Alofa i le Atua, alofa i lou tuaoi

E alofa le Atua ia te oe. O Ia o lou Tama. O Lona alofa atoatoa e mafai ona musuia ai oe e alofa ia te Ia. Afai o lou alofa mo le Tama Faalelagi o le faatosinaga aupito sili lea ona taua i lou olaga, e tele filifiliga o le a faigofie atu [ona fai.

O poloaiga sili e lua o poloaiga uma, o le alofa lea i le Atua ma alofa i lou tuaoi. Ma o ai lou tuaoi? O tagata uma! O isi mea uma o loo aoao mai i tusitusiga paia ma e ala i perofeta e fesootai i nei poloaiga e lua.

O tagata uma lava o ou uso ma tuafafine—e aofia ai, ioe, tagata e ese mai ia te oe pe le malilie faatasi ma oe. E finagalo le Tama Faalelagi i Lana fanau ia alofa le tasi le isi. Pe a e auauna atu i Ana fanau, o loo e auauna atu ia te Ia.

Faaalia atu le alofa mo le Atua i le tausia o Ana poloaiga. Mo se faataitaiga, e ala i le tausia o le paia o le aso Sapati, e aofia ai le saunia ma le faamaoni mo le, ma ai ma inu i le faamanatuga, ua e faaali atu ai i le Atua ua e naunau e tuuto atu se aso se tasi o le vaiaso ia te Ia. A o e anapogi ma totogi sefuluai ma taulaga, ua e faaali atu i le Atua o Lana galuega e sili atu ona taua ia te oe nai lo mea faaletino. Pe a e faaaogaina ma le migao suafa o le Atua ma Keriso, e le faia lava i se auala le aoga pe faasamasamanoa, ua e faaali atu lou lotofaafetai mo mea uma ua Laua faia mo oe.

Fai tagata uma o se atalii/afafine o le Atua. I le avea ai ma se soo o Iesu Keriso, e mafai ona e taimua i le taulimaina o tagata o ituaiga uma, tapuaiga ma soo se isi lava vaega i le alofa ma le faaaloalo—aemaise i latou o e o nisi o taimi e sauaina i upu ma amioga faatiga. Aapa atu ia i latou o e lagona le tuuatoatasi, vavaeesea, po o le leai o se faamoemoe. Fesoasoani ia latou lagona le alofa o le Tama Faalelagi e ala atu ia te oe. Faasoa atu ia i latou faamanuiaga ua Ia tuuina atu ia te oe, ma valaaulia i latou e mulimuli ia Iesu Keriso.

Ia mautinoa o lau gagana e atagia ai le alofa i le Atua ma isi—pe e te fesootai faafesagai pe faatekinolosi. Fai atu mea e faagaeetia ai—ia leai se mea e ono fevaevaeai, faatiga, pe faaita ai, e tusa lava pe o se tala tausua. O au upu e mafai ona malolosi. Ia malolosi mo le lelei.

Faaali atu le alofa i lou aiga. O le alofa i fanau uma a le Atua e amata i le aiga. Fai lau vaega e fai ai lou fale o se nofoaga e mafai ai e tagata uma ona lagona le alofa o le Faaola.

O le a loloto lou sootaga ma le Atua a o e faailoa atu lou alofa e ala i le usiusitai i Ana poloaiga ma tausia au feagaiga ma Ia.

O le a loloto lou sootaga ma isi a o e faailoa atu lou alofa e ala i auaunaga faaKeriso. O le a e maua le olioli i le faia o le lalolagi o se nofoaga e sili atu ona agaalofa.