mamalu o loo Ia soifua ai. O loo ia te Ia le mana uma ma e silafia mea uma. E mafai ona e faatuatuaina o Ia, e tusa lava pe a faigata le olaga.

O Iesu Keriso ua mafai ai le fuafuaga. A o le’i faavaeina le lalolagi, na filifilia e le Tama Faalelagi o Ia Keriso e avea ma o tatou Faaola. Ua na o Iesu Keriso lava le tagata e mafai ona toe aumaia oe i lou Tama oi le Lagi. O le mafuaaga lea tatou te filifili ai e mulimuli ia te Ia. E faalagolago mea uma i le filifiliga lena!

O le faaipoipoga ma le aiga e taua i le fuafuaga a le Atua. O oe o se vaega o le aiga o le Atua, ma o Ana fanau agaga uma e o mai i le lalolagi e ala i se tina ma se tama. E finagalo le Atua i Ona afafine ma atalii ia agai faatasi atu i le atoatoa e faavavau. E tofu saofaga tutusa alii ma tamaitai i se faaipoipoga alofa ma lotogatasi. O le olaga faaleaiga iinei i le lalolagi—e oo lava i ona le atoatoa uma—e mafai ona aumaia ai le olioli tele. Ua fuafuaina e fesoasoani e saunia ai oe mo le ola e faavavau faatasi ma le Atua.

Ia tausisia se vaaiga e faavavau. Soo se taimi lava e te feagai ai ma faaosoosoga, tofotofoga, le fiafia, po o filifiliga faigata, faamanatu ia te oe lava le fuafuaga a le Atua. Vaai pe mafai faapefea e upumoni e faavavau ua e iloa e uiga i Lana fuafuaga ona fesoasoani ia te oe ia ese ai lau vaai i ou luitau.

Vaavaai mo le aao o le Atua i lou olaga. Matau auala o loo faamanuia ai oe e le Atua. Atonu o se faatinoga agalelei mai se tasi, se taimi o le filemu, po o se tali i le tatalo.

Filifili e mulimuli i le fuafuaga a le Atua. Aoao e uiga i mea e finagalo lou Tama Faalelagi e te faia. Saili Lana taitaiga a o e suesue i tusitusiga paia, upu a perofeta soifua, le folafolaga i le aiga, ma lou faamanuiaga faapeteriaka. O le a fesoasoani lenei mea e te saunia ai e auauna atu i le Alii, o se faifeautalai ma i lou olaga atoa. Ia avea le auauna atu i le Alii, faaipoipoga e faavavau, ma le tausia o fanau o se faamuamua maualuga. Fai lau vaega ia maua se aiga fiafia i le taimi nei e ala i le mulimuli i aoaoga a Iesu Keriso.

E mafai ona e feagai ma tofotofoga o le olaga ma le lototele ma le faamoemoe ia Keriso. Ona ua e iloa e uiga i le fuafuaga e faavavau a le Atua, ua ia te oe se meafaigaluega taua e mafai ona fesoasoani ia te oe i taimi faigata. Ua e iloa e tele atu isi mea i le olaga nai lo le mea e tupu i le va o le fanau mai ma le oti. Ua e iloa o ai moni lava oe, po o le a lou faamoemoega, ma po o ai e mafai ona e avea ai faatasi ma le fesoasoani a le Faaola. O Iesu Keriso o lou malosiaga lea!

E mafai ona e maua le ola e faavavau a o e mulimuli ia Iesu Keriso. O le a Ia tuuina atu ia te oe le mana e avea atili ai e faapei o Ia, toe foi atu i ou matua faalelagi, ma ola i le fiafia e faavavau faatasi ma e pele ia te oe. Faalagolago ia Iesu Keriso.