Sāvali mai le Au Peresitene Sili

Matou te alolofa ia te outou, ma matou te talitonu ia te outou. O outou moni lava o ni agaga filifilia a le Tama Faalelagi, na auina mai i le lalolagi i lenei taimi e faia ni mea taua.

E sili atu lou malosi ma gafatia nai lo le mea e mafai ona e iloaina. Ma a e faalagolago i le Faaola, o le a faateleina atili lou malosi. O Ia o le “malosi o le autalavou.”

O lenei taiala o le a fesoasoani e te atiae ai se faavae mautu mo le faia o filifiliga e tumau ai i luga o le ala e tau atu i le ola e faavavau. O le a fesoasoani e te saunia ai e osia feagaiga paia i le malumalu, saunia e auauna atu i se misiona, ma maua le olioli i le mulimuli ia Iesu Keriso i lou olaga atoa. E i ai sou nofoaga taua i Lana Ekalesia. O le a fesoasoani Iesu Keriso ia te oe e faataunuu Ona faamoemoega mo oe.

Ua tatou iloa o loo soifua le Atua. O la matou tatalo ia outou tumau mausali i luga o le ala o feagaiga—le ala o le osia ma le tausia o feagaiga paia ma le Atua. O le ala lena e toe foi atu ai i lou Tama oi le Lagi. A outou faia lenei mea, o le a avea outou ma uunaiga mo le lelei, faasoa atu ma le fiafia le talalelei, faapotopoto mai fanau a le Atua, ma sauniaina le lalolagi mo le Afio Mai Faalua o le Faaola. Ia manatua, o Iesu Keriso o lou malosiaga lea!