O sauniga ma feagaiga o le malumalu e tuuina atu ai ia te oe le avanoa sili atu i faamanuiaga a le Atua

O le faaeega paia o se meaalofa o le malamalama ma le mana. I sauniga o le faaeega paia o le malumalu, e te tauaveina atoatoa ai le suafa o le Faaola i ou luga. Ua e osifeagaiga e usitai i le Atua, ositaulaga e fai Lona finagalo, ola i le talalelei a Iesu Keriso, usitai i le tulafono o le legavia, ma faapaia—pe tuuto atu—lou olaga ma mea uma ua tuuina mai e le Atua ia te oe i Lana Ekalesia. O au folafolaga na. Ua folafola mai e le Atua e faamanuia oe i se malamalama, puipuiga sili atu, ma maua Lona mana. Ua Ia folafola mai foi e tuuina atu ia te oe le ola e faavavau faatasi ma Ia. O se vaega o le faaeega paia, e te maua ai le avanoa paia o le ofuina o le ofusa o le perisitua paia. O le ofusa o se faatusa o Iesu Keriso ma o se faamanatu o au feagaiga o le malumalu.

O le faamauga i le malumalu e tuufaatasia ai ulugalii ma aiga mo le faavavau. I le sauniga o le faamauga i le malumalu, o le a osia ai e oe ma lou toalua se feagaiga ma le Atua ma le tasi ma le isi. O le a e folafola atu o le a e faamaoni atoatoa i le Atua ma i le tasi ma le isi, ia alofa ma auauna atu le tasi i le isi, ma ia galulue faatasi e tausi tulafono a le Atua. O lau folafolaga lena. E folafola mai e le Atua o lou sootaga ma lou toalua ma lau fanau e mafai ona tumau e faavavau. Ua Ia folafola mai foi e mafai ona e maua le mamalu aupito maualuga faatasi ma Ia i le malo selesitila a o e tausia au feagaiga. O lenei faamanuiaga ua ta’ua o le faaeaga.

Ia i ai i taimi uma se pepa faataga o le malumalu. Feiloai ma se tasi o lau au epikopo ia maua se pepa faataga. O le a ia fesili atu ia te oe ni fesili e uiga i le ala o loo e ola ai i tulaga faatonuina a le Alii mo le ulufale atu i Lona maota paia. Iloilo soo nei fesili. (E mafai ona e mauaina i le faaopoopoga i lenei taiala.) E tusa lava pe e te nofo mamao mai se malumalu, ia avea lau pepa faataga ma se faatusa o lou alofa mo le Alii ma lau tautinoga e ola i Ona tulaga faatonuina.

Alu e le aunoa i le malumalu e te mafaia ai. Faatasi ai ma lau pepa faataga o le malumalu, e mafai ona e ulu atu i le maota o le Alii ma papatisoina ma faamauina mo ou tuaa, ina ia mafai ona latou maua faamanuiaga ua tuuina atu ia te oe. Faaaoga avanoa uma e i ai i totonu o le malumalu. Saili le Alii i totonu o Lona maota. Vaavaai mo Ia i sauniga, i faatusa, ma le Agaga e te lagonaina. O le a e maua o Ia.

Saunia e osi feagaiga i totonu o le maota o le Alii. O se tasi o auala sili e faia ai lenei mea o le tausia o au feagaiga o le papatisoga. Ia avea o se tasi o au sini taiala ia maua sauniga o le malumalu ma ia avea ma se tausi feagaiga i le olaga atoa. Amata nei loa ona ola i tulafono o le a e folafola atu e usitaia i le malumalu: usiusitai i poloaiga a le Atua, ositaulaga, o le talalelei a Iesu Keriso, legavia, ma le faapaiaga. E mafai ona fesoasoani atu ia te oe ia lou aiga, epikopo ma isi taitai o le Ekalesia.

E mafai ona e avea atili e faapei o Iesu Keriso. O le a Ia fesoasoani ia te oe ia avea ma se soo sili atu o le amiotonu. O sauniga ma feagaiga o le malumalu o le a aoao ai oe i le auala e ulu atu ai i le afioaga o le Atua ma maua le ola e faavavau faatasi ma Ia.

O le a faaauupegaina oe i le mana o le Atua. O feagaiga o le malumalu e o mai faatasi ma le folafolaga o le a i ou luga le mana ma le mamalu o le Atua. O le a leoleo oe e Ana agelu.

O le taimi i totonu o le malumalu o le a faafesootaia atili ai oe ia Iesu Keriso ma le Agaga Paia. O le a e lagona le filemu ma le malologa o le Atua. O le a e faalogo i Lona siufofoga ma le manino sili atu. O le a matala mai le lagi ia te oe, ma o le a e malamalama atili i Ona ala. O le a e maua le malosi sili atu e fetaiai ai ma ou luitau aua ua fesootai lou loto i Lona [finagalo].