O le a fesoasoani Iesu Keriso ia oe

Salamo 147:3

O Iesu Keriso o lou malosiaga lea. Ua Ia faia mea uma e tatau ai mo oe e maua ai le olioli i lenei olaga ma le faavavau. O le filifilia o Ia ma Lana talalelei, ua e filifilia ai le fiafia e faavavau.

E tusa lava pe e te taumafai e fai le mea sili e fai ai filifiliga lelei, o nisi taimi o le a e faia ai ni mea sese. O le a e faia mea e te moomoo maimau pe ana e le faia. E faia e tagata uma. A tupu lea mea, e faigofie ona lagona le lotovaivai po o le mafaufau pe o le a lava lou lelei. Ae o loo i ai se tala fiafia—tala matagofie, ma le faamoemoe! Ona e alofa le Atua ia te oe, ua Ia auina mai ai Lona Alo, o Iesu Keriso, o le na tauaveina i Ona lava luga au agasala ina ia mafai ai ona e salamo, ia faamagaloina, ma faaauau pea ona alualu i luma.

Upumoni e Faavavau

O le a faamalosia oe e Iesu Keriso. O le a fesoasoani o Ia e sui ou manaoga, ou mafaufauga, ma au amioga. Pe a e popole, fefe, pe tauivi i soo se auala, o le a Ia faamafanafana ia te oe. O le a fesoasoani o Ia ia te oe i mea uma o lou olaga. E mafai ona e faatuatuaina o Ia.

O le salamo e le o se faasalaga lea mo le agasala; o le ala lea e faasaoloto ai i tatou e le Faaola mai le agasala. O le salamo o lona uiga o le suia—ia liliu ese mai le agasala ma agai atu i le Atua. O lona uiga ia alualu i luma ma maua le faamagaloga. O lenei ituaiga o suiga e le o se mea e tasi le taimi e tupu ai; o se faagasologa faifai pea.

Valaaulia

Ia fai Iesu Keriso ma taulaiga o lou olaga. Saili Lana fesoasoani i mea uma e te faia.

Salamo. Liliu atu i le Alii ma se manao ia alualu i luma. Pe a e faia se mea sese, ioe ma le faamaoni i luma o le Atua ma, pe a manaomia, i lou epikopo ma soo se tasi atonu na afaina ia te oe. Fai le mea sili e faasa’o ai mea uma.

Olioli i le meaalofa ia fai ia lelei atili ma sili atu. E tusa lava pe a le faigofie ma umi atu se taimi e alu ai nai lo le mea e te manao ai, aua lava nei taofia le taumafai. Galue pea ma faalagolago i le Alii. O le a fesoasoani o Ia ia te oe i laasaga uma o le ala.

O Iesu o loo nofo i le vaieli ma se tamaitai Samaria

Faamanuiaga Folafolaina

O le a faamagalo ma faamalolo oe e le Tama Faalelagi pe a e salamo. O le a Ia suia lou ta’usalaina i le filemu ma le olioli. O le a Ia le toe manatua au agasala. O Iesu Keriso o lou malosi, ma faatasi ai ma Lona malosi, o le a faateleina ai lou manao e tausi Ana poloaiga.

O le a Ia suia lou loto ma lou olaga. O sina mea itiiti i lea mea itiiti, o le a e tuputupu ae ai ma avea atili e faapei o Ia.

O Fesili ma Tali

E faapefea ona ou iloa pe ua faamagalo a’u e le Atua? Ua folafola mai e le Atua o le a Ia faamagalo i latou o e salamo. Pe a e lagona le mafanafana mai le Agaga, e mafai ona e iloa o loo galue le mana togiola o le Faaola i lou olaga.

O le a le taimi ou te manaomia ai le fesoasoani a le epikopo i [lo’u] salamo? O loo umia e lou epikopo ki o le perisitua ma i ai meaalofa faaleagaga e fesoasoani ia e salamo. E mafai ona e sailia lana fesoasoani ma le fautuaga i soo se taimi. Afai ua e faia ni mea sese matuia, e pei o le solia o le tulafono o le legavia, ia vaai lou epikopo. O le a ia le ta’usalaina oe. O ia o se sui o Iesu Keriso ma o le a fesoasoani ia te oe ia iloa le ala e salamo atoatoa ai ma maua le mana faamalolo ma le mana faamalosiau o le Faaola.

O loo ou taumafai e salamo, ae ou te faia pea ia mea sese e tasi. O le a se mea e tatau ona ou faia? Aua le fiu. Liliu atu ia Keriso, ma tuu atu lou faatuatua ia te Ia. Ua lava ma totoe Lona alofa tunoa. Toe taumafai. E le o tuua na o oe i au taumafaiga e alualu ai i luma. E faatasi Iesu Keriso ma oe i taimi uma.

Tagai i le Enosa 1:6 (e mafai ona tafiese le ta’usalaina); Mosaea 4:3 (e ala i le Agaga Paia, e ta’u atu ai e le Atua ia te oe ua faamagaloina oe); 26:30 (e faamagalo e le Faaola i taimi uma tatou te salamo ai); Eteru 12:27 (o le alofa tunoa o le Faaola e mafai ona faamalosia ai mea vaivai); Moronae 6:8 (e faamagaloina i latou o e salamo); 10:32 (ia faaatoatoaina ia Keriso); Mataupu Faavae ma Feagaiga 1:32 (e faamagalo e le Alii i latou o e salamo); 58:42–43 (o le salamo e aofia ai le ta’uta’u atu ma le lafoaia o le agasala).

Fesili o le Faatalanoaga o Pepa Faataga o le Malumalu

E i ai sau molimau e uiga i le Togiola a Iesu Keriso ma Lana matafaioi i le avea ai ma ou Faaola ma Togiola?
O i ai ni agasala ogaoga i lou olaga o manaomia ona foiaina ma taitai perisitua o se vaega o lou salamo?